ನ್ಯೂಜಿಲ್ಯಾಂಡ್‌ ಏಕದಿನ ತಂಡದಲ್ಲಿ ಐಶ್‌ ಸೋಧಿ

ವೆಲ್ಲಿಂಗ್ಟನ್‌: ಪ್ರವಾಸಿ ಇಂಗ್ಲೆಂಡ್‌ ವಿರುದ್ಧ ರವಿವಾರದಿಂದ ಆರಂಭವಾಗಲಿರುವ ಏಕದಿನ ಸರಣಿಗಾಗಿ ಪ್ರಕಟಿಸಲಾದ ನ್ಯೂಜಿಲ್ಯಾಂಡ್‌ ತಂಡದಲ್ಲಿ ಲೆಗ್‌ಬ್ರೇಕ್‌ ಬೌಲರ್‌ ಐಶ್‌ ಸೋಧಿಗೆ ಅವಕಾಶ ನೀಡಲಾಗಿದೆ. ಸೋಧಿ ಕಳೆದ ವರ್ಷ ಮೇ ತಿಂಗಳಲ್ಲಿ ಕೊನೆಯ ಸಲ ಏಕದಿನ ಪಂದ್ಯವನ್ನಾಡಿದ್ದರು.

5 ಪಂದ್ಯಗಳ ಸರಣಿಯ ಮೊದಲೆರಡು ಪಂದ್ಯಗಳಿಗೆ ತಂಡವನ್ನು ಅಂತಿಮಗೊಳಿಸಲಾಗಿದ್ದು, ಗಾಯದಿಂದ ಚೇತರಿಸಿಕೊಂಡ ಮಿಚೆಲ್‌ ಸ್ಯಾಂಟ್ನರ್‌ ಮತ್ತು ಟಾಡ್‌ ಆ್ಯಸ್ಟಲ್‌ ವಾಪಸಾಗಿದ್ದಾರೆ. ಜಾರ್ಜ್‌ ವರ್ಕರ್‌ ಅವರನ್ನು ಕೈಬಿಡಲಾಗಿದೆ.

ಐಶ್‌ ಸೋಧಿ ನ್ಯೂಜಿಲ್ಯಾಂಡಿನ ಮೊದಲ ಆಯ್ಕೆಯ ಟಿ20 ಕ್ರಿಕೆಟಿಗನಾಗಿದ್ದು, ನಂ.1 ಬೌಲರ್‌ ಕೂಡ ಆಗಿದ್ದಾರೆ. ಈ ವರ್ಷದ 10 ಟಿ20 ಪಂದ್ಯಗಳಿಂದ 9 ವಿಕೆಟ್‌ ಉರುಳಿಸಿದ್ದಾರೆ. ಏಕದಿನದಲ್ಲೂ ಸೋಧಿ ಇದೇ ಫಾರ್ಮ್ ಮುಂದುವರಿಸಿಕೊಂಡು ಹೋಗಬಹುದೆಂಬ ವಿಶ್ವಾಸ ಆಯ್ಕೆ ಮಂಡಳಿ ಅಧ್ಯಕ್ಷ ಗವಿನ್‌ ಲಾರ್ಸೆನ್‌ ಅವರದು.

ನ್ಯೂಜಿಲ್ಯಾಂಡ್‌ ತಂಡ: ಕೇನ್‌ ವಿಲಿಯಮ್ಸನ್‌ (ನಾಯಕ), ಟಾಡ್‌ ಆ್ಯಸ್ಟಲ್‌, ಟ್ರೆಂಟ್‌ ಬೌಲ್ಟ್, ಲಾಕಿ ಫ‌ರ್ಗ್ಯುಸನ್‌, ಕಾಲಿನ್‌ ಡಿ ಗ್ರ್ಯಾಂಡ್‌ಹೋಮ್‌, ಮಾರ್ಟಿನ್‌ ಗಪ್ಟಿಲ್‌, ಮ್ಯಾಟ್‌ ಹೆನ್ರಿ, ಟಾಮ್‌ ಲ್ಯಾಥಂ, ಕಾಲಿನ್‌ ಮುನ್ರೊ, ಹೆನ್ರಿ ನಿಕೋಲ್ಸ್‌, ಮಿಚೆಲ್‌ ಸ್ಯಾಂಟ್ನರ್‌, ಐಶ್‌ ಸೋಧಿ, ಟಿಮ್‌ ಸೌಥಿ, ರಾಸ್‌ ಟಯ್ಲರ್‌.