ಅಶೋಕ್‌ ಚವಾಣ್‌ ಹಾಗೂ ನನ್ನ ನಡುವೆ ಯಾವುದೇ ವಿವಾದವಿಲ್ಲ: ಅಜಿತ್‌ ಪವಾರ್‌

ಮುಂಬಯಿ: ಮಹಾ ವಿಕಾಸ್‌ ಅಘಾಡಿಯ ಸಭೆ ವೇಳೆ ಕಾಂಗ್ರೆಸ್‌ ನಾಯಕ ಅಶೋಕ್‌ ಚವಾಣ್‌ ಹಾಗೂ ಎನ್‌ಸಿಪಿ ನಾಯಕ ಅಜಿತ್‌ ಪವಾರ್‌ ಅವರ ನಡುವೆ ವಿವಾದ ನಡೆಯಿತು ಎಂದು ವರದಿಯಾಗಿತ್ತು. ಈ ಬಗ್ಗೆ ಮಾಧ್ಯಮಗಳ ಜತೆ ಮಾತನಾಡಿದ ಅಜಿತ್‌ ಪವಾರ್‌ ಅವರು, ಹಾಗೇ ಏನೂ ಆಗಿಲ್ಲ, ಕೆಲವರು ಉದ್ದೇಶಪೂರ್ವಕವಾಗಿ ಇಂತಹ ವದಂತಿಯನ್ನು ಹರಡುತ್ತಿದ್ದಾರೆ. ನಮ್ಮಲ್ಲಿ ಯಾವುದೇ ಭಿನ್ನಾಭಿಪ್ರಾಯಗಳು ಉಂಟಾಗಲಿಲ್ಲ ಎಂದು ಅಜಿತ್‌ ಪವಾರ್‌ ಹೇಳಿದ್ದಾರೆ.

ಈ ಹಿಂದೆ ಮಹಾ ವಿಕಾಸ್‌ ಅಘಾಡಿಯ ಸಭೆ ನಡೆದಾಗ ಗ್ರಾಮೀಣ ಪ್ರದೇಶಗಳಿಗೆ ಸಂಬಂಧಿಸಿದ ವಿಷಯದಲ್ಲಿ ಅಜಿತ್‌ ಪವಾರ್‌ ಹಾಗೂ ಕಾಂಗ್ರೆಸ್‌ನ ಅಶೋಕ್‌ ಚವಾಣ್‌ ನಡುವೆ ವಿವಾದ ಉಂಟಾಯಿತು ಎಂದು ಹೇಳಲಾಗಿತ್ತು. ವಿವಾದದ ಅನಂತರ ಅಜಿತ್‌ ಮತ್ತು ಚವಾಣ್‌ ಅವರು ಸಭೆಯಿಂದ ಹೊರ ನಡೆದದಿದ್ದರು. ಸಭೆಯಲ್ಲಿ ಗ್ರಾಮೀಣ ಪ್ರದೇಶಗಳಿಗೆ ಸಂಬಂಧಿಸಿದ ಕೃಷಿ, ಗ್ರಾಮೀಣಾಭಿವೃದ್ಧಿ ಅಥವಾ ಸಹಕಾರಿ ಖಾತೆಗಳನ್ನು ಪಡೆಯಲು ಕಾಂಗ್ರೆಸ್‌ ವತಿಯಿಂದ ಬೇಡಿಕೆ ಇರಿಸಲಾಯಿತು.

ಈ ವಿವಾದದ ಬಗ್ಗೆ ಮಾಧ್ಯಮಗಳು ಅಜಿತ್‌ ಪವಾರ್‌ ಅವರನ್ನು ವಿಚಾರಿಸಿದಾಗ, ನನ್ನ ಹಾಗೂ ಅಶೋಕ್‌ ಚವಾಣ್‌ ನಡುವೆ ಬಹಳ ಒಳ್ಳೆಯ ಸಂಬಂಧವಿದೆ. ನಮ್ಮ ನಡುವೆ ಯಾವುದೇ ವಿವಾದ ನಡೆಯಲಿಲ್ಲ ಎಂದು ಅಜಿತ್‌ ಪವಾರ್‌ ಹೇಳಿದ್ದಾರೆ. ಅಶೋಕ್‌ ಚವಾಣ್‌ ಹಿರಿಯ ನಾಯಕ, ಅವರು ಮುಖ್ಯಮಂತ್ರಿಯಾಗಿದ್ದಾಗ ನಾನು ಅವರೊಂದಿಗೆ ಸಚಿವರಾಗಿ ಕೆಲಸ ಮಾಡಿದ್ದೇನೆ. ನಮಗೆ ಉತ್ತಮ ಸಂಬಂಧವಿದೆ. ಅಶೋಕ ಚವಾಣ್‌ ಹಾಗೂ ನಮ್ಮ ನಡುವೆ ಸುದ್ದಿಗಳೊಂದಿಗೆ ವಿವಾದವನ್ನು ಸೃಷ್ಟಿಸಲು ಪ್ರಯತ್ನಿಸುತ್ತಿದ್ದಾರೆ ಎಂದು ಅಜಿತ್‌ ಪವಾರ್‌ ಹೇಳಿದ್ದಾರೆ.