ವರ್ಷದ ಏಕದಿನ ಕ್ರಿಕೆಟಿಗೆ: ಭಾರತೀಯರಿಗೆ ಸ್ಥಾನವಿಲ್ಲ

ದುಬೈ: ಐಸಿಸಿ 2021ನೇ ಋತುವಿನ ಏಕದಿನ ಕ್ರಿಕೆಟಿಗರ ನಾಮನಿರ್ದೇಶಿತರ ಪಟ್ಟಿ ಪ್ರಕಟಗೊಂಡಿದೆ. ಅಂತಿಮಪಟ್ಟಿಯಲ್ಲಿ ನಾಲ್ವರು ಆಟಗಾರರಿದ್ದಾರೆ. ಆದರೆ ಇದರಲ್ಲಿ ಭಾರತದವರ್ಯಾರೂ ಸ್ಥಾನ ಪಡೆಯದಿರುವುದು ಅಚ್ಚರಿಯಾಗಿದೆ. ಪಾಕಿಸ್ತಾನ ತಂಡದ ನಾಯಕ ಬಾಬರ್‌ ಆಜಂ, ಬಾಂಗ್ಲಾದೇಶದ ಆಲ್‌ರೌಂಡರ್‌ ಶಕಿಬ್‌ ಅಲ್‌ ಹಸನ್‌, ದಕ್ಷಿಣ ಆಫ್ರಿಕಾದ ಜಾನೆಮನ್‌ ಮಲಾನ್‌ ಮತ್ತು ಐರ್ಲೆಂಡ್‌ನ‌ ಪಾಲ್‌ ಸ್ಟರ್ಲಿಂಗ್‌ ಅವರನ್ನು ಆಯ್ಕೆ ಮಾಡಲಾಗಿದೆ.

ಶಕಿಬ್‌ ಅಲ್‌ ಹಸನ್‌ ಈ ವರ್ಷ 9 ಏಕದಿನ ಪಂದ್ಯಗಳಲ್ಲಿ 40ರ ಸರಾಸರಿಯಲ್ಲಿ 277 ರನ್‌ ಗಳಿಸಿದ್ದಾರೆ. ಜತೆಗೆ 17 ವಿಕೆಟ್‌ ಕೂಡ ಕೆಡವಿದ್ದಾರೆ. ಬಾಬರ್‌ ಆಜಂ ಕೇವಲ 6 ಏಕದಿನ ಪಂದ್ಯಗಳನ್ನು ಆಡಿದ್ದು, 68ರ ಸರಾಸರಿಯಲ್ಲಿ 405 ರನ್‌ ಗಳಿಸಿದ್ದಾರೆ.

ಇದರಲ್ಲಿ 2 ಶತಕ ಕೂಡ ಸೇರಿದೆ. ಮಲಾನ್‌ 8 ಪಂದ್ಯಗಳಲ್ಲಿ 85ರ ಸರಾಸರಿಯಲ್ಲಿ 509 ರನ್‌ ಗಳಿಸಿದ್ದಾರೆ. ಈ ಭರ್ಜರಿ ಆಟದ ವೇಳೆ ಮಲಾನ್‌ 2 ಶತಕ ಮತ್ತು 2 ಅರ್ಧಶತಕ ಬಾರಿಸಿದ್ದಾರೆ. ಐರ್ಲೆಂಡ್‌ನ‌ ಹಿರಿಯ ಆಟಗಾರ ಸ್ಟರ್ಲಿಂಗ್‌ 14 ಪಂದ್ಯಗಳಲ್ಲಿ 705 ರನ್‌ ಗಳಿಸಿದ್ದಾರೆ. ಸಿಡಿಸಿದ್ದು 3 ಶತಕ ಹಾಗೂ 2 ಅರ್ಧಶತಕ.