ಪಾಪಿ ಪಾಕ್ ಗೆ ಪಂಚ್ ನೀಡಿದ ಹೊಸ ಮೌಕಾ ವಿಡಿಯೋ

ಹೊಸದಿಲ್ಲಿ: ಮೌಕಾ ಮೌಕಾ ಎಂಬ ಕ್ರಿಕೆಟ್ ಜಾಹೀರಾತು ಸೃಷ್ಟಿಸಿದ್ದ ಹವಾ ಅಷ್ಟಿಷ್ಟಲ್ಲ. ಭಾರತ ಪಾಕ್ ವಿಶ್ವಕಪ್ ಪಂದ್ಯದ ವೇಳೆ ಆರಂಭವಾದ ಈ ಜಾಹೀರಾತು ಈಗ ಸ್ವಲ್ಪ ಹೆಚ್ಚೇ ಮುಂದುವರಿದಿದೆ. ಇತ್ತೀಚಿಗೆ ಪಾಪಿ ಪಾಕಿಸ್ಥಾನ ಭಾರತದ ಹೆಮ್ಮೆಯ ವಿಂಗ್ ಕಮಾಂಡರ್ ಅಭಿನಂಧನ್ ಅವರನ್ನು ಬಳಸಿಕೊಂಡು ಮೌಕಾ ಮೌಕಾ ವಿಡಿಯೋ ಮಾಡಿ ಭಾರತೀಯರ ಕೆಂಗಣ್ಣಿಗೆ ಗುರಿಯಾಗಿತ್ತು. ಆದರೆ ಅದಕ್ಕೆ ಸರಿಯಾಗಿ ಉತ್ತರ ನೀಡಿದ ಭಾರತೀಯ ವಿಡಿಯೋ ಒಂದು ಈಗ ಭಾರಿ ಸುದ್ದಿಯಾಗುತ್ತಿದೆ.

ವಿಡಿಯೋದಲ್ಲಿ ಏನಿದೆ?
ಭಾರತೀಯ ಅಭಿಮಾನಿ ಕ್ಷೌರದ ಅಂಗಡಿಯಲ್ಲಿರುತ್ತಾರೆ. ಆಗ ಅಲ್ಲಿಗೆ ಬರುವ ಪಾಕ್ ಅಭಿಮಾನಿ ಫಾದರ್ ಡೇ ಪ್ರಯುಕ್ತ ಒಂದು ಗಿಫ್ಟ್ ಕೊಡುತ್ತಾನೆ. ಅದರಲ್ಲಿ ಒಂದು ಕರವಸ್ತ್ರ ಇರುತ್ತದೆ. ಇದು ಯಾಕೆಂದು ಕೇಳಿದಾಗ ನಮ್ಮ ವಿರುದ್ಧ ಸೋತಾಗ ನಿಮಗೆ ಮುಖ ಮುಚ್ಚಿಕೊಳ್ಳಲು ಬೇಕಾಗುತ್ತದೆ ಎಂದು ಪಾಕಿ ಉತ್ತರಿಸುತ್ತಾನೆ. ಪಾಕಿಯ ಠಕ್ಕತನಕ್ಕೆ ಉತ್ತರ ಕಲಿಸುವ ಭಾರತೀಯ ಅಭಿಮಾನಿ ಮತ್ತು ಆ ಕ್ಷೌರಿಕ ಆ ಪಾಕ್ ಅಭಿಮಾನಿಗೆ ಅಭಿನಂದನ್ ರೀತಿಯ ಕ್ಷೌರ ಮಾಡುತ್ತಾರೆ. ಇದರಿಂದ ಗಲಿಬಿಲಿಗೊಂಡ ಪಾಕಿ ನಾನು ಹೇಗೆ ಹೊರಗೆ ಮುಖ ತೋರಿಸಲಿ ಎಂದಾಗ ಅದೇ ಕರವಸ್ತ್ರ ನೀಡಿ ಇದರಿಂದ ಮುಖ ಮುಚ್ಚು ಎಂದು ಹೇಳುವ ಈ ವಿಡಿಯೋ ಈಗ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ.

ಭಾರತ ಮತ್ತು ಪಾಕಿಸ್ಥಾನ ರವಿವಾರ ಜೂನ್ 16ರಂದು ವಿಶ್ವಕಪ್ ಹಣಾಹಣಿಯಲ್ಲಿ ಮುಖಾಮುಖಿಯಾಗಲಿವೆ. ಅಂದಹಾಗೆ ಪಾಕಿಸ್ಥಾನ ಇದುವರೆಗೆ ವಿಶ್ವಕಪ್ ನಲ್ಲಿ ಭಾರತ ವಿರುದ್ಧ ಗೆದ್ದಿಲ್ಲ.