ಬಾಂಗ್ಲಾ ಹುಲಿಗಳನ್ನು ಬೇಟೆಯಾಡಿದ ಕಿವೀಸ್

ಲಂಡನ್: ರಾಸ್ ಟೇಲರ್ ಅವರ ಅರ್ಧ ಶತಕದ ನೆರವಿನಿಂದ ನ್ಯೂಜಿಲ್ಯಾಂಡ್ ತಂಡ ಬಾಂಗ್ಲಾ ವಿರುದ್ಧ ಎರಡು ವಿಕೆಟ್ ಗಳ ಜಯ ಸಾಧಿಸಿದೆ. ಇದರೊಂದಿಗೆ ಕಿವೀಸ್ ನಾಲ್ಕು ಅಂಕದೊಂದಿಗೆ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದೆ.

ಕೆನ್ನಿಂಗ್ಟನ್ ಓವಲ್ ನಲ್ಲಿ ನಡೆದ ಹಗಲು ರಾತ್ರಿ ಪಂದ್ಯದಲ್ಲಿ ಟಾಸ್ ಗೆದ್ದ ವಿಲಿಯಮ್ಸನ್ ಬೌಲಿಂಗ್ ಆಯ್ಕೆ ಮಾಡಿದರು. ಶಕಿಬ್ ಅಲ್ ಹಸನ್ ಬಿಟ್ಟರೆ ಮತ್ಯಾವ ಆಟಗಾರರು ಸಿಕ್ಕ ಉತ್ತಮ ಆರಂಭವನ್ನು ದೊಡ್ಡ ಇನ್ನಿಂಗ್ಸ್ ಆಗಿ ಪರಿವರ್ತಿಸಲಿಲ್ಲ. ಬಾಂಗ್ಲಾ 244 ರನ್ ಗಳಿಗೆ ಆಲ್ ಔಟ್ ಆಯಿತು. ಶಕಿಬ್ 64 ರನ್ ಗಳಿಸಿದರು. ಕಿವೀಸ್ ಪರ ಮ್ಯಾಟ್ ಹೆನ್ರಿ ನಾಲ್ಕು ವಿಕೆಟ್ ಪಡೆದರು.

245 ರನ್ ಗಳ ಸಾಧಾರಣ ಗುರಿ ಬೆನ್ನಟ್ಟಿದ ಕಿವೀಸ್ ಗೆ ಮಾರ್ಟಿನ್ ಗಪ್ಟಿಲ್ ಮತ್ತು ಕಾಲಿನ್ ಮನ್ರೊ ಸಾಧಾರಣ ಆರಂಭ ಒದಗಿಸಿದರು. ನಂತರ ನಾಯಕ ವಿಲಿಯಮ್ಸನ್ 40 ರನ್ ಗಳಿಸಿದರೆ, ನೀಶಮ್ 25 ರನ್ ಗಳಿಸಿದರು.

ವಿಲಿಯಮ್ಸನ್ ವಿಕೆಟ್ ಪತನದ ನಂತರ ಹಠಾತ್ ಕುಸಿತ ಕಂಡ ನ್ಯೂಜಿಲ್ಯಾಂಡ್ ಗೆ ಅನುಭವಿ ರಾಸ್ ಟೇಲರ್ ಆಸರೆಯಾದರು. ಟೇಲರ್ 82 ರನ್ ಗಳಿಸಿದರು. ಅಂತಿಮವಾಗಿ ಸ್ಯಾಂಟ್ನರ್ ಮತ್ತು ಮ್ಯಾಟ್ ಹೆನ್ರಿ ತಂಡವನ್ನು ಗೆಲ್ಲಿಸಿದರು. ರಾಸ್ ಟೇಲರ್ ಅರ್ಹವಾಗಿ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು.