ಫೇಸ್ಬುಕ್‌ನಲ್ಲಿ ಧರ್ಮನಿಂದನೆ: ಪಾಕ್‌ನಲ್ಲಿ ಆರೋಪಿಗೆ ಗಲ್ಲು

ಲಾಹೋರ್‌: ಫೇಸ್‌ಬುಕ್‌ನಲ್ಲಿ ಧರ್ಮ ವಿರೋಧಿ ಹೇಳಿಕೆಯೊಂದನ್ನು ಬರೆದಿದ್ದ ಪಾಕಿಸ್ಥಾನದ ಶಿಯಾ ವ್ಯಕ್ತಿಯೊಬ್ಬ ಮರಣದಂಡನೆಗೆ ಗುರಿಯಾಗಿದ್ದಾನೆ. ಇದು ಗಲ್ಲು ಶಿಕ್ಷೆ ಪಡೆದ ಪಾಕಿಸ್ಥಾನದ ಮೊದಲ ಸೈಬರ್‌ ಅಪರಾಧ ಎನಿಸಿಕೊಂಡಿದೆ. 30 ವರ್ಷ ವಯಸ್ಸಿನ ತೈಮೂರ್‌ ರಾಜಾ ಗಲ್ಲು ಶಿಕ್ಷೆಗೆ ಗುರಿಯಾದ ಅಪರಾಧಿ. ಈತ ಫೇಸ್‌ಬುಕ್‌ನಲ್ಲಿ ಧರ್ಮವಿರೋಧಿ ಪೋಸ್ಟ್‌ ಒಂದನ್ನು ಪ್ರಕಟಿಸಿದ ಆರೋಪದ ಮೇಲೆ ಕಳೆದ ವರ್ಷ ಬಂಧನಕ್ಕೀಡಾಗಿದ್ದ. ಬಹವಾಲ್ಪುರ ಜಿಲ್ಲೆಯ ಉಗ್ರ ನಿಗ್ರಹ ಕೋರ್ಟ್‌ ರಾಜಾಗೆ ಗಲ್ಲು ಶಿಕ್ಷೆ ಘೋಷಿಸಿದೆ. ಅಲ್ಲದೇ ಶೇ.97ರಷ್ಟು ಮುಸ್ಲಿಮರೇ ಇರುವ ದೇಶದಲ್ಲಿ ಧರ್ಮ ನಿಂದನೆ ಬಹಳ ಸೂಕ್ಷ್ಮವಿಷಯವಾಗಿದೆ ಎಂದು ಕೋರ್ಟ್‌ ಹೇಳಿದೆ.