ನೇಪಾಲಿ ವ್ಯಕ್ತಿಯ ಬಂಧನ: 10 ಲಕ್ಷ ಮೌಲ್ಯದ ಹೆರಾಯಿನ್‌ ವಶ

ಮಹಾರಾಜಗಂಜ್‌, ಉತ್ತರ ಪ್ರದೇಶ : ಸಶಸ್ತ್ರ ಸೀಮಾ ಬಲ (ಎಸ್‌ಎಸ್‌ಬಿ) ಮತ್ತು ಪೊಲೀಸರ ತಂಡ ಭಾರತ – ನೇಪಾಲ ಗಡಿಯ ಸೊನೋಲಿ ಎಂಬ ಪ್ರದೇಶದಲ್ಲಿ ನೇಪಾಲಿ ಪ್ರಜೆಯೊಬ್ಬನನ್ನು ಬಂಧಿಸಿ ಆತನಿಂದ 52 ಗ್ರಾಮ ತೂಕದ, ಅಂತಾರಾಷ್ಟ್ರೀಯ ಕಳ್ಳ ಮಾರುಕಟ್ಟೆಯಲ್ಲಿ ಸುಮಾರು 10 ಲಕ್ಷ ರೂ. ಬೆಲೆ ಇರುವ, ಮಾದಕ ದ್ರವ್ಯ ಹೆರಾಯಿನ್‌ ವಶಪಡಿಸಿಕೊಂಡಿದ್ದಾರೆ. 

19ರ ಹರೆಯದ ನೇಪಾಲೀ ಪ್ರಜೆ ವಿನೋದ್‌ ಥಾಪಾ ನನ್ನು ಸೋನೋಲಿ ಪ್ರದೇಶದ ರಾಜ್ಯ ರಸ್ತೆ ಸಾರಿಗೆ ಬಸ್‌ ನಿಲ್ದಾಣದಲ್ಲಿ ಬಂಧಿಸಲಾಯಿತೆಂದು ಪೊಲೀಸರು ತಿಳಿಸಿದ್ದಾರೆ. 

ತಾನು ಈ ಮಾದಕ ದ್ರವ್ಯದ ಪೊಟ್ಟಣವನ್ನು ನೇಪಾಲಕ್ಕೆ ತಲುಪಿಸುವವನಿದ್ದು ಪ್ರತಿಫ‌ಲವಾಗಿ ತನಗೆ 5,000 ರೂ. ಸಿಗುವುದಿತ್ತು ಎಂದು ಥಾಪಾ ಪೊಲೀಸರಲ್ಲಿ ಹೇಳಿದ್ದಾನೆ. ಪೊಲೀಸರು ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ.