ಶಿವಣ್ಣ ಹೊಸಸಿನಿಮಾ ಅನೌನ್ಸ್‌

ಏಪ್ರಿಲ್‌ 24 ಬಂದರೆ, ಕನ್ನಡ ಚಿತ್ರರಂಗದಲ್ಲಿ ಸಾಕಷ್ಟು ಉತ್ಸಾಹವಿರುತ್ತೆ. ಅನೇಕ ಸಿನಿಮಾ ಚಟುವಟಿಕೆಗಳು ಬಿರುಸಾಗುತ್ತವೆ. ಅದಕ್ಕೆ ಕಾರಣ, ಅಂದು ಡಾ.ರಾಜಕುಮಾರ್‌ ಅವರ ಹುಟ್ಟುಹಬ್ಬ.

ಹೌದು, ರಾಜ್‌ ಅವರ ಹುಟ್ಟುಹಬ್ಬದ ದಿನ ಅನೇಕ ಸಿನಿಮಾಗಳ ಹಾಡು, ಮುಹೂರ್ತ ಸೇರಿದಂತೆ ಇನ್ನಿತರೆ ಚಿತ್ರರಂಗದ ಕೆಲಸಗಳಿಗೆ ಚಾಲನೆ ದೊರೆಯುತ್ತದೆ. ಅದರಲ್ಲೂ ಡಾ.ರಾಜಕುಮಾರ್‌ ಅವರ ಪುತ್ರರ ಹೊಸ ಸಿನಿಮಾಗಳಿಗೂ ಚಾಲನೆ ಸಿಗುತ್ತದೆ, ಇಲ್ಲವೆ, ಅವರ ಚಿತ್ರಗಳ ಹಾಡು, ಟ್ರೇಲರ್‌, ಟೀಸರ್‌ ಇತ್ಯಾದಿ ಬಿಡುಗಡೆಯಾಗುತ್ತವೆ. ಈ ಬಾರಿ ನಡೆದ ರಾಜಕುಮಾರ್‌ ಹುಟ್ಟುಹಬ್ಬದ ಸಂದರ್ಭದಲ್ಲಿ ಹ್ಯಾಟ್ರಿಕ್‌ ಹೀರೋ ಶಿವರಾಜಕುಮಾರ್‌ ಅವರ ಹೊಸ ಚಿತ್ರವೊಂದು ಅಧಿಕೃತವಾಗಿ ಘೋಷಣೆಯಾಗಿದೆ.

ಹೌದು, ಇನ್ನೂ ಹೆಸರಿಡದ ಚಿತ್ರವನ್ನು ಡಾ.ರಾಜಕುಮಾರ್‌ ಅವರ ಬರ್ತ್‌ಡೇ ದಿನ ಅನೌನ್ಸ್‌ ಮಾಡಿದ್ದು, ಶಿವಣ್ಣ ಅವರ ಫ್ಯಾನ್ಸ್‌ಗೆ ಡಬ್ಬಲ್‌ ಖುಷಿಯಾಗಿದೆ. ಅಂದಹಾಗೆ, ಚಿತ್ರಕ್ಕೆ ರಾಮ್‌ ಧುಲಿಪುಡಿ ನಿರ್ದೇಶನ ಮಾಡುತ್ತಿದ್ದಾರೆ. ಈ ಚಿತ್ರಕ್ಕೆ ಶಿವರಾಜಕುಮಾರ್‌ ಹೊರತುಪಡಿಸಿ ಬೇರೆ ಕಲಾವಿದರ ಆಯ್ಕೆ ಪ್ರಕ್ರಿಯೆ ಇನ್ನಷ್ಟೇ ಶುರುವಾಗಬೇಕಿದೆ.

ಚಿತ್ರ ಬರುವ ಸೆಪ್ಟೆಂಬರ್‌ನಲ್ಲಿ ಚಿತ್ರೀಕರಣಕ್ಕೆ ಹೊರಡುವ ಸಾಧ್ಯತೆ ಇದೆ ಎನ್ನಲಾಗಿದೆ. ತೆಲುಗು ಚಿತ್ರರಂಗದಲ್ಲಿ ಕಾರ್ಯಕಾರಿ ನಿರ್ಮಾಪಕರಾಗಿ, ಚಿತ್ರಕಥೆ, ಸಂಭಾಷಣೆ ಬರಹಗಾರರಾಗಿ ಸಾಕಷ್ಟು ಕೆಲಸ ಮಾಡಿ ಗುರುತಿಸಿಕೊಂಡಿರುವ ರಾಮ್‌ ಧುಲಿಪುಡಿ ಅವರ ಮೊದಲ ನಿರ್ದೇಶನದ ಚಿತ್ರವಿದು. ಈ ಚಿತ್ರದಲ್ಲಿ ಶಿವರಾಜಕುಮಾರ್‌ ಅವರು ಯೋಧ ಪಾತ್ರ ನಿರ್ವಹಿಸುತ್ತಿದ್ದಾರೆ ಎಂಬುದು ವಿಶೇಷ.