PF fraud; ಆರೋಪಿ ಕಂಪೆನಿಗಳಿಗೆ ನಾನು ನಿರ್ದೇಶಕನಲ್ಲ: ರಾಬಿನ್‌ ಉತ್ತಪ್ಪ

ಹೊಸದಿಲ್ಲಿ: ಪಿಎಫ್ ಹಣ ವಂಚಿಸಿದ್ದಾರೆಂಬ ಆರೋಪದಡಿ ಪೊಲೀಸರಿಂದ ನೋಟಿಸ್‌ ಎದುರಿಸುತ್ತಿರುವ ಮಾಜಿ ಕ್ರಿಕೆಟಿಗ ರಾಬಿನ್‌ ಉತ್ತಪ್ಪ, ಪ್ರಕರಣದ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ. ಸ್ಟ್ರಾಬೆರಿ ಲೆನ್ಸೆರಿಯ ಪ್ರೈ.ಲಿ., ಸೆಂಟಾರಸ್‌ ಲೈಫ್ಸ್ಟೈಲ್‌ ಬ್ರ್ಯಾಂಡ್ಸ್‌ ಪ್ರೈ.ಲಿ., ಬೆರಿಜ್‌ ಫ್ಯಾಶನ್‌ ಹೌಸ್‌ ಕಂಪೆನಿಗಳಿಗೆ ನಾನು ಸಾಲ ನೀಡಿದ್ದರಿಂದ ನನ್ನನ್ನು ಗೌರವ ನಿರ್ದೇಶಕನನ್ನಾಗಿ ನೇಮಿಸಿದ್ದವು. ಅದರಲ್ಲಿ ಯಾವುದೇ ಸಕ್ರಿಯ ಪಾತ್ರ ಹೊಂದಿರಲಿಲ್ಲ. ಈಗಂತೂ ಆ ಕಂಪೆನಿಗಳ ಯಾವ ಹುದ್ದೆಗಳಲ್ಲೂ ಇಲ್ಲ. ಮೇಲಾಗಿ ಆ ಕಂಪೆನಿಗಳು ನನ್ನಿಂದ ಪಡೆದ ಸಾಲವನ್ನು ಇನ್ನೂ ಮರಳಿಸಿಲ್ಲ. ಅದರ ವಿರುದ್ಧ ಪ್ರಕರಣ ನಡೆಯುತ್ತಿದೆ. ಹಾಗಿದ್ದರೂ ನನ್ನ ಮೇಲೆ ಪಿಎಫ್ ಹಣವನ್ನು ಉದ್ಯೋಗಿಗಳ ಖಾತೆಗೆ ಹಾಕದ ಪ್ರಕರಣ ದಾಖಲಿಸಲಾಗಿದೆ. ಇದರ ವಿರುದ್ಧ ನನ್ನ ವಕೀಲರ ತಂಡ ಕ್ರಮ ಕೈಗೊಳ್ಳಲಿದೆ ಎಂದು ಉತ್ತಪ್ಪ ಹೇಳಿದ್ದಾರೆ.

2018-19ರಲ್ಲಿ ನಾನು ನಿರ್ದೇಶಕನಾಗಿದ್ದೆ. ಇಂತಹ ಹುದ್ದೆಗಳನ್ನು ನಿಭಾಯಿಸಲು ಬೇಕಾದ ತಜ್ಞತೆಯಾಗಲಿ, ಅಷ್ಟು ಸಮಯವಾಗಲಿ ನನ್ನಲ್ಲಿಲ್ಲ. ಸದ್ಯ ನಾನು ಕ್ರಿಕೆಟ್‌ ವೀಕ್ಷಕ ವಿವರಣೆಕಾರನಾಗಿ, ಟಿವಿ ನಿರೂಪಕನಾಗಿ, ವೃತ್ತಿಪರ ಕ್ರಿಕೆಟಿಗನಾಗಿ ಕಾರ್ಯಮಗ್ನನಾಗಿದ್ದೇನೆ. ಇವೆನ್ನಲ್ಲ ಪಿಎಫ್ ಅಧಿಕಾರಿಗಳಿಗೆ ಸ್ಪಷ್ಟಪಡಿಸಿದ್ದೇನೆ. ಆದರೂ ಕಾನೂನು ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.