Hindi: ಹಿಂದಿ ಭಾಷೆಯ ತರ್ಜುಮೆ ಕೇಳಿದ್ದಕ್ಕೆ ನಿತೀಶ್‌ ಸಿಡಿಮಿಡಿ

ಹೊಸದಿಲ್ಲಿ: ಬಿಜೆಪಿಯನ್ನು ಮಣಿಸುವ ಸಲುವಾಗಿ ವಿಪಕ್ಷಗಳ ನಡುವಿನ ಒಗ್ಗಟ್ಟು ಬಲಪಡಿಸಲು ವಿಪಕ್ಷಗಳ ಒಕ್ಕೂಟ ಐಎನ್‌ಡಿಐಎ ಸೆಣಸಾಡುತ್ತಿರುವ ನಡುವೆಯೇ ಒಕ್ಕೂಟದ ಪ್ರಮುಖ ನಾಯಕ ಬಿಹಾರ ಸಿಎಂ ನಿತೀಶ್‌ ಕುಮಾರ್‌ ತಾಳ್ಮೆ ಕಳೆದುಕೊಂಡ ಘಟನೆ ನಡೆದಿದೆ. ಹಿಂದಿ ಭಾಷಣದ ಭಾಷಾಂತರಕ್ಕೆ ಮನವಿ ಮಾಡಿದ ಡಿಎಂಕೆ ನಾಯಕರ ಎದುರು “ಹಿಂದಿ ನಮ್ಮ ರಾಷ್ಟ್ರ ಭಾಷೆ” ಎಂದು ನಿತೀಶ್‌ ಗುಡುಗಿದ್ದಾರೆ.

ಮಂಗಳವಾರ ಹೊಸದಿಲ್ಲಿಯಲ್ಲಿ ನಡೆದ ಒಕ್ಕೂಟದ ಸಭೆಯಲ್ಲಿ ನಿತೀಶ್‌ ಹಿಂದಿಯಲ್ಲಿ ಭಾಷಣ ಮಾಡುತ್ತಿದ್ದರು. ಈ ವೇಳೆ ಭಾಷಣವನ್ನು ಅರ್ಥೈಸಿಕೊಳ್ಳಲಾಗದೇ ಡಿಎಂಕೆ ನಾಯಕ ಟಿ.ಆರ್‌. ಬಾಲು ಅವರು ಭಾಷಣವನ್ನು ಭಾಷಾಂತರ ಮಾಡುವಂತೆ ಆರ್‌ಜೆಡಿ ಸಂಸದ ಮನೋಜ್‌ ಕೆ ಝಾ ಅವರಿಗೆ ಮನವಿ ಮಾಡಿದರು.  ಸಂಸದರು ಈ ಬಗ್ಗೆ ನಿತೀಶ್‌ ಅವರ ಅನುಮತಿ ಕೋರಲು ಹೋದಾಗ ಅದನ್ನು ನಿರಾಕರಿಸಿದ ನಿತೀಶ್‌, “ನಾವು ನಮ್ಮ ದೇಶವನ್ನು ಹಿಂದೂಸ್ಥಾನ ಎನ್ನುತ್ತೇವೆ. ಹಿಂದಿ ನಮ್ಮ ರಾಷ್ಟ್ರಭಾಷೆ! ಆ ಭಾಷೆ ನಮಗೆ ತಿಳಿದಿರಬೇಕು’ ಎಂದು ಗುಡುಗಿದ್ದಾರೆ.