ಒಮನ್‌-ಸ್ಕಾಟ್ಲೆಂಡ್‌ ಏಕದಿನ ಸರಣಿ: 24 ರನ್ನಿಗೆ ಒಮನ್‌ ಅಲೌಟ್‌

ಅಲ್‌ ಅಮೆರತ್‌: ಸ್ಕಾಟ್ಲೆಂಡ್‌ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ  ಕೇವಲ 24 ರನ್ನಿಗೆ ಅಲೌಟಾಗುವ ಮೂಲಕ ಆತಿಥೇಯ ಒಮನ್‌ ಎ-ಲಿಸ್ಟ್‌ ಕ್ರಿಕೆಟಿನಲ್ಲಿ ಅತಿ ಕಡಿಮೆ ರನ್‌ ಗಳಿಸಿದ 4ನೇ ತಂಡವೆನಿಸಿಕೊಂಡಿದೆ. 

3 ಏಕದಿನ ಪಂದ್ಯಗಳ ಸರಣಿಯ ಮೊದಲ ಪಂದ್ಯವನ್ನಾಡಿದ ಒಮನ್‌ 18 ಓವರ್‌ಗಳಾಗುವಷ್ಟರಲ್ಲಿ ತನ್ನೆಲ್ಲ ವಿಕೆಟ್‌ ಕಳೆದು ಕೊಂಡಿದೆ. ಒಮನ್‌ನ 6 ಬ್ಯಾಟ್ಸ್‌ಮನ್‌ಗಳು ಶೂನ್ಯಕ್ಕೆ ಪೆವೆಲಿಯನ್‌ ಸೇರಿದ್ದರು. 3ನೇ ಕ್ರಮಾಂಕದಲ್ಲಿ ಆಡಿದ ಖವಾರ್‌ ಅಲಿ ಒಮನ್‌ನ ಅತಿ ಹೆಚ್ಚು ರನ್‌ ಗಳಿಸಿದ ಆಟಗಾರ (15) ಆಗಿದ್ದಾರೆ. ಸ್ಕಾಟ್ಲೆಂಡ್‌ನ‌ ಆಡ್ರಿಯನ್‌ ನೀಲ್‌ ಮತ್ತು ರೌಯಿಧ್ರಿ ಸ್ಮಿತ್‌ ತಲಾ 4 ವಿಕೆಟ್‌ ಕಿತ್ತರು. 

ಇದಕ್ಕುತ್ತರವಾಗಿ ಸ್ಕಾಟ್ಲೆಂಡ್‌ ಕೇವಲ 4 ಓವರ್‌ಗಳಲ್ಲಿ ಗುರಿ ತಲುಪಿ ಭರ್ಜರಿ ಗೆಲುವು ದಾಖಲಿಸಿದೆ. ಸ್ಕಾಟ್ಲೆಂಡ್‌ 3.2 ಓವರ್‌ ಗಳಲ್ಲಿ ವಿಕೆಟ್‌ ನಷ್ಟವಿಲ್ಲದೆ 26 ಗಳಿಸಿ ಜಯಭೇರಿ ಬಾರಿಸಿದೆ.