8,793 ಕೋಟಿ ರೂ. ಸಾಲ: ಏರಿಂಡಿಯಾಗೆ ನೋಟಿಸ್‌

ಹೊಸದಿಲ್ಲಿ: ಏರ್‌ ಇಂಡಿಯಾಕ್ಕೆ ಸಾಲ ನೀಡಿದ್ದ ಬ್ರಿಟನ್‌ ಮೂಲದ ಕೇರ್ನ್ ಎನರ್ಜಿ ಸಂಸ್ಥೆಯು ಕೇಂದ್ರ ಸರಕಾರಿ ಸ್ವಾಮ್ಯದ “ಏರ್‌ ಇಂಡಿಯಾ’ ವಿಮಾನ ಸೇವಾ ಸಂಸ್ಥೆಗೆ ನೋಟಿಸ್‌ ಜಾರಿಗೊಳಿಸಿ, ತನಗೆ ನೀಡಬೇಕಿದ್ದ 8,793 ಕೋಟಿ ರೂ.ಗಳನ್ನು ಬಡ್ಡಿ ಸಹಿತ ಹಿಂದಿರುಗಿಸಬೇಕೆಂದು ಸೂಚಿಸಿದೆ. ಇಲ್ಲದಿದ್ದರೆ, ಆ ಕಂಪೆನಿಯು ಏರಿಂಡಿಯಾದ ಆಸ್ತಿ ಮುಟ್ಟುಗೋಲು ಹಾಕಿಕೊಳ್ಳುವ ಸಾಧ್ಯತೆಯಿದೆ.

ತೀವ್ರ ನಷ್ಟದಲ್ಲಿರುವ ಏರ್‌ ಇಂಡಿಯಾಕ್ಕೆ ಪುನಶ್ಚೇತನ ತುಂಬುವ ನಿಟ್ಟಿನಲ್ಲಿ ಕೇಂದ್ರ ಸರಕಾರ‌ ಹಾಗೂ ಕೇರ್ನ್ ಎನರ್ಜಿ ಸಂಸ್ಥೆಯು ಏರ್‌ ಇಂಡಿಯಾದಲ್ಲಿ ಹೂಡಿಕೆ ಮಾಡುವ ಒಪ್ಪಂದಕ್ಕೆ ಸಹಿ ಹಾಕಿತ್ತು. ಆದರೆ, ಕೊರೊನಾ ಲಾಕ್‌ಡೌನ್‌ನಿಂದಾಗಿ ಏರ್‌ ಇಂಡಿಯಾಕ್ಕೆ ಕೇರ್ನ್ ಸಂಸ್ಥೆಯ ಸಾಲದ ಒಪ್ಪಂದವನ್ನು ಮುನ್ನಡೆಸಲು ಸಾಧ್ಯವಾಗಿರಲಿಲ್ಲ. ಹಾಗಾಗಿ, ಅದು ನ್ಯೂಯಾರ್ಕ್‌ನ ಸದರನ್‌ ಡಿಸ್ಟ್ರಿಕ್ಟ್ ನ್ಯಾಯಾಲಯದ ಮೊರೆ ಹೋಗಿದ್ದು, ಕಳೆದ ಡಿಸೆಂಬರ್‌ನಲ್ಲಿ ನ್ಯಾಯಾ ಲಯವು ಸಾಲವನ್ನು ಬಡ್ಡಿ ಸಮೇತ ವಸೂಲಿ ಮಾಡುವಂತೆ ಕೇರ್ನ್ ಸಂಸ್ಥೆಗೆ ಸೂಚನೆ ನೀಡಿದೆ. ಈ ಹಿನ್ನೆಲೆಯಲ್ಲಿ ಕೇಂದ್ರಕ್ಕೆ ನೋಟಿಸ್‌ ಜಾರಿಯಾಗಿದೆ.