ಜಮ್ಮು ಕಾಶ್ಮೀರ ರಮ್ಜಾನ್‌ ಕದನ ವಿರಾಮ: 5 ದಿನದಲ್ಲಿ ಐದೇ ಕಲ್ಲೆಸೆತ

ಹೊಸದಿಲ್ಲಿ : ಪವಿತ್ರ ಉಪವಾಸ ಮಾಸ ರಮ್ಜಾನ್‌ ಪ್ರಯುಕ್ತ ಜಮ್ಮು ಕಾಶ್ಮೀರದಲ್ಲಿ ಸೇನಾ ಕಾರ್ಯಾಚರಣೆ ನಿಲ್ಲಿಸಲಾದ ಮೊದಲ ಐದು ದಿನಗಳಲ್ಲಿ ಕೇವಲ ಐದು ಕಲ್ಲೆಸೆತದ ಪ್ರಕರಣಗಳು ನಡೆದಿರುವುದಾಗಿ ಅಧಿಕಾರಿಯೋರ್ವರು ತಿಳಿಸಿದ್ದಾರೆ.

ಮೇ 17ರಿಂದ ಮೇ 21ವರೆಗಿನ ಐದು ದಿನಗಳಲ್ಲಿ  ಕೇವಲ 5 ಕಲ್ಲೆಸೆತ ಪ್ರಕರಣಗಳು ಘಟಿಸಿವೆ ಎಂದವರು ಹೇಳಿದ್ದಾರೆ.

ಉಗ್ರರ ವಿರುದ್ಧ ಸೇನಾ ಕಾರ್ಯಾಚರಣೆಯನ್ನು ಪೂರ್ಣ ಪ್ರಮಾಣದಲ್ಲಿ ನಡೆಸಲಾದ ಈ ವರ್ಷ ಎಪ್ರಿಲ್‌ನ ಮೊದಲ ಐದು ದಿನಗಳಲ್ಲಿ 92 ಕಲ್ಲೆಸೆತದ ಪ್ರಕರಣಗಳು ಘಟಿಸಿದ್ದವು ಎಂದವರು ಹೇಳಿದರು.

ಜಮ್ಮು ಕಾಶ್ಮೀರದಲ್ಲಿನ ರಮ್ಜಾನ್‌ ಕದನ ವಿರಾಮ ಈ ದಿನದ ವರೆಗೆ ಯಶಸ್ವಿಯಾಗಿದೆ ಎಂದು ಜಮ್ಮು ಕಾಶ್ಮೀರ ಪೊಲೀಸ್‌ ಮುಖ್ಯಸ್ಥ ಎಸ್‌ ಪಿ ವೈದ್‌ ಹೇಳಿದ್ದಾರೆ.