3 ಬಾರ್‌ ಡಿ.31ರವರೆಗೆ ಮುಚ್ಚಲು ಡೀಸಿ ಆದೇಶ

ಗೌರಿಬಿದನೂರು: ತಾಲೂಕಿನ ಹುಣಸೇನಹಳ್ಳಿ ಗ್ರಾಮದ ರಿಲ್ಯಾಕ್ಸ್‌ ಬಾರ್‌, ರಘು ವೈನ್ಸ್‌ ಮತ್ತು ವೈಷ್ಣವಿ ಬಾರ್‌ಗಳನ್ನು ಸಾರ್ವಜನಿಕರ ಮನವಿ ಮತ್ತು ಆಂಧ್ರದ ಹಿಂದೂಪುರದ ಜನತೆ ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿರುವುದರಿಂದ ಕೋವಿಡ್ ಹೆಚ್ಚಳ ಭೀತಿ ಹಿನ್ನೆಲೆ ಬಾರ್‌ಗಳನ್ನು ಮುಚ್ಚುವಂತೆ ಚಿಕ್ಕಬಳ್ಳಾಪುರ ಜಿಲ್ಲಾಧಿಕಾರಿ ಆದೇಶಿಸಿದ್ದಾರೆ.

ಗ್ರಾಮದಲ್ಲಿ 250 ಕುಟುಂಬಗಳಿದ್ದು, ಈ ಗ್ರಾಮವು ನೆರೆಯ ಹಿಂದೂಪುರ ತಾಲೂಕಿನ ಆಂಧ್ರದ ಗಡಿ ಭಾಗಕ್ಕೆ ಹೊಂದಿಕೊಂಡಿದ್ದು, ಕೋವಿಡ್‌ ಹಿಂದೂಪುರ ತಾಲೂಕಿನಲ್ಲಿ ಹೆಚ್ಚಾಗಿರುವುದು ಕಂಡುಬಂದಿರುವುದರಿಂದ ಗಡಿ ಭಾಗದ ಜನರು ಮದ್ಯ ಖರೀದಿಗಾಗಿ ಹುಣಸೇನಹಳ್ಳಿ ಗ್ರಾಮಕ್ಕೆ ಬರುತ್ತಿರುವುದರಿಂದ ನಗರಗೆರೆ ಹೋಬಳಿ, ಹುಣಸೇನಹಳ್ಳಿ ಗ್ರಾಮ ಹಾಗೂ ಸುತ್ತ-ಮುತ್ತಲಿನ ಗ್ರಾಮಗಳಿಗೂ ಕೊರೊನಾ ಹರಡುವ ಸಂಭವ ಹೆಚ್ಚಾಗಿರುವುದರಿಂದ ಈ ಬಾರ್‌ಗಳನ್ನು 2020, ಡಿಸೆಂಬರ್‌ 31 ರವರೆಗೆ ಮುಚ್ಚಲು ಆದೇಶಿಸಿದ್ದಾರೆ.