Cricket: ಆಟಗಾರರ ಎತ್ತರಕ್ಕೆ ತಕ್ಕಂತೆ ನೋಬಾಲ್‌? ಬಿಸಿಸಿಐ ಹೊಸ ಉಪಾಯ

ಹೊಸದಿಲ್ಲಿ: ವಿವಾದಕ್ಕೆ ಕಾರಣವಾಗುವ ಫುಲ್‌ಟಾಸ್‌ ನೋಬಾಲ್‌ ನಿರ್ಧಾರದ ಗೊಂದಲವನ್ನು ಪರಿಹರಿಸಲು ಬಿಸಿಸಿಐ ಮುಂದಾಗಿದೆ. ಇದಕ್ಕಾಗಿ ಹೊಸದೊಂದು ಉಪಾಯ ಮಾಡಲಾಗಿದ್ದು, ಎಲ್ಲ ಆಟಗಾರರ ಸೊಂಟದವರೆಗಿನ ಎತ್ತರದ ಮಾಹಿತಿಯನ್ನು ಕಲೆಹಾಕಲಾಗುತ್ತಿದೆ.

ಬಿಸಿಸಿಐ ತಂಡವೊಂದು ಮಾಹಿತಿ ಸಂಗ್ರಹಿಸಲು ಆರಂಭಿಸಿದ್ದು, ಈ ಮಾಹಿತಿಯನ್ನು 3ನೇ ಅಂಪಾಯರ್‌ ಬಳಿ ಇರುವ ಹಾಕ್‌-ಐ ತಂತ್ರಜ್ಞರಿಗೆ ನೀಡಲಾಗುತ್ತದೆ. ಇವರು, ಚೆಂಡು ನೆಲದಿಂದ ಇರುವ ಎತ್ತರ ಹಾಗೂ ಬ್ಯಾಟರ್‌ನ ಸೊಂಟದವರೆಗಿನ ಎತ್ತರವನ್ನು ಲೆಕ್ಕ ಮಾಡಿ, ಚೆಂಡು ಸೊಂಟಕ್ಕಿಂತ ಮೇಲಿದೆಯೋ ಇಲ್ಲವೋ ಎಂಬುದನ್ನು ಕ್ಷಣದಲ್ಲೇ ನಿರ್ಧರಿಸಿ 3ನೇ ಅಂಪಾಯರ್‌ಗೆ ತಿಳಿಸಲಿದ್ದಾರೆ. ಇದರಿಂದಾಗಿ ನೋ ಬಾಲ್‌ಗೆ ಸಂಬಂಧಿಸಿದ ಗೊಂದಲಗಳು ಪರಿಹಾರವಾದೀತೆಂದು ನಂಬಲಾಗಿದೆ.