ಇತ್ತೀಚೆಗಷ್ಟೇ ನಟ ಶ್ರೀಮುರಳಿ ‘ಆಪರೇಷನ್‌ ನಕ್ಷತ್ರ’ ಚಿತ್ರದ ಶೀರ್ಷಿಕೆ ಅನಾವರಣಗೊಳಿಸಿ, ಚಿತ್ರತಂಡಕ್ಕೆ ಶುಭಹಾರೈಸಿದ್ದರು. ಈಗ ನಟ ಗಣೇಶ್‌ ಅವರು ‘ಆಪರೇಷನ್‌ ನಕ್ಷತ್ರ’ ಚಿತ್ರದ ಟೀಸರ್‌ ಬಿಡುಗಡೆ ಮಾಡುವ ಮೂಲಕ ಹೊಸಬರ ಚಿತ್ರಕ್ಕೆ ಗೆಲುವು ಸಿಗಲಿ ಎಂದು ಹಾರೈಸಿದ್ದಾರೆ.
ಇತ್ತೀಚೆಗೆ ಚಿತ್ರದ ಟೀಸರ್‌ ಬಿಡುಗಡೆ ಮಾಡಿ, ವೀಕ್ಷಿಸಿ ಮಾತನಾಡಿದ ಗಣೇಶ್‌, ‘ಟೀಸರ್‌ ನೋಡಿದರೆ ಸಸ್ಪೆನ್ಸ್‌ ಥ್ರಿಲ್ಲರ್‌ ಚಿತ್ರ ಅಂಶಗಳಿರುವ ಚಿತ್ರ ಎಂಬುದು ಗೊತ್ತಾಗುತ್ತದೆ. ಇತ್ತೀಚೆಗೆ ಸಸ್ಪೆನ್ಸ್‌ ಮತ್ತು ಥ್ರಿಲ್ಲರ್‌ ಅಂಶಗಳಿರುವ ಚಿತ್ರಗಳು ಸಾಕಷ್ಟು ಗಮನಸೆಳೆಯುತ್ತಿವೆ. ಅದರಲ್ಲೂ ಹೊಸಬರು ಹೊಸ ಆಲೋಚನೆ ಇಟ್ಟುಕೊಂಡು ಕನ್ನಡಕ್ಕೆ ಹೊಸದೇನನ್ನೋ ಕೊಡಲು ಮುಂದಾಗುತ್ತಿದ್ದಾರೆ. ಅಂತಹ ಚಿತ್ರಗಳ ಸಾಲಿಗೆ ‘ಆಪರೇಷನ್‌ ನಕ್ಷತ್ರ’ ಚಿತ್ರವೂ ಸೇರಲಿ’ ಎಂದು ಶುಭಕೋರಿದ್ದಾರೆ.
ಫೈವ್‌ ಸ್ಟಾರ್‌ ಬ್ಯಾನರ್‌ನಲ್ಲಿ ನಿರ್ಮಾಣವಾಗಿ ರುವ ಈ ಚಿತ್ರಕ್ಕೆ ನಂದಕುಮಾರ್‌ ನಿರ್ಮಾಪಕರು. ಟಿ.ಎಸ್‌.ಅರವಿಂದ್‌ ಮೂರ್ತಿ, ರಾಧಾಕೃಷ್ಣ , ಕಿಶೋರ್‌ ಮೇಗಳಮನೆ ಕೂಡ ನಿರ್ಮಾಣದಲ್ಲಿ ಸಾಥ್‌ ನೀಡಿದ್ದಾರೆ. ಮಧು ಸೂದನ್‌ ಈ ಚಿತ್ರದ ನಿರ್ದೇಶಕರು. ಇವರಿಗಿದು ಮೊದಲ ಚಿತ್ರ. ಕಥೆ, ಚಿತ್ರಕಥೆ ಜವಾಬ್ದಾರಿಯೂ ಇವರದೇ. ಹಣದ ಹಿಂದೆ ಹೋಗುವ ಮಂದಿಗೆ ಆ ಹಣ ಸಿಗುತ್ತಾ ಅಥವಾ ಅದು ಬೇರೆಯವರ ಪಾಲಾಗುತ್ತಾ? ಎಂಬುದನ್ನು ಸಸ್ಪೆನ್ಸ್‌ ಹಾಗು ಥ್ರಿಲ್ಲರ್‌ ಅಂಶಗಳೊಂದಿಗೆ ಕಥೆ ಹೆಣೆಯಲಾಗಿದೆ.
ನಿರಂಜನ್‌ ಒಡೆಯರ್‌, ಅದಿತಿ ಪ್ರಭುದೇವ್‌, ಯಜ್ಞಾಶೆಟ್ಟಿ, ಲಿಖೀತ್‌ ಸೂರ್ಯ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ಚಿತ್ರದಲ್ಲಿ ದೀಪಕ್‌ರಾಜ್‌ ಶೆಟ್ಟಿ, ಶ್ರೀನಿವಾಸ್‌ ಪ್ರಭು, ಗೋವಿಂದೇಗೌಡ, ವಿಜಯಲಕ್ಷ್ಮಿ, ಅರವಿಂದ್‌ ಮೂರ್ತಿ, ಟಿ.ಎಸ್‌. ಭರತ್‌ ಇತರರು ನಟಿಸಿದ್ದಾರೆ. ಚಿತ್ರೀಕರಣ ಬಹುತೇಕ ಮುಗಿದಿದ್ದು, ಗೋವಾದಲ್ಲಿ ಒಂದು ದಿನ ಚಿತ್ರೀಕರಣ ಮಾಡಿದರೆ ಚಿತ್ರ ಪೂರ್ಣಗೊಳ್ಳಲಿದೆ.
ಈ ಚಿತ್ರಕ್ಕೆ ವೀರ್‌ಸಮರ್ಥ್ ಎರಡು ಹಾಡುಗಳಿಗೆ ಸಂಗೀತ ನೀಡಿದ್ದಾರೆ. ಶಿವಸೇನ ಛಾಯಾಗ್ರಹಣ, ಮಾಡಿದ್ದಾರೆ. ಕಿಶೋರ್‌ ಮೇಗಳಮನೆ ಮತ್ತು ಮಧುಸೂಧನ್‌ ಸಂಭಾಷಣೆ ಬರೆದರೆ, ಅರ್ಜುನ್‌ ಕಿಟ್ಟು ಅವರ ಸಂಕಲನವಿದೆ. ಕಂಬಿ ರಾಜು ನೃತ್ಯ ನಿರ್ದೇಶನವಿದೆ. ಶರಣ್‌ ಜೆನ್ಕಲ್‌ ಸಹ ನಿರ್ದೇಶನ ಮಾಡಿದ್ದಾರೆ. ಬಹುತೇಕ ಬೆಂಗಳೂರು ಸುತ್ತಮುತ್ತ ಸುಮಾರು 35 ದಿನಗಳ ಕಾಲ ಚಿತ್ರೀಕರಣ ನಡೆದಿದೆ.
