ದಿಗಂತ್‌-ಐಂದ್ರಿತಾ ಜಂಟಿ ಖಾತೆ ನಟ ದಿಗಂತ್‌ ಅಭಿನಯದ “ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’ ಚಿತ್ರ ತೆರೆಗೆ ಬರೋದಕ್ಕೆ ರೆಡಿಯಾಗಿದೆ. ಮಲೆನಾಡಿನ ಅಡಿಕೆ ಬೆಳೆಗಾರರ ಸಂಕಷ್ಟ, ಬ್ಯಾಂಕ್‌ ವ್ಯವಹಾರದಲ್ಲಿ ತಾಂತ್ರಿಕ ತೊಂದರೆ ಹೀಗೆ ಪ್ರಸ್ತುತ ವಿದ್ಯಮಾನಗಳ ಸುತ್ತ ನಡೆಯುವ ಕಥಾಹಂದರ ಹೊಂದಿರುವ ಈ ಚಿತ್ರದಲ್ಲಿ ದಿಗಂತ್‌ ಹವ್ಯಕ ಅಡಿಕೆ ಬೆಳೆಗಾರನಾಗಿ ಕಾಣಿಸಿಕೊಂಡಿದ್ದಾರೆ.
ಇನ್ನೊಂದು ವಿಶೇಷವೆಂದರೆ, ಸುಮಾರು7 ವರ್ಷಗಳ ಬಳಿಕ ದಿಗಂತ್‌, ಐಂದ್ರಿತಾ ರೇ ಚಿತ್ರದಲ್ಲಿ ಒಟ್ಟಿಗೆ ತೆರೆ ಹಂಚಿಕೊಂಡಿದ್ದಾರೆ. ರಂಜನಿ ರಾಘವನ್‌ ಚಿತ್ರದಲ್ಲಿ ಮತ್ತೂಬ್ಬ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ಹಿರಿಯ ನಟಿ ಉಮಾಶ್ರೀ, ರವಿಕಿರಣ್‌, ಪ್ರಕಾಶ್‌ ತುಮ್ಮಿನಾಡು, ಪಿ. ಡಿ ಸತೀಶ್‌ಚಂದ್ರ, ಶಂಕರ್‌ ಭಟ್‌ ಕಲಗಾರು, ವಿದ್ಯಾಮೂರ್ತಿ,ಕಾಸರಗೋಡು ಚಿನ್ನ ಮೊದಲಾದವರು ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.
ರಿಯಲ್‌ಸ್ಟಾರ್‌ ಉಪೇಂದ್ರ ಅಭಿನಯದ “ಎ’, ಶಿವರಾಜಕುಮಾರ್‌ ಅಭಿನಯದ “ಹಗಲು ವೇಷ’ ಸುದೀಪ್‌ ಅಭಿನಯದ “ಪ್ರತ್ಯರ್ಥ’, “ನಟ’, “ರಿಂಗ್‌ ಮಾಸ್ಟರ್‌’, “ಸೂರ್ಯಕಾಂತಿ’ ಹೀಗೆ ಹಲವು ಸೂಪರ್‌ ಹಿಟ್‌ ಸಿನಿಮಾ ಗಳನ್ನು ನಿರ್ಮಿಸಿದ ನಿರ್ಮಾಪಕ ಎ. ಮಂಜು (ಸಿಲ್ಕ್ ಮಂಜು) “ಉಪ್ಪಿ ಎಂಟರ್‌ಟೈನರ್’ ಬ್ಯಾನರ್‌ನಲ್ಲಿ “ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’ ಚಿತ್ರಕ್ಕೆ ಬಂಡವಾಳ ಹೂಡಿ ನಿರ್ಮಿಸಿದ್ದಾರೆ.
ಚಿತ್ರದ ಬಗ್ಗೆ ಮಾತನಾಡುವ ನಿರ್ಮಾಪಕ ಸಿಲ್ಕ್ ಮಂಜು, “ಇಂದಿನ ಮಲೆನಾಡಿನ ಜನಮಾನಸದ ಚಿತ್ರಣ ಈ ಸಿನಿಮಾದಲ್ಲಿದೆ. ಮಲೆನಾಡಿನ ಸಂಸ್ಕೃತಿ, ಭಾಷೆ, ಸೊಗಡು, ಸೊಬಗು, ಸಂಪ್ರದಾಯ, ಬದುಕು, ಪ್ರಸ್ತುತ ಸನ್ನಿವೇಶಗಳು ಎಲ್ಲವನ್ನೂ ಮನರಂಜನಾತ್ಮಕವಾಗಿ ಈ ಸಿನಿಮಾದಲ್ಲಿ ನೋಡುಗರಿಗೆ ಇಷ್ಟವಾಗುವಂತೆ ಹೇಳಲಾಗಿದೆ.
ಎಲ್ಲ ವರ್ಗದ ಪ್ರೇಕ್ಷಕರಿಗೂ ಇಷ್ಟವಾಗುವಂತೆ ಹತ್ತಾರು ಅಂಶಗಳು ಸಿನಿಮಾದಲ್ಲಿದೆ’ ಎನ್ನುತ್ತಾರೆ. ಪತ್ರಿಕೋದ್ಯಮ ಮತ್ತು ಕಿರುತೆರೆಯಲ್ಲಿ ಕೆಲಸ ಮಾಡಿದ ಅನುಭವವಿರುವ ವಿನಾಯಕ ಕೋಡ್ಸರ, “ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’ ಚಿತ್ರಕ್ಕೆ ಆ್ಯಕ್ಷನ್‌-ಕಟ್‌ ಹೇಳಿದ್ದಾರೆ. ಚಿತ್ರದ ಬಹುಭಾಗ ಚಿತ್ರೀಕರಣವನ್ನು ತುಮರಿ, ಬ್ಯಾಕೋಡು, ನಿಟ್ಟೂರು ಹೀಗೆ ಮಲೆನಾಡಿನ ಸುಂದರ ತಾಣಗಳಲ್ಲಿ ಚಿತ್ರೀಕರಿಸಲಾಗಿದೆ. ದೇವೇಂದ್ರ ರೆಡ್ಡಿ, ಎ. ಪ್ರಕಾಶ್‌ ಮತ್ತು ದಿನೇಶ್‌ ಅರ್ಪಿಸುತ್ತಿರುವ “ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ’ ಚಿತ್ರಕ್ಕೆ ಪ್ರಜ್ವಲ್‌ ಪೈ ಸಹ ನಿರ್ಮಾಪಕರಾಗಿದ್ದು, ರವೀಂದ್ರ ಜೋಶಿ ಕಾರ್ಯಕಾರಿ ನಿರ್ಮಾಪಕರಾಗಿದ್ದಾರೆ.
ಜಿ. ಎಸ್‌. ಕೆ. ಸುಧನ್‌ 