ಓಪನ್‌ಹೈಮರ್‌: ಭಗವದ್ಗೀತೆ ಉಲ್ಲೇಖವಿಲ್ಲ

ಹೊಸದಿಲ್ಲಿ: ಅನುಚಿತ ಸಂದರ್ಭದಲ್ಲಿ ಭಗವದ್ಗೀತೆಯ ಸಾಲುಗಳನ್ನು ಪಠಿಸಲಾಗಿದೆ ಎಂದು ಆರೋಪಿಸಲಾಗಿರುವ “ಓಪನ್‌ಹೈಮರ್‌’ ಸಿನೆಮಾದಲ್ಲಿ ಭಗವದ್ಗೀತೆಯ ಉಲ್ಲೇಖವೇ ಇಲ್ಲವೆಂಬ ವಾದಗಳು ಕೇಳಿಬಂದಿವೆ. ಚಿತ್ರದ ಒಂದು ದೃಶ್ಯದಲ್ಲಿ ನಟ-ನಟಿ ಲೈಂಗಿಕ ಕ್ರಿಯೆಯಲ್ಲಿ ತೊಡಗಿರುವ ಸಂದರ್ಭದಲ್ಲಿ ಗೀತೆಯ ಶ್ಲೋಕವೊಂದನ್ನು ಹೇಳಲಾಗಿದೆ ಎಂದು ಆರೋಪಿಸಲಾಗಿತ್ತು.

ಈ ಸಂಬಂಧಿಸಿದಂತೆ ಕೇಂದ್ರ ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವ ಅನುರಾಗ್‌ ಸಿಂಗ್‌ ಠಾಕೂರ್‌ ಕೂಡ ಸೆನ್ಸಾರ್‌ ಮಂಡಳಿಯನ್ನು ತರಾಟೆ ತೆಗೆದುಕೊಂಡಿದ್ದರು. ಈ ಬೆನ್ನಲ್ಲೇ ಈಗ ಮತ್ತೂಂದು ವಾದ ಕೇಳಿಬಂದಿದೆ. ಆ ಪ್ರಕಾರ ಸಿನೆಮಾದಲ್ಲಿ ನಟಿಯ ಮುಂದೆ ಹಲವಾರು ಪುಸ್ತಕಗಳ ಬಗ್ಗೆ ನಟ ಹರಟುತ್ತಿದ್ದಾಗ, ಪುಸ್ತಕವೊಂದರಲ್ಲಿದ್ದ ಸಂಸ್ಕೃತದ ಸಾಲನ್ನು ಓದುತ್ತಾನೆ ಅದು “ನಾನೇ ಸಾವು, ಜಗತ್ತನ್ನು ಅಂತ್ಯಗೊಳಿಸುವವನೂ ನಾನೇ” ಎಂಬುದಾಗಿದೆ.

ಈ ಸಾಲುಗಳು ಭಗವದ್ಗೀತೆಯದ್ದು ಎಂಬುದಾಗಲಿ ಅಥವಾ ಪುಸ್ತಕದ ಮೇಲೆ ಭಗವದ್ಗೀತೆ ಎಂದಾಗಲಿ ನಮೂದಿಸಲಾಗಿಲ್ಲ. ಹಾಗಾಗಿ ಇದು ಬರೀ ಸಂಸ್ಕೃತ ಸಾಲೊಂದರ ಅನುವಾದವಷ್ಟೇ ಎಂದು ವಾದಿಸಲಾಗುತ್ತಿದೆ.