ಆಪರೇಷನ್‌ ಕಮಲ ಹೇಸಿಗೆ ಕೆಲಸ: ಹೊರಟ್ಟಿ

ಧಾರವಾಡ: ‘ರಾಜ್ಯದ ದೋಸ್ತಿ ಸರ್ಕಾರ ಟೇಕಾಫ್‌ ಆಗಿದೆ. ಆದರೆ, ಪ್ರತಿ ದಿನ ಕಾಲೆಳೆಯುವ ಕೆಲಸ ನಡೆದಿದೆ. ಅದರಲ್ಲೂ ರಾಜ್ಯ ರಾಜಕಾರಣದಲ್ಲಿ ಭಯದ ವಾತಾವರಣ ಸೃಷ್ಟಿಸುವ ಕೆಲಸ ನಡೆದಿದೆ’ ಎಂದು ವಿಧಾನ ಪರಿಷತ್‌ ಮಾಜಿ ಸಭಾಪತಿ ಬಸವರಾಜ ಹೊರಟ್ಟಿ ಹೇಳಿದರು.

ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಒಂದಿಬ್ಬರು ರಾಜಕಾರಣಿಗಳಿದ್ದು, ಅವರಿಗೆ ದಿನದ 24 ತಾಸೂ ಇದೇ ಕೆಲಸವಾಗಿ ಬಿಟ್ಟಿದೆ. ಬಿಜೆಪಿಯವರು ಆಪರೇಷನ್‌ ಕಮಲ ಯಾಕೆ ಮಾಡುತ್ತಿದ್ದಾರೋ ಗೊತ್ತಿಲ್ಲ. ಇದೊಂದು ಹೇಸಿಗೆ ಕೆಲಸ. ಪ್ರಜಾಪ್ರಭುತ್ವದಲ್ಲಿ ಇದು ಒಳ್ಳೆಯ ನಡತೆ ಅಲ್ಲ ಎಂದರು. ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರು ಸಿನಿಮಾ ನೋಡಿದರೆ ಅದರಲ್ಲೇ ನಿದೆ ತಪ್ಪು? 24 ಗಂಟೆನೂ ರಾಜಕೀಯ ಮಾಡಿಕೊಂಡೇ ಇರಬೇಕಾ ಎಂದು ಪ್ರಶ್ನಿಸಿದ ಹೊರಟ್ಟಿ, ಕುಮಾರಸ್ವಾಮಿ ಅವರು ತಮ್ಮ ಪುತ್ರ ನಿಖೀಲ್‌ ಅಭಿನಯಿಸಿದ ಚಿತ್ರ ನೋಡಿದ್ದಾರೆ, ಬೇರೆ ಯಾವ ಚಿತ್ರವನ್ನೂ ನೋಡಿಲ್ಲ ಎಂದರು.