6 ವರ್ಷಗಳಲ್ಲಿ 24ಕ್ಕೂ ಹೆಚ್ಚು ಉಗ್ರರು ಭಾರತಕ್ಕೆ ಗಡಿಪಾರು

ಹೊಸದಿಲ್ಲಿ: ಸಂಯುಕ್ತ ಅರಬ್‌ ಗಣರಾಜ್ಯ (ಯುಎಇ), ಸೌದಿ ಅರೇಬಿಯಾ ಜತೆಗೆ ಭಾರತ ಸರಕಾರ ಉತ್ತಮ ರಾಜತಾಂತ್ರಿಕ ಸಂಬಂಧ ಹೊಂದಿದೆ. ಹೀಗಾಗಿಯೇ 2012ರಿಂದ ಈಚೆಗೆ ಲಷ್ಕರ್‌-ಎ- ತೊಯ್ಬಾ, ಇಂಡಿಯನ್‌ ಮುಜಾಹಿದೀನ್‌ ಸೇರಿದಂತೆ ಹಲವು ಉಗ್ರ ಸಂಘಟನೆಗೆ ಸೇರಿದ 24 ಮಂದಿಯನ್ನು ದೇಶಕ್ಕೆ ಗಡಿಪಾರು ಮಾಡಿಸಿಕೊಳ್ಳಲಾಗಿದೆ. ಇದು ರಾಜತಾಂತ್ರಿಕವಾಗಿ ಕೇಂದ್ರ ಸರಕಾರಕ್ಕೆ ಸಿಕ್ಕಿದ ಮಹತ್ವದ ಜಯವಾಗಿದೆ.

ಈ 24 ಮಂದಿಯ ಪೈಕಿ 18 ಮಂದಿ ಸೌದಿ ಅರೇಬಿಯಾ,ಯುಎಇಯಿಂದಲೇ ಗಡಿಪಾರಾಗಿದ್ದಾರೆ. ಈ ಪೈಕಿ ಲಷ್ಕರ್‌, ಇಂಡಿಯನ್‌ ಮುಜಾಹಿದೀನ್‌ ಉಗ್ರರೇ ಹೆಚ್ಚು. ತೀರಾ ಇತ್ತೀಚಿನ ಪ್ರಕರಣವೆಂದರೆ ಲಷ್ಕರ್‌-ಎ-ತೊಯ್ಬಾ ಸಂಘಟನೆ ಜತೆಗೆ ಸಂಪರ್ಕ ಇರಿಸಿಕೊಂಡಿದ್ದಾನೆ ಎಂದು ಹೇಳಲಾಗಿರುವ ಹಬೀಬುರ್‌ ರೆಹಮಾನ್‌ ಎಂಬಾತನನ್ನು ನವದೆಹಲಿ ಏರ್‌ಪೋರ್ಟ್‌ನಲ್ಲಿ ಬಂಧಿಸಲಾಗಿತ್ತು. 2012ರ ಜೂ.5ರಂದು ಅಬು ಜುಂದಾಲ್‌ ಎಂಬ ಉಗ್ರನ ಗಡಿಪಾರಿನಿಂದ ಈ ಪ್ರಕ್ರಿಯೆ ಶುರುವಾಗಿತ್ತು. ಯುಪಿಎ ಮತ್ತು ಹಾಲಿ ಎನ್‌ಡಿಎ ಸರಕಾರದ ಅವಧಿಯಲ್ಲಿ ಈ ಬಗ್ಗೆ ಆದ್ಯತೆಯಿಂದ ಶ್ರಮಿಸಲಾಗಿತ್ತು.

ಕಳೆದ 6 ವರ್ಷಗಳಲ್ಲಿ ಸೌದಿ ಅರೇಬಿಯಾದಿಂದ 8, ಯುಎಇನಿಂದ 10, ಟರ್ಕಿಯಿಂದ 3, ಥಾಯ್ಲೆಂಡ್‌ನಿಂದ 1, ಸುಡಾನ್‌ನಿಂದ 1, ಬಾಂಗ್ಲಾದೇಶದಿಂದ ಒಬ್ಬನನ್ನು ಗಡಿಪಾರು ಮಾಡಲಾಗಿದೆ ಎಂದು “ದ ಹಿಂದುಸ್ತಾನ್‌ ಟೈಮ್ಸ್‌’ ವರದಿ ಮಾಡಿದೆ.