ಜನಪ್ರಿಯವಲ್ಲ; ಸ್ಮಾರ್ಟ್‌ ಬಜೆಟ್‌

ಕೇಂದ್ರ ಹಣಕಾಸು ಸಚಿವ ಅರುಣ್‌ ಜೇಟ್ಲಿ ಅವರು ಮಂಡಿಸಿದ ಬಜೆಟ್‌ “ಜನಪ್ರಿಯ ಬಜೆಟ್‌’ ಎಂದು ನನಗೆ ಅನಿಸುತ್ತಿಲ್ಲ. ಯಾಕೆಂದರೆ, ಇದೇನೂ ಕೇಂದ್ರ ಸರ್ಕಾರದ ಕೊನೆಯ ಬಜೆಟ್‌ ಅಲ್ಲ. ಇನ್ನೂ ಒಂದು ವರ್ಷ ಬಾಕಿ ಇರುವುದರಿಂದ, ಅದರ ಅವಶ್ಯಕತೆಯೂ ಇಲ್ಲ. ಬದಲಿಗೆ ಇದೊಂದು ಸ್ಮಾರ್ಟ್‌ ಬಜೆಟ್‌ ಎಂದು ಹೇಳಬಹುದು.    

ಇದೇ ಕಾರಣಕ್ಕೆ ಬಜೆಟ್‌ನಲ್ಲಿ ಜನಪ್ರಿಯ ಘೋಷಣೆಗಳು ಕಾಣಿಸದಿರಬಹುದು. ಆದರೆ, ಮತಗಟ್ಟೆಗಳಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ಬರುವ ಮಧ್ಯಮ ಮತ್ತು ರೈತಾಪಿ ವರ್ಗಕ್ಕೆ ಒತ್ತು ನೀಡಿರುವುದರ ಹಿಂದೆ ಮತದಾರರನ್ನು ಸೆಳೆಯುವ ತಂತ್ರವನ್ನು ಕಾಣಬಹುದು. ಈ ನಿಟ್ಟಿನಲ್ಲಿ ಸಚಿವರು “ಗುಡ್‌ ಲಿವಿಂಗ್‌’ ಮತ್ತು “ಗುಡ್‌ ಲೈಫ್ಸ್ಟೈಲ್‌’ನ ಮಂತ್ರ ಪಠಿಸುತ್ತಾರೆ. 

ಹೀಗಾಗಿಯೇ ಹಣಕಾಸು ಸಚಿವರು ಆರೋಗ್ಯ ಕ್ಷೇತ್ರಕ್ಕೆ 1,200 ಕೋಟಿ ರೂ. ಘೋಷಿಸಿದ್ದು, ದೇಶದ ಹತ್ತು ಕೋಟಿ ಕುಟುಂಬಗಳಿಗೆ ಐದು ಲಕ್ಷ ರೂ.ವರೆಗೆ ಆರೋಗ್ಯ ವಿಮೆ ಘೋಷಣೆ ಮಾಡಿದ್ದಾರೆ. 50 ಕೋಟಿ ಜನ ಇದರ ಫ‌ಲಾನುಭವಿಗಳಾಗಲಿದ್ದಾರೆ. ಅಂದರೆ, ಹೆಚ್ಚು-ಕಡಿಮೆ ಅರ್ಧಕ್ಕರ್ಧ ದೇಶದ ಜನ ಈ ವಿಮೆ ವ್ಯಾಪ್ತಿಗೊಳಪಡಲಿದ್ದಾರೆ. ಇದು ಜನರಿಗೆ ಆರೋಗ್ಯ ಭದ್ರತೆ ಒದಗಿಸಬಹುದು. 

ಆದರೆ, ಮತ್ತೂಂದೆಡೆ ಅನಗತ್ಯ ಚಿಕಿತ್ಸೆಗಳಿಗೂ ಕಾರಣವಾಗಲಿದೆ. ಹಾಗಾಗಿ, 5 ಲಕ್ಷ ರೂ.ವರೆಗೆ ಆರೋಗ್ಯ ವಿಮೆ ಒದಗಿಸುವುದಕ್ಕಿಂತ ಸರ್ಕಾರಿ ಆಸ್ಪತ್ರೆಗಳನ್ನು ಮೇಲ್ದರ್ಜೆಗೇರಿಸಿ, ಜನರಿಗೆ ಗುಣಮಟ್ಟದ ಚಿಕಿತ್ಸೆ ಕಲ್ಪಿಸುವಲ್ಲಿ ಸರ್ಕಾರ ಒತ್ತುಕೊಡಬಹುದಿತ್ತು. ಆದರೆ, ಇಲ್ಲಿ ಕಡಿಮೆ ಅವಧಿಯಲ್ಲಿ ಹೆಚ್ಚು ಜನಪ್ರಿಯತೆ ತಂದುಕೊಡುವ ಯೋಜನೆ ಕಡೆಗೆ ಸರ್ಕಾರ ಆಸಕ್ತಿ ತೋರಿದಂತಿದೆ. 

ಮತ್ತೂಂದೆಡೆ ಹಸಿರು, ಬಿಳಿ ಮತ್ತು ನೀಲಿ ಕ್ರಾಂತಿಯ ಬಗ್ಗೆ ಉಲ್ಲೇಖೀಸಿರುವುದು ಗಮನಿಸಬೇಕಾದ ಅಂಶ. “ಆಪರೇಷನ್‌ ಗ್ರೀನ್ಸ್‌’ ಮೂಲಕ ತೋಟಗಾರಿಕೆ ಬೆಳೆಗಳ ಬೆಲೆ ಕುಸಿದಾಗ ನೆರವಾಗಲು 500 ಕೋಟಿ ರೂ. ಮೀಸಲಿಡಲಾಗಿದೆ. ಮೀನುಗಾರಿಕೆ ಮತ್ತು ಪಶು ಸಂಗೋಪನಾ ಕ್ಷೇತ್ರದಲ್ಲಿ 10 ಸಾವಿರ ಕೋಟಿ ವೆಚ್ಚದ ಎರಡು ನೂತನ ನಿಧಿ ಸ್ಥಾಪನೆ ಮಾಡುವುದಾಗಿ ಘೋಷಿಸಲಾಗಿದೆ. 

ಇದಲ್ಲದೆ, ರೈತರ ಆದಾಯ ದ್ವಿಗುಣಗೊಳಿಸುವ ನಿಟ್ಟಿನಲ್ಲಿ ಮುಂಗಾರು ಬೆಳೆಗಳಿಗೆ ಉತ್ಪಾದನಾ ವೆಚ್ಚಕ್ಕಿಂತ ಒಂದೂವರೆಪಟ್ಟು ಹೆಚ್ಚು ಕನಿಷ್ಠ ಬೆಂಬಲ ಬೆಲೆ ಘೋಷಿಸಲಾಗಿದೆ. ಇದು ಉತ್ತಮ ಬೆಳವಣಿಗೆಯಾಗಿದ್ದು, ರೈತರ ಆರ್ಥಿಕ ವೃದ್ಧಿಗೆ ಈ ನಿರ್ಧಾರ ಸಹಕಾರಿಯಾಗಲಿದೆ. ಇದೆಲ್ಲವೂ ಮುಂದಿನ ದಿನಗಳಲ್ಲಿ ಸರ್ಕಾರಕ್ಕೆ ಹೆಚ್ಚು ಜನಪ್ರಿಯತೆ ತಂದುಕೊಡುವುದರಲ್ಲಿ ಎರಡು ಮಾತಿಲ್ಲ. 

ಇಷ್ಟೇ ಅಲ್ಲ, ಕಳೆದ ವರ್ಷ ನೋಟು ನಿಷೇಧದಿಂದ ಸಂಕಷ್ಟಕ್ಕೆ ಸಿಲುಕಿದ್ದ ಸೂಕ್ಷ್ಮ, ಸಣ್ಣ ಹಾಗೂ ಮಧ್ಯಮ ಉದ್ಯಮಗಳ ಉತ್ತೇಜನಕ್ಕೂ ಒತ್ತುನೀಡಲಾಗಿದ್ದು, 2015-16ರಲ್ಲಿ 50 ಕೋಟಿ ರೂ.ಗಿಂತ ಕಡಿಮೆ ವಹಿವಾಟು ನಡೆಸಿರುವ ಕಂಪೆನಿಗಳಿಗೆ ನೀಡುತ್ತಿದ್ದ ಶೇ. 25ರಷ್ಟು ಕಡಿಮೆಗೊಳಿಸಿದ ಬಡ್ಡಿ ದರವನ್ನು 250 ಕೋಟಿ ರೂ. ವಹಿವಾಟು ನಡೆಸಿರುವ ಕಂಪನಿಗಳಿಗೆ ವಿಸ್ತರಿಸಲಾಗುತ್ತಿದೆ.

ಪ್ರಸ್ತುತ ಇರುವ ಸಾರಿಗೆ ಭತ್ಯೆ ವಿನಾಯಿತಿ ಮತ್ತು ಇತರೆ ವೈದ್ಯಕೀಯ ವೆಚ್ಚವನ್ನು ತುಂಬಿಕೊಡುವ ಬದಲು 40 ಸಾವಿರ ರೂ. ಕಡಿತಗೊಳಿಸಲು ನಿರ್ಧರಿಸಲಾಗಿದೆ. ಇದರಿಂದ 2.5 ಕೋಟಿ ವೇತನ ಪಡೆಯುತ್ತಿರುವ ನೌಕರರು ಹಾಗೂ ಪಿಂಚಣಿದಾರರಿಗೆ ಲಾಭವಾಗಲಿದೆ. ಒಟ್ಟಾರೆಯಾಗಿ ಈ ಸ್ಮಾರ್ಟ್‌ ಬಜೆಟ್‌ನಲ್ಲಿ ಒಂದು ಕೈಯಿಂದ ಕೊಟ್ಟು, ಮತ್ತೂಂದು ಕೈಯಿಂದ ಕಿತ್ತುಕೊಳ್ಳಲಾಗಿದೆ.  

* ಡಾ.ಆರ್‌.ಎಸ್‌. ದೇಶಪಾಂಡೆ, ಡಾ.ಬಿ.ಆರ್‌.ಅಂಬೇಡ್ಕರ್‌ ಸ್ಕೂಲ್‌ ಆಫ್ ಎಕನಾಮಿಕ್ಸ್‌ ನಿರ್ದೇಶಕ