ಆನ್‌ಲೈನ್‌ ಶಾಪಿಂಗ್‌ ಕೂಪನ್‌ ಹೆಸರಲ್ಲಿ 1.73 ಲಕ್ಷ ರೂ. ವಂಚನೆ

ಶಿವಮೊಗ್ಗ: ನ್ಯಾಪ್‌ಟಲ್‌ ಆನ್‌ಲೈನ್‌ ಶಾಪಿಂಗ್‌ ಕೂಪನ್‌ ನಲ್ಲಿ ನೀವು 12 ಲಕ್ಷ ರೂ. ಹಣ ಗೆದ್ದಿದ್ದೀರಿ ಎಂಬ ಸಂದೇಶ ಸ್ವೀಕರಿಸಲು ಹೋಗಿ ಮಹಿಳೆಯೊಬ್ಬರು ಬರೋಬ್ಬರಿ 1.73 ಲಕ್ಷ ರೂ. ವಂಚನೆಗೆ ಒಳಗಾದ ಘಟನೆ ನಡೆದಿದೆ.

ಸೆ.4 ರಂದು ನವುಲೆಯ ವೀರಭದ್ರೇಶ್ವರ ಲೇಔಟ್‌ ನ ಮಹಿಳೆಯೊಬ್ಬರು ಕೊಲ್ಕತ್ತಾದ ವಿಳಾಸವುಳ್ಳ ನ್ಯಾಪ್‌ ಟಲ್‌ ಆನ್‌ ಲೈನ್‌ ಶಾಪಿಂಗ್‌ ಪ್ರೈ.ಲಿಮಿಟೆಡ್‌ ಹೆಸರಿನಲ್ಲಿ 12 ಲಕ್ಷ ರೂ. ಹಣ ಗೆದ್ದೀದ್ದೀರಿ ಎಂಬ ಕೂಪನ್‌ ಮತ್ತು ಪತ್ರವೊಂದನ್ನು ಕೊರಿಯರ್‌ ಮೂಲಕ ಪಡೆದಿದ್ದಾರೆ. ಈ ಪತ್ರ ಮತ್ತು ಕೂಪನ್‌ನಲ್ಲಿದ್ದ 918017216387 ಹಾಗೂ 09163432157 ಮೊಬೈಲ್‌ ನಂಬರ್‌ ಗೆ ಫೂನಾಯಿಸಿ ವಿಚಾರಿಸಿದಾಗ ನಿಮ್ಮ ಹುಟ್ಟುಹಬ್ಬಕ್ಕೆ 12 ಲಕ್ಷ ರೂ ಬಹುಮಾನ ಗೆದ್ದೀದ್ದೀರಿ, ನಿಮ್ಮ ಮೊಬೈಲ್‌ ಸಂಖ್ಯೆಯಿಂದ ಬಹುಮಾನ ಗೆದ್ದಿದ್ದೀರಿ. ಬಹುಮಾನದಹಣವನ್ನ ಹಾಕುತ್ತೇವೆ. ಪತ್ರದಲ್ಲಿರುವ ಮಾಹಿತಿ ಭರ್ತಿ ಮಾಡಿ 09163432157 ಈ ನಂಬರ್‌ಗೆ ವಾಟ್ಸಪ್‌ ಮಾಡಿ ಎಂದು ತಿಳಿಸಿದ್ದಾರೆ.

ಈ ಹಣ ನಿಮ್ಮ ಕೈ ಸೇರಬೇಕಿದ್ದರೆ ಸ್ಟೇಟ್‌ ಗೌವರ್ನಮೆಂಟ್‌, ಸೆಂಟ್ರಲ್‌ ಗೌವರ್ನಮೆಂಟ್‌ ಟ್ಯಾಕ್ಸ್‌ ತುಂಬಿ ಎನ್‌ಒಸಿ ಪಡೆಯಬೇಕಾಗಿದೆ. ಅದಕ್ಕೆ ತಗಲುವ ಶುಲ್ಕದ ಹಣವನ್ನ ಎಸ್‌ಬಿಐ ಬ್ಯಾಂಕ್‌ ಖಾತೆಯ ರೀಟಾ ರಾಯ್‌ ಬ್ಯಾಂಕ್‌ ಖಾತೆಗೆ ಹಣ ತುಂಬಿಸಲು ವಂಚಕರು ಸೂಚಿಸಿದ್ದಾರೆ. ಅದರಂತೆ ಮೊದಲಿಗೆ ಚೆಕ್‌ ನ ಮೂಲಕ 24 ಸಾವಿರ ರೂ. ಹಣವನ್ನು, ಎರಡನೇ ಹಂತದಲ್ಲಿ 51 ಸಾವಿರ ರೂ. ಹಾಗೂ ಮೂರನೇ ಹಂತದಲ್ಲಿ 1 ಲಕ್ಷದ 2 ಸಾವಿರದ ನಾನೂರು ರೂ. ಹಣ ಚೆಕ್‌ ಮೂಲಕ ಹಾಕಿರುವ ಮಹಿಳೆ ಬರೋಬ್ಬರಿ 1 ಲಕ್ಷದ 73 ಸಾವಿರದ 400 ರೂ. ಕಳೆದುಕೊಂಡಿದ್ದಾರೆ. ಈ ಕುರಿತು ಶಿವಮೊಗ್ಗದ ಸಿಇಎನ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ.