ವಿಶ್ವವಿಜ್ಞಾನದ ತ್ರಿಮೂರ್ತಿಗಳಿಗೆ ಭೌತ ನೊಬೆಲ್‌

ಸ್ಟಾಕ್‌ಹೋಂ: ಬ್ರಹ್ಮಾಂಡದಲ್ಲಿ ಭೂಮಿಯ ಅಸ್ತಿತ್ವದ ಕುರಿತು ಹೆಚ್ಚಿನ ಮಾಹಿತಿ ಒದಗಿಸುವಲ್ಲಿ ಕೊಡುಗೆ ನೀಡಿರುವ ವಿಶ್ವವಿಜ್ಞಾನದ ತ್ರಿಮೂರ್ತಿಗಳಿಗೆ ಪ್ರಸಕ್ತ ಸಾಲಿನ ಭೌತ ನೊಬೆಲ್‌ ಸಂದಿದೆ.

ಕೆನಡಾ-ಅಮೆರಿಕನ್‌ ಕಾಸ್ಮಾಲಜಿಸ್ಟ್‌ ಜೇಮ್ಸ್‌ ಪೀಬಲ್ಸ್‌ ಮತ್ತು ಸ್ವಿಸ್‌ ಖಗೋಳ ವಿಜ್ಞಾನಿಗಳಾದ ಮೈಕಲ್‌ ಮೇಯರ್‌ ಮತ್ತು ಡಿಡಿಯೆರ್‌ ಕ್ವೆಲೊಸ್‌ ಅವರು ಭೌತಶಾಸ್ತ್ರದ ನೊಬೆಲ್‌ ಪ್ರಶಸ್ತಿಯನ್ನು ಹಂಚಿಕೊಂಡಿದ್ದಾರೆ.

ಬಿಗ್‌ ಬ್ಯಾಂಗ್‌(ಮಹಾಸ್ಫೋಟ) ಬಳಿಕ ಬ್ರಹ್ಮಾಂಡವು ಹೇಗೆ ರೂಪುಗೊಂಡಿತು ಎಂಬುದನ್ನು ಅರ್ಥಮಾಡಿಸಿಕೊಡುವಂಥ ಸಂಶೋಧನೆ ಗಾಗಿ ಪೀಬಲ್ಸ್‌ ಅವರಿಗೆ ಈ ಪ್ರಶಸ್ತಿ ಸಂದಿದೆ.

ಇನ್ನು ಮೇಯರ್‌ ಹಾಗೂ ಕ್ವೆಲೊಸ್‌ ಅವರಿಗೆ ಸೌರವ್ಯವಸ್ಥೆಯ ಹೊರಗೆ ಇರುವಂಥ ಗೃಹ (ಎಕ್ಸೋಪ್ಲಾನೆಟ್‌)ವೊಂದನ್ನು ಆವಿಷ್ಕರಿ ಸಿದ್ದಕ್ಕಾಗಿ ಈ ಪ್ರತಿಷ್ಠಿತ ಪ್ರಶಸ್ತಿ ನೀಡಲು ನಿರ್ಧರಿಸಲಾಗಿದೆ. ಇವರ ಆವಿಷ್ಕಾರಗಳು ವಿಶ್ವದ ಕುರಿತ ನಮ್ಮ ಪರಿಕಲ್ಪನೆಗಳನ್ನೇ ಬದಲಾಯಿಸಿದವು ಎಂದು ಜೂರಿ ಹೇಳಿದೆ.

ಭೌತ ನೊಬೆಲ್‌ ಪ್ರಶಸ್ತಿಯು ಚಿನ್ನದ ಪದಕ, ಡಿಪ್ಲೊಮಾ ಮತ್ತು 9.14 ಲಕ್ಷ ಡಾಲರ್‌(6.50 ಕೋಟಿ ರೂ.) ನಗದು ಪುರಸ್ಕಾರವನ್ನು ಒಳಗೊಂಡಿದೆ.

ಡಿ. 10ರಂದು ಪ್ರದಾನ
ಡಿ. 10ರಂದು ಸ್ಟಾಕ್‌ಹೋಂನಲ್ಲಿ ನಡೆಯುವ ಸಮಾರಂಭದಲ್ಲಿ ನೊಬೆಲ್‌ ಪ್ರದಾನ ಮಾಡಲಾಗುತ್ತದೆ.

ಮೂವರಿಗೆ ವೈದ್ಯ ನೊಬೆಲ್‌
ಕೋಶಗಳು ಹೇಗೆ ಆಮ್ಲಜನಕದ ಲಭ್ಯತೆಯನ್ನು ಗ್ರಹಿಸಿ, ಅದನ್ನು ಅಳವಡಿಸಿಕೊಳ್ಳುತ್ತವೆ ಎಂಬುದರ ಬಗ್ಗೆ ಸಂಶೋಧನೆ ನಡೆಸಿದ ವಿಜ್ಞಾನಿಗಳಾದ ವಿಲಿಯಂ ಜೆ. ಕೇಲಿನ್‌ ಜೂನಿಯರ್‌, ಪೀಟರ್‌ ಜೆ. ರ್ಯಾಟ್‌ಕ್ಲಿಫ್ ಮತ್ತು ಗ್ರೆಗ್‌ ಎಲ್‌. ಸೆಮೆನಾl ಅವರು ಈ ಬಾರಿಯ ವೈದ್ಯ ನೊಬೆಲ್‌ ಅನ್ನು ಹಂಚಿಕೊಂಡಿದ್ದಾರೆ.

ಆಮ್ಲಜನಕದ ಮಟ್ಟದಲ್ಲಿ ಆಗುವ ಬದಲಾವಣೆಗಳಿಗೂ ಕೋಶಗಳು ಸ್ಪಂದಿಸುವಂತೆ ಮಾಡುವ ಆನುವಂಶಿಕ ಮೆಕ್ಯಾನಿಸಂ ಕುರಿತು ಈ ಮೂವರು ಅಧ್ಯಯನ ನಡೆಸಿದ್ದಾರೆ. ಇವರ ಸಂಶೋಧನೆಯಿಂದಾಗಿ ಕ್ಯಾನ್ಸರ್‌, ಅನೀಮಿಯಾ, ಹೃದಯಾಘಾತ ಮತ್ತು ಪಾರ್ಶ್ವವಾಯುವಿನಂಥ ಅನೇಕ ಕಾಯಿಲೆಗಳಿಗೆ ಚಿಕಿತ್ಸೆ ನೀಡಲು ಸಾಧ್ಯವಾಗಲಿದೆ ಎಂದು ತೀರ್ಪುಗಾರರ ತಂಡ ಅಭಿಪ್ರಾಯಪಟ್ಟಿದೆ.