ಹೊಸ ಬದಲಾಣೆಯಲ್ಲಿ ಹೊಸಬರು

ಕನ್ನಡದಲ್ಲೀಗ ಹೊಸಬರದೇ ಕಲರವ. ಅದರಲ್ಲೂ ವಿಭಿನ್ನ ಶೀರ್ಷಿಕೆಗಳನ್ನು ಹೊತ್ತು ಬರುತ್ತಿರುವ ಪ್ರತಿಭಾವಂತ ಯುವಕರು, ತಮ್ಮದೇ ಪ್ರಯೋಗದ ಮೂಲಕ ಗಟ್ಟಿ ನೆಲೆ ಕಂಡುಕೊಳ್ಳುವ ಪ್ರಯತ್ನ ಮಾಡುತ್ತಲೇ ಇದ್ದಾರೆ. ಈಗಾಗಲೇ ಕನ್ನಡ ಚಿತ್ರರಂಗದಲ್ಲಿ ಸಾಕಷ್ಟು ಆಕರ್ಷಕ ಶೀರ್ಷಿಕೆವುಳ್ಳ ಚಿತ್ರಗಳೇ ಗಮನಸೆಳೆದಿವೆ.

ಕೆಲವು ಶೀರ್ಷಿಕೆ ಮೂಲಕ ಗಮನಸೆಳೆದದ್ದಷ್ಟೇ ಅಲ್ಲ, ಪ್ರೇಕ್ಷಕರ ಮನಸ್ಸನ್ನೂ ಗೆಲ್ಲುವಲ್ಲಿ ಯಶಸ್ವಿಯಾಗಿವೆ. ಈಗಂತೂ ಬದಲಾವಣೆ ಸಮಯ ಎಂಬ ಮಾತು ಜನಜನಿತ. ಆ ನಿಟ್ಟಿನಲ್ಲಿ ಹೊಸಬರೆಲ್ಲಾ ಸೇರಿಕೊಂಡು ಈಗ “ಮುಂದಿನ ಬದಲಾವಣೆ’ ಎಂಬ ಚಿತ್ರ ಮಾಡಿ ಮುಗಿಸಿದ್ದಾರೆ.

ಸದ್ದಿಲ್ಲದೆಯೇ ಚಿತ್ರೀಕರಣ ಮುಗಿಸಿರುವ ಚಿತ್ರತಂಡ, ಈಗ ಡಬ್ಬಿಂಗ್‌ ಮುಗಿಸಿದೆ ಎಂಬುದೇ ಸುದ್ದಿ. “ಮುಂದಿನ ಬದಲಾವಣೆ’ ಚಿತ್ರ ಒಂದು ಹಾಸ್ಯ ಪ್ರಧಾನ ಚಿತ್ರ ಎಂಬುದನ್ನು ಹೊರತುಪಡಿಸಿದರೆ, ಚಿತ್ರದ ಕಥೆಯ ಗುಟ್ಟು ಇತ್ಯಾದಿ ವಿಷಯಗಳಿಗೀಗ ಉತ್ತರವಿಲ್ಲ.

ಸಿರಪ್‌ ಕ್ರಿಯೇಷನ್ಸ್‌ ಬ್ಯಾನರ್‌ನಲ್ಲಿ ಫ‌ಣಿಭೂಷಣ್‌ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಪ್ರವೀಣ್‌ ಭೂಷನ್‌ ಕಥೆ, ಚಿತ್ರಕಥೆ, ಸಂಭಾಷಣೆ ಮತ್ತು ಸಾಹಿತ್ಯ ರಚಿಸಿದ್ದಾರೆ. ಚಿತ್ರದಲ್ಲಿ ಪ್ರವೀಣ್‌ ಭೂಷಣ್‌, ಸಂಗೀತಾ, ಸತೀಶ್‌, ಪಂಚಗೌರಿ, ಆರ್ಯನ, ಮಾಲಾಶ್ರೀ, ಚಕ್ರವರ್ತಿ, ಲಕ್ಷ್ಮಣ್‌ಗೌಡ ಸೇರಿದಂತೆ ಹಲವರು ನಟಿಸಿದ್ದಾರೆ. ಕೋಟಿಶ್ವರ್‌ ಅವರ ಛಾಯಾಗ್ರಹಣ ಚಿತ್ರಕ್ಕಿದೆ. ಕಾರ್ತಿಕ್‌ ವೆಂಕಟೇಶ್‌ ಸಂಗೀತ ನೀಡಿದ್ದಾರೆ.