ನೇರ ಕೂರಿಗೆ ಭತ್ತದ ಬಿತ್ತನೆ ರೈತರಿಗೆ ವರದಾನ

ದಾವಣಗೆರೆ: ನಿರಂತರ ಬರ ಹಾಗೂ ಕಾಲುವೆ ನೀರುನಂಬಿ ಭತ್ತ ಬೆಳೆಯುವ ಕೂರಿಗೆ ಬಿತ್ತನೆ ವಿಧಾನ ರೈತರ ಕೈ ಹಿಡಿದಿದೆ. ಜಿಲ್ಲೆಯ ಭದ್ರಾ, ಶಾಂತಿಸಾಗರ, ತುಂಗಾಭದ್ರಾ ಅಚ್ಚುಕಟ್ಟು ಭಾಗದಲ್ಲಿ ನೇರ ಕೂರಿಗೆ ಭತ್ತದ ಬಿತ್ತನೆ ಪದ್ಧತಿ ಅಳವಡಿಸಿಕೊಳ್ಳುವುದು ರೈತರಿಗೆ ವರದಾನ ಆಗಲಿದೆ.

ಕಡಿಮೆ ನೀರು, ಸಮಯಕ್ಕೆ ಸರಿಯಾಗಿ ಬೆಳೆ, ಕಡಿಮೆ ಖರ್ಚಿನಲ್ಲಿ ಅಧಿಕ ಲಾಭ ಪಡೆಯುವಲ್ಲಿ ಈ ಪದ್ಧತಿ ಹೆಚ್ಚು ರೈತರಿಗೆ ಅನುಕೂಲ. ಈಗಾಗಲೇ ಜಿಲ್ಲೆಯಲ್ಲಿ ಸಾಕಷ್ಟು ರೈತರು ನೇರ ಕೂರಿಗೆ ಭತ್ತದ ಬಿತ್ತನೆ ಬೆಳೆಯಲು ಮುಂದಾಗಿದ್ದಾರೆ. ಜೊತೆಗೆ ಒಂದೇ ಬೆಳೆಗೆ ಸೀಮಿತವಾಗದೆ ಪರ್ಯಾಯ ಬೆಳೆ ಬೆಳೆದು ಕೂಡ ಸೈ ಎನಿಸಿಕೊಂಡಿದ್ದಾರೆ.

ಜನಪ್ರಿಯವಾಗುತ್ತಿದೆ ನೇರ ಕೂರಿಗೆ ಬಿತ್ತನೆ: ಜಿಲ್ಲೆಯ ಚನ್ನಗಿರಿ ತಾಲೂಕಿನ ತ್ಯಾವಣಿಗೆ ಹೋಬಳಿ ವ್ಯಾಪ್ತಿಯ ತ್ಯಾವಣಿಗಿ, ಅರೆಹಳ್ಳಿ, ಕಾರಿಗನೂರು, ನಲ್ಕುದುರೆ, ರಾಮಗೊಂಡನಹಳ್ಳಿ, ಮುಕ್ತೇನಹಳ್ಳಿ ಮುಂತಾದ ಭಾಗಗಳಲ್ಲಿ 52 ಎಕರೆ, ಹರಿಹರ ತಾಲೂಕಿನ ಮಲೇಬೆನ್ನೂರು, ಕೊಂಡಜ್ಜಿ ಭಾಗಗಳಲ್ಲಿ 30 ಎಕರೆ, ದಾವಣಗೆರೆ ತಾಲೂಕಿನ ಕಾಡಜ್ಜಿ, ಆವರಗೊಳ್ಳ ವ್ಯಾಪ್ತಿಯಲ್ಲಿ 52 ಎಕರೆ ಪ್ರದೇಶದಲ್ಲಿ ಈಗಾಗಲೇ ರೈತರು ನೇರ ಕೂರಿಗೆ ಭತ್ತದ ಬಿತ್ತನೆ ಮಾಡಿದ್ದು, ಫೆಬ್ರವರಿ ಅಂತ್ಯದವರೆಗೆ ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ರೈತರು ಈ ಪದ್ಧತಿ ಬಿತ್ತನೆ ಮಾಡಲಿದ್ದಾರೆ.

ರೈತರಿಗೇ ಅನುಕೂಲ: ಕಳೆದ ಬೇಸಿಗೆಯ ಹಂಗಾಮಿನಲ್ಲಿ 2 ಎಕರೆ ಅಡಿಕೆ ತೋಟದಲ್ಲಿ ಕೂರಿಗೆ ಭತ್ತದ ಬಿತ್ತನೆ ಮಾಡಿ ಒಂದು ಎಕರೆಗೆ 30 ಚೀಲ ಇಳುವರಿ ಪಡೆದಿದ್ದೆ. ಇದರ ಜೊತೆಗೆ ಮಿಶ್ರಬೆಳೆಯಾಗಿ ಉದ್ದಿನಕಾಳು, ಈರುಳ್ಳಿ, ಚಂಡೆ ಹೂವು, ಕುಟುಂಬಕ್ಕೆ ಸಾಕಾಗುವಷ್ಟು ತರಕಾರಿ, ಕಾಳು ಬೆಳೆದಿದ್ದೆ. ಅದೇ ರೀತಿ ಈ ಬೇಸಿಗೆಯ ಹಂಗಾಮಿನಲ್ಲೂ ಕೂಡ ಪುನಃ ಇದೇ ಪದ್ಧತಿ ಅಳವಡಿಸಿಕೊಂಡು ಮಿಶ್ರಬೆಳೆಯಾಗಿ ಬೀಟ್ರೂಟ್ ಬೆಳೆಯುವ ಉತ್ಸಾಹದಲ್ಲಿದ್ದೇನೆ ಎನ್ನುತ್ತಾರೆ ಅರೇಹಳ್ಳಿ ರೈತ ಪರಮೇಶ್ವರಪ್ಪ.

ಸಾಂಪ್ರದಾಯಿಕ ಭತ್ತದ ನಾಟಿ ಪದ್ಧತಿಯ ಪ್ರತಿ ಎಕರೆಗೆ 25 ಸಾವಿರ ಖರ್ಚು ಮಾಡಿದರೆ, ಕೂರಿಗೆ ಪದ್ಧತಿಗೆ 15 ಸಾವಿರಷ್ಟು ಮಾತ್ರ ಖರ್ಚು ಮಾತ್ರ ಬರುತ್ತದೆ. ಈ ಕೂರಿಗೆ ಭತ್ತ ಬಿತ್ತನೆಯಿಂದ ನಮಗೆ ಸಾಕಷ್ಟು ಲಾಭ, ಅನುಕೂಲ ಆಗಿದೆ. ನಾವು ಬೆಳೆದದ್ದನ್ನು ಕಂಡು ಸುತ್ತಮುತ್ತಲಿನ ಗ್ರಾಮದ ಕೆಲ ರೈತರು ಇದೇ ಮಾದರಿಯ ಪದ್ಧತಿಯನ್ನು ಅಳವಡಿಸಿಕೊಳ್ಳಲು ಮುಂದಾಗಿದ್ದಾರೆ. ಈ ಪದ್ಧತಿಯನ್ನು ಎಲ್ಲರೂ ಅಳವಡಿಸಿಕೊಂಡರೆ ಹೆಚ್ಚು ಅನುಕೂಲ ಆಗುತ್ತದೆ. ಜೊತೆಗೆ ಈ ಕೃಷಿಯಿಂದ ಮಣ್ಣಿನ ಆರೋಗ್ಯ ಕಾಪಾಡುವ ಜೊತೆಗೆ ಭವಿಷ್ಯದ ಪೀಳಿಗೆಗೂ ನೆಮ್ಮದಿಯ ವಾತಾವರಣ ನಿರ್ಮಿಸಿಕೊಡಬಹುದಾಗಿದೆ ಎನ್ನುತ್ತಾರೆ ರೈತರು.

ಸಾಂಪ್ರದಾಯಿಕ ನಾಟಿ ಪದ್ಧತಿಗೆ ಅಧಿಕ ನೀರು, ಹೆಚ್ಚು ಕೂಲಿಕಾರರು, ವ್ಯಾಪಕ ರಸಗೊಬ್ಬರ, ಕೀಟನಾಶಕ ಬಳಕೆ ಮಾಡಬೇಕಾಗುತ್ತದೆ. ಇದರಿಂದ ಜಾಗತಿಕ ತಾಪಮಾನದ ಮೇಲೆ ಹೆಚ್ಚು ದುಷ್ಪರಿಣಾಮ ಬೀರುವ ಜೊತೆಗೆ ಮಣ್ಣಿನ ಮಾಲಿನ್ಯವೂ ಹೆಚ್ಚಾಗುತ್ತದೆ. ಆದರೆ, ಈ ಎಲ್ಲಾ ಸಮಸ್ಯೆಗಳ ಪರಿಹಾರಕ್ಕೆ ಕೂರಿಗೆ ಭತ್ತದ ಬಿತ್ತನೆ ರೈತರಿಗೆ ಹೆಚ್ಚು ವರದಾನ ಆಗಲಿದೆ. ಜೊತೆಗೆ ಈ ಪದ್ಧತಿಯನ್ನು ರೈತರು ಅಳವಡಿಸಿಕೊಂಡಲ್ಲಿ 1 ಹೆಕ್ಟೇರ್‌ಗೆ 4 ಸಾವಿರ, 1 ಎಕರೆಗೆ 1,600 ರೂ. ಪ್ರೋತ್ಸಾಹ ಧನ ಕೃಷಿ ಇಲಾಖೆಯಿಂದ ದೊರೆಯಲಿದೆ ಎನ್ನುತ್ತಾರೆ ತ್ಯಾವಣಿಗೆ ರೈತ ಸಂಪರ್ಕ ಕೇಂದ್ರದ ಕೃಷಿ ಅಧಿಕಾರಿ ಬಿ.ವಿ. ಶ್ರೀನಿವಾಸಲು.

ಪ್ರಸ್ತುತ ಕುಡಿಯುವ ನೀರಿಗೆ ಜಿಲ್ಲೆಯಲ್ಲಿ ಬರ ಆವರಿಸಿರುವ ಸಂದಿಗ್ಧ ಪರಿಸ್ಥಿತಿಯಲ್ಲಿ ಹೊಸ ಬಗೆಯ ಕೃಷಿ ಅಳವಡಿಕೆ ಹೆಚ್ಚು ಸಹಕಾರಿ. ಈ ಹಿನ್ನೆಲೆಯಲ್ಲಿ ಹೆಚ್ಚೆಚ್ಚು ರೈತರು ಜಿಲ್ಲೆಯಾದ್ಯಂತ ನೇರ ಕೂರಿಗೆ ಭತ್ತದ ಭಿತ್ತನೆ ಕೃಷಿ ಅಳವಡಿಸಿಕೊಂಡರೆ ನೀರಿನ ಉಳಿತಾಯದೊಂದಿಗೆ ಜಲಕ್ಷಾಮ ನಿವಾರಣೆಗೆ ಉತ್ತಮ ಕೊಡುಗೆ ನೀಡಬಹುದಾಗಿದೆ.

ಭದ್ರಾ ಅಚ್ಚುಕಟ್ಟು ಪ್ರದೇಶ ಸೇರಿದಂತೆ ಜಿಲ್ಲೆಯ ಎಲ್ಲಾ ಕೊನೆಭಾಗದ ರೈತರ ನೀರಿನ ಸಮಸ್ಯೆಗೆ ಕೂರಿಗೆ ಭತ್ತದ ಬಿತ್ತನೆ ಪರಿಹಾರ ಮಾರ್ಗವಾಗಿದೆ. ಈ ಬೆಳೆಯ ಬಗ್ಗೆ ಕಾಡಾ ಮುಂತಾದ ಸಭೆಗಳಲ್ಲಿ ಕೃಷಿ ಇಲಾಖೆ ಮತ್ತು ಜಲ ಸಂಪನ್ಮೂಲ ಇಲಾಖೆ ಅಧಿಕಾರಿಗಳು, ತಜ್ಞರು ಸೇರಿ ಬೆಳೆಯೋಜನೆ ರೂಪಿಸಬೇಕು. ಜೊತೆಗೆ ಯಾವ ಪ್ರದೇಶದ ಭೂಮಿಗಳಲ್ಲಿ ಕೂರಿಗೆ ಬಿತ್ತನೆ ಮಾಡಲು ಸಾಧ್ಯವಿದೆಯೋ, ಅಲ್ಲೆಲ್ಲಾ ಈ ಪದ್ಧತಿಯನ್ನು ಅಳವಡಿಸಿಕೊಳ್ಳಲು ಸೂಕ್ತ ನಿರ್ದೇಶನ ನೀಡಿದ್ದಾದರೆ ಬೇಸಿಗೆ ಹಂಗಾಮಿನಲ್ಲಿ ಶೇ. 50 ರಿಂದ 60 ರಷ್ಟು ಭದ್ರಾ ನೀರಿನ ಸಮಸ್ಯೆ ನಿಯಂತ್ರಿಸಬಹುದು.
•ತೇಜಸ್ವಿ ಪಟೇಲ್‌, ಜಿಲ್ಲಾ ಪಂಚಾಯಿತಿ ಸದಸ್ಯ.

ಜಿಲ್ಲೆಯ ಭದ್ರಾ, ಶಾಂತಿಸಾಗರ, ತುಂಗಾಭದ್ರಾ ಸೇರಿದಂತೆ ನೀರಾವರಿ ಅಚ್ಚುಕಟ್ಟು ಭಾಗದ ರೈತರು ಹಾಗೂ ಕೊನೆ ಭಾಗಕ್ಕೆ ಕಡಿಮೆ ಪ್ರಮಾಣದಲ್ಲಿ ನೀರು ದೊರೆಯುವ ರೈತರು ನೇರ ಕೂರಿಗೆ ಭತ್ತದ ಬಿತ್ತನೆ ಅಳವಡಿಸಿಕೊಂಡರೆ ಹೆಚ್ಚು ಅನುಕೂಲ. ಈ ರೀತಿಯ ಬೆಳೆ ಪದ್ಧತಿಯಿಂದ ಖರ್ಚು-ವೆಚ್ಚ ಕಡಿಮೆ ಆಗುವ ಜೊತೆಗೆ ಅಧಿಕ ಲಾಭ ಪಡೆಯಬಹುದಾಗಿದೆ. ಬೇಸಿಗೆಯ ಈ ದಿನಗಳಲ್ಲಿ ಅಪಾರ ಪ್ರಮಾಣದ ನೀರನ್ನು ಉಳಿತಾಯ ಮಾಡಬಹುದಾಗಿದೆ. ಸಾಂಪ್ರದಾಯಿಕ ಪದ್ಧತಿಯಲ್ಲಿ ರೈತರಿಗೆ ಲಾಭಾಂಶ ದೊರೆಯುವುದು ಅಷ್ಟಕಷ್ಟೇ. ಆದರೆ, ಕೂರಿಗೆ ಭತ್ತ ಬಿತ್ತನೆಯಿಂದ ರೈತರ ಆದಾಯ ದ್ವಿಗುಣ ಆಗುವ ಜೊತೆಗೆ ಪರಿಸರದ ಮೇಲಾಗುವ ಹಾನಿಯನ್ನು ತಡೆಗಟ್ಟಬಹುದಾಗಿದೆ.
•ಶರಣಪ್ಪ ಮುದಗಲ್‌ ಜಿಲ್ಲಾ ಜಂಟಿ ಕೃಷಿ ನಿರ್ದೇಶರು.

ವಿಜಯ್‌ ಕೆಂಗಲಹಳ್ಳಿ