Pakistan Cricketers; ಆಸ್ಟ್ರೇಲಿಯಾದಲ್ಲಿ ಲಗೇಜ್ ಹೊತ್ತ ಪಾಕ್ ಆಟಗಾರರು!

ಸಿಡ್ನಿ: ಭಾರತದಲ್ಲಿ ನಡೆದ ವಿಶ್ವಕಪ್‌ನಲ್ಲಿ ಕಳಪೆ ಪ್ರದರ್ಶನ ನೀಡಿದ ಪಾಕಿಸ್ತಾನ ಕ್ರಿಕೆಟ್‌ ತಂಡ ಈಗ ಆಸ್ಟ್ರೇಲಿಯ ಪ್ರವಾಸಕ್ಕೆ ತೆರಳಿದೆ. ವರದಿಗಳ ಪ್ರಕಾರ ಆ ತಂಡಕ್ಕೆ ಅತ್ಯಂತ ಮುಜುಗರದ ಸನ್ನಿವೇಶ ಎದುರಾಗಿದೆ.

ತಂಡವನ್ನು ಸ್ವಾಗತಿಸಲು ಆಸ್ಟ್ರೇಲಿಯ ಕ್ರಿಕೆಟ್‌ ಸಂಸ್ಥೆ ಕಡೆಯಿಂದಾಗಲೀ, ಪಾಕಿಸ್ತಾನ ರಾಯಭಾರ ಕಚೇರಿ ಕಡೆಯಿಂದಾಗಲೀ ಯಾರೂ ಬಂದಿರಲಿಲ್ಲವೆನ್ನಲಾಗಿದೆ! ಹಾಗಾಗಿ ಪಾಕ್‌ ಕ್ರಿಕೆಟಿಗರು ಸ್ವತಃ ತಮ್ಮ ಲಗೇಜ್‌ ಗಳನ್ನು ಎತ್ತಿ ಟ್ರಕ್‌ಗೆ ತುಂಬಿದ್ದಾರೆ. ಈ ವಿಡಿಯೊ ಸಾಮಾಜಿಕ ತಾಣಗಳಲ್ಲಿ ದೊಡ್ಡಮಟ್ಟಿಗೆ ಓಡಾಡುತ್ತಿದೆ.

ಈ ವೇಳೆ ಬ್ಯಾಟರ್‌ ಮೊಹಮ್ಮದ್‌ ರಿಜ್ವಾನ್‌ ಅಭಿಮಾನಿಗಳ ಸೆಲ್ಫಿಗೆ ಪೋಸ್‌ ನೀಡಿದ್ದಲ್ಲದೇ, ಸಂತೋಷವಾಗಿ ಲಗೇಜನ್ನು ಟ್ರಕ್‌ಗೆ ಹಾಕಿದ್ದಾರೆ. ಈ ಸ್ವಭಾವ ಕೆಲವರಿಂದ ಪ್ರಶಂಸೆ ಗೆ ಪಾತ್ರವಾಗಿದೆ. ಇನ್ನು ಕೆಲವರು ಅದು ವಿನಯವಂತಿಕೆ ಯಿಂದ ಮಾಡಿದ ಕೆಲಸವಲ್ಲ, ಒತ್ತಾಯ ಪೂರ್ವಕವಾಗಿ ಮಾಡಿಸಿದ್ದು ಎಂದು ಆಡಿಕೊಂಡಿದ್ದಾರೆ.

ಪಾಕಿಸ್ತಾನ ರಾಯಭಾರ ಕಚೇರಿ ಪ್ರತಿನಿಧಿಗಳು ಹಾಜರಿರಲೇ ಬೇಕೆಂದು ನಿರೀಕ್ಷಿಸುವ ಅಗತ್ಯವಿಲ್ಲ. ಆದರೆ ಆತಿಥೇಯ ದೇಶವಾಗಿರುವುದರಿಂದ ಆಸೀಸ್‌ ಸಂಸ್ಥೆಯ ಪ್ರತಿನಿಧಿಗಳಂತೂ ಸ್ವಾಗತಕ್ಕೆ ಬರಬೇಕಾಗಿತ್ತು. ಹಾಗೆಯೇ ಲಗೇಜ್‌ಗಳನ್ನು  ತುಂಬಲು ವ್ಯಕ್ತಿಗಳನ್ನೂ ನಿಯೋಜಿಸಬೇಕಾಗಿತ್ತು. ಈ ವಿಚಾರದಲ್ಲಿ ಆಸ್ಟ್ರೇಲಿಯ ಕ್ರಿಕೆಟ್‌ ಸಂಸ್ಥೆ ಎಡವಿದೆಯಾ? ಉದ್ದೇಶಪೂರ್ವಕವಾಗಿ ಹೀಗೆ ವರ್ತಿಸಿದೆಯಾ? ಅಥವಾ ಸದ್ಯ ಲಭಿಸಿರುವುದು ಅಪೂರ್ಣ ಮಾಹಿತಿಯಾ? ಎನ್ನುವುದು ಇನ್ನಷ್ಟೇ ಖಚಿತವಾಗಬೇಕು.