ಆಸ್ಟ್ರೇಲಿಯ-ದಕ್ಷಿಣ ಆಫ್ರಿಕಾ: ನ್ಯೂ ಇಯರ್‌ ಟೆಸ್ಟ್‌ಗೆ ಮಳೆ

ಸಿಡ್ನಿ: ಆಸ್ಟ್ರೇಲಿಯ-ದಕ್ಷಿಣ ಆಫ್ರಿಕಾ ನಡುವಿನ “ನ್ಯೂ ಇಯರ್‌ ಟೆಸ್ಟ್‌’ ಪಂದ್ಯಕ್ಕೆ ಮಳೆಯ ಕಾಟ ಎದುರಾಗಿದೆ. ಜತೆಗೆ ಬೆಳಕಿನ ಅಭಾವ ಕಾಡಿದೆ. ಹೀಗಾಗಿ ಮೊದಲ ದಿನ ಕೇವಲ 47 ಓವರ್‌ಗಳ ಆಟವಷ್ಟೇ ಸಾಗಿದೆ. ಬ್ಯಾಟಿಂಗ್‌ ನಡೆಸುತ್ತಿರುವ ಆಸ್ಟ್ರೇಲಿಯ 2 ವಿಕೆಟ್‌ ನಷ್ಟಕ್ಕೆ 147 ರನ್‌ ಮಾಡಿದೆ.

ಆಸೀಸ್‌ ಸರದಿಯಲ್ಲಿ 2 ಅರ್ಧ ಶತಕಗಳು ದಾಖಲಾದವು. ಆರಂಭಕಾರ ಉಸ್ಮಾನ್‌ ಖ್ವಾಜಾ 54 ರನ್‌ ಮಾಡಿ ಆಡುತ್ತಿದ್ದರೆ, ಮಾರ್ನಸ್‌ ಲಬುಶೇನ್‌ 79 ರನ್‌ ಮಾಡಿ ಔಟಾದರು. ಲಬುಶೇನ್‌ ವಿಕೆಟ್‌ ಉರುಳಿದೊಡನೆಯೇ ಪ್ರತಿಕೂಲ ಹವಾಮಾನ ಎದುರಾಯಿತು. ಔಟಾದ ಮತ್ತೋರ್ವ ಆಟಗಾರ ಡೇವಿಡ್‌ ವಾರ್ನರ್‌ (10). ಎರಡೂ ವಿಕೆಟ್‌ ಆ್ಯನ್ರಿಚ್‌ ನೋರ್ಜೆ ಪಾಲಾಯಿತು.

3 ಪಂದ್ಯಗಳ ಸರಣಿಯಲ್ಲಿ ಆಸ್ಟ್ರೇಲಿಯ 2-0 ಮುನ್ನಡೆ ಹೊಂದಿದೆ.