ಹಾಸನ: ಸಂಸದ ಪ್ರಜ್ವಲ್‌ ರೇವಣ್ಣ ಅವರು ಮಹಿಳೆಯರ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ್ದರೆನ್ನಲಾದ ಅಶ್ಲೀಲ ವೀಡಿಯೋಗಳ ಹಂಚಿಕೆ ಪ್ರಕರಣದಲ್ಲಿ ಈಗ ಅರಕಲಗೂಡು ಕ್ಷೇತ್ರದ ಜೆಡಿಎಸ್‌ ಶಾಸಕ ಎ. ಮಂಜು ಅವರ ಹೆಸರು ತಳುಕು ಹಾಕಿಕೊಂಡಿದೆ.
ಪ್ರಕರಣದ ಆರೋಪಿಯಾಗಿರುವ ನವೀನ್‌ ಗೌಡನ ಫೇಸ್‌ಬುಕ್‌ ಖಾತೆಯಿಂದ ರವಿವಾರ ಆಗಿರುವ ಪೋಸ್ಟ್‌ನಲ್ಲಿ ಅಶ್ಲೀಲ ವೀಡಿಯೋ ವೈರಲ್ ಆಗಿರುವುದರ ಹಿಂದೆ ಶಾಸಕ ಎ. ಮಂಜು ಅವರ ಪಾತ್ರವೂ ಇರಬಹುದು ಎಂದು ಹೇಳಲಾಗಿದೆ. ಎಪ್ರಿಲ್‌ 20ರಂದು ರಸ್ತೆಯಲ್ಲಿ ನನಗೆ ಸಿಕ್ಕಿರುವ ಒಂದು ಪೆನ್‌ಡ್ರೈವ್‌ ಅನ್ನು ಎ.21ರಂದು ಅರಕಲಗೂಡಿನ ಮಾರುತಿ ಕಲ್ಯಾಣ ಮಂಟಪದಲ್ಲಿ ಶಾಸಕ ಎ. ಮಂಜು ಅವರಿಗೆ ನಾನು ನೀಡಿದ್ದೇನೆ.
ಎಚ್.ಡಿ.ಕುಮಾರಸ್ವಾಮಿ ಅವರು ಹೇಳಿದ ಹಾಗೆ ವೀಡಿಯೋ ವೈರಲ್ ಹಿಂದೆ ಇರುವ ಮಹಾ ನಾಯಕ ಅರಕಲಗೂಡು ಶಾಸಕರೇ ಆಗಿರಬಹುದು ಎಂದು ನವೀನ್‌ ಗೌಡ ಅವರ ಫೇಸ್‌ಬುಕ್‌ನಲ್ಲಿ ಪೋಸ್ಟ್‌ ಮಾಡಲಾಗಿದೆ. ಇದು ಮತ್ತೂಂದು ವಿವಾದಕ್ಕೆಡೆ ಮಾಡಿದೆ.
ನವೀನ್‌ ಗೌಡ ಯಾರೆಂದು
ನನಗೆ ಗೊತ್ತೇ ಇಲ್ಲ: ಮಂಜು
ನವೀನ್‌ ಗೌಡ ಯಾರು ಅಂತಾ ನನಗೆ ಗೊತ್ತೇ ಇಲ್ಲ. ಎ.21ರಂದು ಹತ್ತಾರು ಮದುವೆ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದೇನೆ. ಅಲ್ಲಿ ನೂರಾರು ಜನರನ್ನು ಮಾತನಾಡಿಸಿದ್ದೇನೆ. ಅವರಲ್ಲಿ ಈ ವ್ಯಕ್ತಿ ಯಾರು ಎಂಬುದೇ ತಿಳಿದಿಲ್ಲ ಎಂದು ಅರಕಲಗೂಡು ಶಾಸಕ ಎ.ಮಂಜು ಸ್ಪಷ್ಟಪಡಿಸಿದರು.
ಮಐಸೂರಿನಲ್ಲಿ ತುರ್ತು ಸುದ್ದಿಗೋಷ್ಠಿ ನಡೆಸಿದ ಅವರು, ನವೀನ್‌ ಗೌಡ ಹೆಸರನ್ನು ಇವತ್ತಿನವರೆಗೂ ನಾನು ಕೇಳಿಯೇ ಇಲ್ಲ. ಆತನನ್ನೂ ನೋಡಿಯೂ ಇಲ್ಲ. ಇನ್ನೂ ಪೆನ್‌ಡ್ರೈವ್‌ ಪಡೆಯುವುದು ಎಲ್ಲಿ ಬಂತು. ಆತನ ಹಿಂದೆ ಯಾರೋ ಮಹಾನುಭಾವರು ಇರಲೇ ಬೇಕು. ನಮ್ಮ ಮತ್ತು ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರ ನಡುವಿನ ಸಂಬಂಧ ಹಾಳು ಮಾಡಲು ಈ ರೀತಿ ಮಾಡಲಾಗುತ್ತಿದೆ. ನವೀನ್‌ ಗೌಡನ ವಿರುದ್ಧ ಅರಕಲಗೂಡು ಠಾಣೆಯಲ್ಲಿ ಸೋಮವಾರ ದೂರು ದಾಖಲಿಸುತ್ತೇನೆ. ಆತನ ವಿರುದ್ಧ ಮಾನನಷ್ಟ ಮೊಕದ್ದ‌ಮೆ ಕೂಡ ಹೂಡುತ್ತೇನೆ ಎಂದರು.
