ವನಿತಾ ವಿಶ್ವಕಪ್‌: ವಿಂಡೀಸಿಗೆ ಕಿವೀಸ್‌ ಏಟು

ಟಾಂಟನ್‌: ವನಿತಾ ವಿಶ್ವಕಪ್‌ ಪಂದ್ಯಾವಳಿಯ ಗುರುವಾರದ ಸ್ಪರ್ಧೆಯಲ್ಲಿ ನ್ಯೂಜಿಲ್ಯಾಂಡ್‌ 8 ವಿಕೆಟ್‌ಗಳ ಅಂತರದಿಂದ ವೆಸ್ಟ್‌ ಇಂಡೀಸನ್ನು ಕೆಡವಿದೆ. ಇದು ಕೆರಿಬಿಯನ್‌ ವನಿತೆಯರಿಗೆ ಎದುರಾದ ಸತತ 4ನೇ ಸೋಲು.

ಟಾಂಟನ್‌ ಅಂಗಳದಲ್ಲಿ ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ವೆಸ್ಟ್‌ ಇಂಡೀಸ್‌ 43 ಓವರ್‌ಗಳಲ್ಲಿ 150 ರನ್ನಿಗೆ ಕುಸಿದರೆ, ನ್ಯೂಜಿಲ್ಯಾಂಡ್‌ ಟಿ-20 ಶೈಲಿಯಲ್ಲಿ ಬ್ಯಾಟ್‌ ಬೀಸಿ ಕೇವಲ 18.2 ಓವರ್‌ಗಳಲ್ಲಿ 2 ವಿಕೆಟಿಗೆ 151 ರನ್‌ ಬಾರಿಸಿತು. ಇದು 4 ಪಂದ್ಯಗಳಲ್ಲಿ ನ್ಯೂಜಿಲ್ಯಾಂಡ್‌ ಆಚರಿಸಿದ 2ನೇ ವಿಜಯೋತ್ಸವ. ಒಂದು ಪಂದ್ಯ ರದ್ದಾಗಿದ್ದು, ಇನ್ನೊಂದರಲ್ಲಿ ಸೋತಿದೆ. ಅಂಕಪಟ್ಟಿಯಲ್ಲಿ ದಕ್ಷಿಣ ಆಫ್ರಿಕಾವನ್ನು ಕೆಳಕ್ಕೆ ತಳ್ಳಿ 4ನೇ ಸ್ಥಾನಕ್ಕೇರಿದೆ.

ಕಿವೀಸ್‌ ಆರಂಭಿಕರಾದ ರಶೆಲ್‌ ಪ್ರೀಸ್ಟ್‌ (90) ಹಾಗೂ ಸುಝೀ ಬೇಟ್ಸ್‌ (ಔಟಾಗದೆ 40) ಮೊದಲ ವಿಕೆಟಿಗೆ 120 ರನ್‌ ಪೇರಿಸಿ ತಂಡದ ಗೆಲುವನ್ನು ಸುಲಭಗೊಳಿಸಿದರು. ವೆಸ್ಟ್‌ ಇಂಡೀಸ್‌ ಸರದಿಯಲ್ಲಿ ಸಣ್ಣ ಮಟ್ಟದ ಹೋರಾಟ ಪ್ರದರ್ಶಿಸಿದವರೆಂದರೆ 41 ರನ್‌ ಮಾಡಿದ ಕೈಶೋನಾ ನೈಟ್‌ ಮಾತ್ರ. ನ್ಯೂಜಿಲ್ಯಾಂಡಿನ ಲೀ ಟುಹು ಮತ್ತು ಲೀಗ್‌ ಕಾಸ್ಪರೆಕ್‌ ತಲಾ 3 ವಿಕೆಟ್‌ ಉರುಳಿಸಿದರು.

ವನಿತಾ ವಿಶ್ವಕಪ್‌: ಟಾಪ್‌-4 ತಂಡಗಳು
ತಂಡ    ಪಂದ್ಯ    ಗೆಲುವು    ಸೋಲು    ರದ್ದು    ಅಂಕ    ರನ್‌ರೇಟ್‌
ಆಸ್ಟ್ರೇಲಿಯ    4    4    0    0    8    +1.353
ಭಾರತ    4    4    0    0    8    +0.914
ಇಂಗ್ಲೆಂಡ್‌    4    3    1    0    6    +1.505
ನ್ಯೂಜಿಲ್ಯಾಂಡ್‌    4    2    1    1    5    +1.520