ಪಾಕಿಸ್ಥಾನ ನಂ.1 ಏಕದಿನ ತಂಡ

ಕರಾಚಿ: ಪಾಕಿಸ್ಥಾನ ಏಕದಿನ ಇತಿಹಾಸದಲ್ಲೇ ಮೊದಲ ಬಾರಿಗೆ ನಂಬರ್‌ ವನ್‌ ತಂಡವಾಗಿ ಮೂಡಿಬಂದಿದೆ. 4ನೇ ಏಕದಿನ ಪಂದ್ಯದಲ್ಲಿ ಪ್ರವಾಸಿ ನ್ಯೂಜಿಲ್ಯಾಂಡ್‌ ತಂಡವನ್ನು 102 ರನ್ನುಗಳಿಂದ ಬಗ್ಗುಬಡಿದ ಬಳಿಕ ಪಾಕ್‌ ಈ ಎತ್ತರ ತಲುಪಿತು.

ಈ 5 ಪಂದ್ಯಗಳ ಸರಣಿಗೂ ಮುನ್ನ ಪಾಕಿಸ್ಥಾನ 106 ರೇಟಿಂಗ್‌ ಅಂಕದೊಂದಿಗೆ 5ನೇ ಸ್ಥಾನದಲ್ಲಿತ್ತು. ನ್ಯೂಜಿಲ್ಯಾಂಡ್‌ ದ್ವಿತೀಯ ಸ್ಥಾನಿಯಾ ಗಿತ್ತು. ಆದರೆ ಸರಣಿಯಲ್ಲಿ 4-0 ಮುನ್ನಡೆ ಸಾಧಿಸಿದ ಬಾಬರ್‌ ಆಜಂ ಪಡೆ ಆಸ್ಟ್ರೇಲಿಯ (113.286) ಮತ್ತು ಭಾರತವನ್ನು (112.638) ಹಿಂದಿಕ್ಕಿತು. ಪಾಕ್‌ ಈಗ 113.483 ರೇಟಿಂಗ್‌ ಅಂಕವನ್ನು ಹೊಂದಿದೆ.
ಆದರೆ ನ್ಯೂಜಿಲ್ಯಾಂಡ್‌ ಎದು ರಿನ ಅಂತಿಮ ಏಕದಿನ ಪಂದ್ಯವನ್ನು ಗೆದ್ದರಷ್ಟೇ ಪಾಕಿಸ್ಥಾನ ಅಗ್ರಸ್ಥಾನದಲ್ಲಿ ಉಳಿಯಲಿದೆ. ಅಕಸ್ಮಾತ್‌ ಸೋತರೆ ಮತ್ತೆ 3ನೇ ಸ್ಥಾನಕ್ಕೆ ಜಾರಲಿದೆ. ಆಸ್ಟ್ರೇಲಿಯ ಮತ್ತು ಭಾರತ ಮತ್ತೆ ಮೊದಲೆರಡು ಸ್ಥಾನಗಳನ್ನು ಅಲಂಕರಿಸಲಿವೆ.

ನ್ಯೂಜಿಲ್ಯಾಂಡ್‌ ಎದುರಿನ ಪಂದ್ಯಗ ಳನ್ನು ಕ್ರಮವಾಗಿ 5 ವಿಕೆಟ್‌, 7 ವಿಕೆಟ್‌, 26 ರನ್‌ ಹಾಗೂ 102 ರನ್ನುಗಳಿಂದ ಗೆದ್ದ ಹೆಗ್ಗಳಿಕೆ ಪಾಕಿಸ್ಥಾನದ್ದು. ಕೊನೆಯ ಮುಖಾಮುಖೀ ರವಿವಾರ ನಡೆಯಲಿದೆ.

ಬಾಬರ್‌ ಶತಕ: ಬಾಬರ್‌ ಆಜಂ ಅವರ ಶತಕ ಸಾಹಸದಿಂದ (107) ಶುಕ್ರವಾರದ 4ನೇ ಪಂದ್ಯದಲ್ಲಿ ಪಾಕಿಸ್ಥಾನ 6 ವಿಕೆಟಿಗೆ 334 ರನ್‌ ಪೇರಿಸಿತು. ಜವಾಬಿತ್ತ ನ್ಯೂಜಿಲ್ಯಾಂಡ್‌ 43.4 ಓವರ್‌ಗಳಲ್ಲಿ 232ಕ್ಕೆ ಕುಸಿಯಿತು.