ಭೇದಿ, ನ್ಯುಮೋನಿಯಾ ಲಸಿಕೆ ನೀಡಿಕೆ ಸಾಧನೆ

ಹೊಸದಿಲ್ಲಿ: ಕೋವಿಡ್‌ ಸಾಂಕ್ರಾಮಿಕ ಹಾವಳಿಯ ನಡುವೆಯೂ ದೇಶದಲ್ಲಿ ಭೇದಿ ಮತ್ತು ನ್ಯುಮೋನಿಯಾ ವಿರುದ್ಧ ಮಕ್ಕಳಿಗೆ ಲಸಿಕೆ ಹಾಕುವ ಪ್ರಕ್ರಿಯೆಯಲ್ಲಿ ಗಮನಾರ್ಹ ಪ್ರಗತಿ ಸಾಧಿಸಲಾಗಿದೆ ಎಂದು ಜಾನ್‌ ಹಾಪ್‌ಕಿನ್ಸ್‌ ಬ್ಲೂಮ್‌ಬರ್ಗ್‌ ಸ್ಕೂಲ್‌ ಆಫ್ ಪಬ್ಲಿಕ್‌ ಹೆಲ್ತ್‌ನ ಅಂತಾರಾಷ್ಟ್ರೀಯ ಲಸಿಕೆ ಲಭ್ಯತೆ ಕೇಂದ್ರ (ಐವಿಎಸಿ) ತಿಳಿಸಿದೆ.

ಶುಕ್ರವಾರ ಅಂತಾರಾಷ್ಟ್ರೀಯ ನ್ಯುಮೋನಿಯಾ ದಿನಾಚರಣೆ ಸಂದರ್ಭದಲ್ಲಿ ಅದು ಈ ವಿಚಾರವನ್ನು ಬಹಿರಂಗಪಡಿಸಿದೆ. ಮಕ್ಕಳಿಗೆ ನ್ಯುಮೋನಿಯಾದಿಂದ ರಕ್ಷಣೆ ಒದಗಿಸುವ ನ್ಯುಮೊಕಾಕಲ್‌ ಕಾಂಜುಗೇಟ್‌ ಲಸಿಕೆ ವಿತರಣೆಯಲ್ಲಿ ಆರು ಶತಾಂಶ ಪಾಯಿಂಟ್‌ಗಳಷ್ಟು ಪ್ರಗತಿ ಸಾಧಿಸಲಾಗಿದೆ ಎಂದು ವರದಿ ತಿಳಿಸಿದೆ.

2021ರ ಅಕ್ಟೋಬರ್‌ನಲ್ಲಿ ಈ ಲಸಿಕೆಯನ್ನು ಸಾರ್ವತ್ರಿಕ ಲಸಿಕೆ ಕಾರ್ಯಕ್ರಮದಲ್ಲಿ ಸೇರಿಸಲಾಗಿತ್ತು. ಹಾಗೆಯೇ ಭೇದಿಯಿಂದ ರಕ್ಷಣೆ ಒದಗಿಸುವ ರೊಟಾವೈರಸ್‌ ಲಸಿಕೆ ನೀಡಿಕೆಯಲ್ಲಿ 29 ಶತಾಂಶ ಪಾಯಿಂಟ್‌ ಪ್ರಗತಿ ದಾಖಲಾಗಿದೆ.