ಪಾಕ್‌ನಲ್ಲಿ 1.81 ಲಕ್ಷ ದಾಟಿದ ಸೋಂಕಿತರ ಸಂಖ್ಯೆ

ಇಸ್ಲಾಮಾಬಾದ್‌: ಪಾಕಿಸ್ಥಾನದಲ್ಲಿ ಕೇವಲ ಅರ್ಧ ದಿನದಲ್ಲಿ ಅಂದರೆ ಸೋಮವಾರ ಮಧ್ಯಾಹ್ನ ವೇಳೆಗೆ 4,471 ಕೋವಿಡ್ ವೈರಸ್‌ ಪ್ರಕರಣಗಳು ಪತ್ತೆಯಾಗಿವೆ. ಇದೇ ವೇಳೆ 89 ಮಂದಿ ಮೃತಪಟ್ಟಿದ್ದಾರೆ. ಫೆಬ್ರವರಿ 15ರಂದು ಪಾಕ್‌ನಲ್ಲಿ ಮೊದಲ ಪ್ರಕರಣ ಕಂಡುಬಂದಿದ್ದು, ಎಪ್ರಿಲ್‌ 8ರ ವರೆಗೆ ಪ್ರತಿದಿನ ಒಂದೊಂದೇ ಪ್ರಕರಣಗಳು ಏರಿಕೆಯಾಗುತ್ತಿದ್ದವು. ಆದರೆ ಎಪ್ರಿಲ್‌ 9ರ ಬಳಿಕ ಬಹಳ ವ್ಯಾಪಕವಾಗಿ ಕೋವಿಡ್ ವೈರಸ್‌ ಹರಡಲಾರಂಭಿಸಿದ್ದು, ಪ್ರತಿದಿನ ಹೊಸ ಪ್ರಕರಣಗಳ ಪಟ್ಟಿ ಬೆಳೆಯುತ್ತಲೇ ಹೋಗಿದೆ. ಜೂ. 14ರಂದು 6,825 ಪ್ರಕರಣಗಳು ಪತ್ತೆಯಾಗಿದ್ದು, ಇದು ಈ ವರೆಗಿನ ದಾಖಲೆಯ ಒಂದು ದಿನದ ಅತೀ ಹೆಚ್ಚು ಕೋವಿಡ್ ವೈರಸ್‌ ಪ್ರಕರಣಗಳಾಗಿವೆ. ಪಾಕ್‌ನಲ್ಲಿ ಜೂ. 21ರಂದು 4,951 ಕೋವಿಡ್ ವೈರಸ್‌ ಕೇಸುಗಳು ದಾಖಲಾಗಿದ್ದು, 119 ಮಂದಿ ಮೃತಪಟ್ಟಿದ್ದಾರೆ.

ದೇಶದಲ್ಲಿ ಈ ವರೆಗೆ ಒಟ್ಟು 1,81,088 ಕೋವಿಡ್ ವೈರಸ್‌ ಪ್ರಕರಣಗಳು ಪತ್ತೆಯಾಗಿದ್ದು, 3,590 ಮಂದಿ ಮೃತಪಟ್ಟಿದ್ದಾರೆ. 71,458 ಮಂದಿ ಗುಣಮುಖರಾಗಿದ್ದಾರೆ. 1,06,040 ಮಂದಿ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಅಲ್ಲಿನ ಆರೋಗ್ಯ ಅಧಿಕಾರಿಗಳು ತಿಳಿಸಿದ್ದಾರೆ.