ಅರ್ಹತಾ ತಂಡದೊಂದಿಗೆ ಭಾರತದ ಅಭಿಯಾನ

ದುಬಾೖ: ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕೌನ್ಸಿಲ್‌ ಮಂಗಳವಾರ ಪುನಾರಚನೆಗೊಂಡ 2022ರ ವನಿತಾ ಏಕದಿನ ವಿಶ್ವಕಪ್‌ ಕೂಟದ 31 ಪಂದ್ಯಗಳ ವೇಳಾಪಟ್ಟಿಯನ್ನು ಪ್ರಕಟಿಸಿದ್ದು ಭಾರತವು ಮಾ. 6ರಂದು ನಡೆಯುವ ಪಂದ್ಯದಲ್ಲಿ ಅರ್ಹತಾ ತಂಡವನ್ನು ಎದುರಿಸುವ ಮೂಲಕ ತನ್ನ ಅಭಿಯಾನ ಆರಂಭಿಸಲಿದೆ.

ನ್ಯೂಜಿಲ್ಯಾಂಡಿನ ತೌರಂಗ ಬೇ ಓವಲ್‌ನಲ್ಲಿ ಈ ಪಂದ್ಯ ನಡೆಯಲಿದೆ. ಎಂಟು ತಂಡಗಳ ರೌಂಡ್‌ ರಾಬಿನ್‌ ಮಾದರಿಯ ಈ ಕೂಟದ ಇನ್ನೆರಡು ಪಂದ್ಯಗಳಲ್ಲಿಯೂ ಭಾರತವು ಅರ್ಹತಾ ತಂಡಗಳನ್ನೇ ಎದರಿಸಲಿದೆ. ಈ ಎರಡು ಪಂದ್ಯಗಳು ಸೆಡ್ಡನ್‌ ಪಾರ್ಕ್‌ ಮತ್ತು ಹ್ಯಾಮಿಲ್ಟನ್‌ನಲ್ಲಿ ನಡೆಯಲಿದೆ.

ಪ್ರಮುಖ ಪಂದ್ಯಗಳಲ್ಲಿ ತೌರಂಗದಲ್ಲಿ ಮಾ. 16ರಂದು ನಡೆಯುವ ಪಂದ್ಯದಲ್ಲಿ ಭಾರತವು ಇಂಗ್ಲೆಂಡ್‌ ತಂಡವನ್ನು ಎದುರಿಸಲಿದೆ. ಇದು ಲಾರ್ಡ್ಸ್‌ನಲ್ಲಿ 2017ರ ವನಿತಾ ವಿಶ್ವಕಪ್‌ ಫೈನಲ್‌ನ ಪುನರಾವರ್ತಿತ ಪಂದ್ಯವಾಗಲಿದೆ. ಭಾರತ ಇನ್ನೆರಡು ಪಂದ್ಯಗಳಲ್ಲಿ ಆಸ್ಟ್ರೇಲಿಯವನ್ನು ಮಾ. 19 (ಈಡನ್‌ ಪಾರ್ಕ್‌) ಮತ್ತು ದಕ್ಷಿಣ ಆಫ್ರಿಕಾವನ್ನು ಮಾ. 27 (ಕ್ರೈಸ್ಟ್‌ಚರ್ಚ್‌) ರಂದು ಎದುರಿಸಲಿದೆ.

ಈ ವಿಶ್ವಕಪ್‌ ಕ್ರಿಕೆಟ್‌ 2021ರ ಫೆಬ್ರವರಿ-ಮಾರ್ಚ್‌ ನಲ್ಲಿ ನಡೆಯಬೇಕಿತ್ತು. ಆದರೆ ಕೋವಿಡ್‌-19ನಿಂದಾಗಿ ಮುಂದೂಡಲ್ಪಟ್ಟ ಈ ಕೂಟ 2022ರ ಮಾ. 4ರಿಂದ ಎ. 3ರ ವರೆಗೆ ನಡೆಯಲಿದ್ದು ಮಾ. 30 ಮತ್ತು 31ರಂದು 2 ಸೆಮಿ ಫೈನಲ್ಸ್‌ ಹಾಗೂ ಎ. 3ರಂದು ಫೈನಲ್‌ ಪಂದ್ಯ ನಡೆಯಲಿದೆ.

ಎಂಟು ತಂಡಗಳು
ಕಳೆದ ಮಾರ್ಚ್‌ನಲ್ಲಿ ಆಸ್ಟ್ರೇಲಿಯದಲ್ಲಿ ನಡೆದ ಟಿ20 ವಿಶ್ವಕಪ್‌ ಬಳಿಕ ವನಿತಾ ಏಕದಿನ ವಿಶ್ವಕಪ್‌ ಜಾಗತಿಕ ಮಟ್ಟದಲ್ಲಿ ನಡೆಯಲಿರುವ ಬೃಹತ್‌ ಕೂಟವಾಗಿದೆ. ಈ ಕೂಟದಲ್ಲಿ ಬಲಿಷ್ಠ ಎಂಟು ತಂಡಗಳು ಭಾಗವಹಿಸಲಿದ್ದು ರೌಂಡ್‌ ರಾಬಿನ್‌ ಮಾದರಿಯಲ್ಲಿ ಪಂದ್ಯಗಳು ನಡೆಯಲಿವೆ. ಪಂದ್ಯಗಳು ಆಕ್ಲಂಡ್‌, ತೌರಂಗ, ಹ್ಯಾಮಿಲ್ಟನ್‌, ವೆಲ್ಲಿಂಗ್ಟನ್‌, ಕ್ರೈಸ್ಟ್‌ಚರ್ಚ್‌ ಮತ್ತು ಡುನೆಡಿನ್‌ನಲ್ಲಿ ನಡೆಯಲಿವೆ.

ಭಾರತವಲ್ಲದೇ ನ್ಯೂಜಿಲ್ಯಾಂಡ್‌, ಆಸ್ಟ್ರೇಲಿಯ, ಇಂಗ್ಲೆಂಡ್‌ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳು ವಿಶ್ವಕಪ್‌ಗೆ ಅರ್ಹತೆ ಗಳಿಸಿವೆ. ಇನ್ನುಳಿದ ಮೂರು ತಂಡಗಳು ಐಸಿಸಿ ಅರ್ಹತಾ ಕೂಟದಿಂದ ಆಯ್ಕೆಯಾಗಲಿವೆ. ಅರ್ಹತಾ ಕೂಟವು ಮುಂದಿನ ವರ್ಷದ ಜೂ. 26ರಿಂದ ಜುಲೈ 10ರ ವರೆಗೆ ಶ್ರೀಲಂಕಾದಲ್ಲಿ ನಡೆಯಲಿದೆ.

ಬಹುಮಾನ ನಿಧಿ
ಈ ಕೂಟವು 5.5 ಮಿಲಿಯನ್‌ ನ್ಯೂಜಿಲ್ಯಾಂಡ್‌ ಡಾಲರ್‌ ಬಹುಮಾನ ನಿಧಿಯನ್ನು ಒಳಗೊಂಡಿದೆ. ಇದು 2017ರ ವಿಶ್ವಕಪ್‌ಗಿಂತ ಶೇ. 70ರಷ್ಟು ಮತ್ತು 2013ರ ವಿಶ್ವಕಪ್‌ಗಿಂತ ಶೇ. ನೂರರಷ್ಟು ಹೆಚ್ಚಾಗಿದೆ. ಎಲ್ಲ ಪಂದ್ಯಗಳನ್ನು ಸ್ಟಾರ್‌ ಇಂಡಿಯಾ ನೇರ ಪ್ರಸಾರ ಮಾಡಲಿದೆ.