ಲಷ್ಕರ್‌ ಉಗ್ರನ ವಿರುದ್ಧ ಎನ್‌ಐಎ ಆರೋಪಪಟ್ಟಿ

ನವದೆಹಲಿ: ಕಳೆದ ವರ್ಷ ಉತ್ತರ ಕಾಶ್ಮೀರದಲ್ಲಿ ಬಂಧಿಸಲ್ಪಟ್ಟ ಪಾಕಿಸ್ತಾನದ ಲಷ್ಕರ್‌ -ಎ-ತೊಯ್ಬಾ ಉಗ್ರ ಮೊಹಮ್ಮದ್‌ ಅಮೀರ್‌ ಅವಾನ್‌ ವಿರುದ್ಧ ರಾಷ್ಟ್ರೀಯ ತನಿಖಾ ಸಂಸ್ಥೆ(ಎನ್‌ಐಎ) ಶುಕ್ರವಾರ ಇಲ್ಲಿನ ಸಿಟಿ ಕೋರ್ಟ್‌ನಲ್ಲಿ ಆರೋಪಪಟ್ಟಿ ಸಲ್ಲಿಸಿದೆ. 

ಭಾರತದಲ್ಲಿ ವಿಧ್ವಂಸಕ ಕೃತ್ಯ ಎಸಗುವ ಉದ್ದೇಶದಿಂದಲೇ ಈತ ದೇಶದೊಳಕ್ಕೆ ನುಸುಳಿದ್ದ ಎಂದು ಆರೋಪಪಟ್ಟಿಯಲ್ಲಿ ತಿಳಿಸಲಾಗಿದೆ. ಕಳೆದ ವರ್ಷದ ನವೆಂಬರ್‌ 24ರಂದು ಅಮೀರ್‌ನನ್ನು ಎನ್‌ಐಎ ಹಂದ್ವಾರಾದಲ್ಲಿ ಬಂಧಿಸಿತ್ತು. ಇದಕ್ಕೂ ಮೂರು ದಿನ ಮೊದಲು ನಡೆದ ಎನ್‌ಕೌಂಟರ್‌ನಲ್ಲಿ ಒಬ್ಬ ಯೋಧರ ಹುತಾತ್ಮನಾಗಿ, ಮೂವರು ಲಷ್ಕರ್‌ ಉಗ್ರರನ್ನೂ ಸದೆಬಡಿಯಲಾಗಿತ್ತು. ನಂತರ ನಡೆದ ಶೋಧ ಕಾರ್ಯಾಚರಣೆ ವೇಳೆ ಈತ ಸಿಕ್ಕಿಬಿದ್ದಿದ್ದ. ಅಮೀರ್‌ ಇತರೆ ಮೂವರೊಂದಿಗೆ ಪಾಕ್‌ನಿಂದ ಭಾರತಕ್ಕೆ ನುಸುಳಿದ್ದ. ದೆಹಲಿ ಸೇರಿದಂತೆ ದೇಶದ ವಿವಿಧೆಡೆ ವಿಧ್ವಂಸಕ ಕೃತ್ಯ ಎಸಗುವ ಉದ್ದೇಶದಿಂದ ಭಾರೀ ಪ್ರಮಾಣದ ಶಸ್ತ್ರಾಸ್ತ್ರಗಳು, ಗ್ರೆನೇಡ್‌ಗಳು, ನೇವಿಗೇಷನ್‌ ಮತ್ತು ಸಂವಹನ ಸಾಧನ ಗಳನ್ನೂ ಇವರು ತಂದಿದ್ದರು ಎಂದು ಆರೋಪಪಟ್ಟಿ ಹೇಳಿದೆ.