ಸಂಗಾತಿಯ ಪ್ರೀತಿ ಹೆಚ್ಚಬೇಕಾ?; ಅದಕ್ಕೆ ನಿರ್ಲಕ್ಷ್ಯವೇ ಮದ್ದು!

ವಾಷಿಂಗ್ಟನ್‌: ದಿನ ಬೆಳಗ್ಗಾದರೆ ಅವನಿಗೆ/ಳಿಗೆ ನನ್ನ ಮೇಲೆ ಆಸಕ್ತಿ ಕಡಿಮೆಯಾಗಿದೆ ಅಂತ ಅನಿಸ್ತಿದೆಯಾ? ಮದುವೆಯಾದ ಮೇಲೆ ನನ್ನ ಕಡೆ ಗಮನವೇ ಇಲ್ಲ ಎಂಬ ದೂರು ನಿಮ್ಮದೇ? ಹಾಗಾದರೆ ಇದಕ್ಕೊಂದು ಒಳ್ಳೇ ಔಷಧವಿದೆ. ಅದೇ ನಿರ್ಲಕ್ಷ್ಯ!

ಸಂಗಾತಿ ನಮ್ಮನ್ನು ಪ್ರೀತಿಸಬೇಕು, ಬೇಕು ಬೇಕಾದ್ದನ್ನೆಲ್ಲ ಕೇಳುತ್ತಿರಬೇಕು ಎನ್ನುವ ಆಸೆ ಎಲ್ಲರಿಗೂ ಇದ್ದಿದ್ದೇ. ಆದರೆ ಪ್ರೀತಿ ಕಡಿಮೆಯಾಗುತ್ತಿದೆ ಎಂದು ಗೊತ್ತಾಗುತ್ತಿರುವಾಗ ಇನ್ನಿಲ್ಲದ ಕಸಿವಿಸಿ. ಇಂಥದ್ದರಿಂದ ಪಾರಾಗಲು ಅವರನ್ನು ನಿರ್ಲಕ್ಷ್ಯ ಮಾಡಿಬಿಡಿ ಎನ್ನುತ್ತಿದೆ ಸಮೀಕ್ಷೆ. ಸಂಗಾತಿಯನ್ನು ನಿರ್ಲಕ್ಷ್ಯ ಮಾಡುವುದರಿಂದ ಅವನಿಗೆ/ಅವಳಿಗೆ ನಿಮ್ಮ ಮೇಲೆ ಪ್ರೀತಿ ಹೆಚ್ಚಾಗುತ್ತದೆ. ಇದರಿಂದ ಜಗಳ ಏನೂ ಸೃಷ್ಟಿಯಾಗುವುದಿಲ್ಲ. ನಿರ್ಲಕ್ಷ್ಯಕ್ಕೆ ಪ್ರತಿಯಾಗಿ, ಪ್ರೀತಿ ಒಲಿಸುವುದಿಕೆ ಶುರುವಾಗುತ್ತದೆ ಎಂದು ಸಮೀಕ್ಷೆ ಹೇಳಿದೆ. ಅಷ್ಟೇ ಅಲ್ಲ ಹೀಗೆ ನಿರ್ಲಕ್ಷ್ಯ ಮಾಡುವುದರಿಂದ ಸಂಬಂಧವೂ ಗಟ್ಟಿಯಾಗುತ್ತದಂತೆ. ಈ ಸಮೀಕ್ಷೆಯನ್ನು ಜರ್ನಲ್‌ ಆಫ್ ಪರ್ಸ್‌ನಾಲಿಟಿ ಆ್ಯಂಡ್‌ ಸೋಷಿಯಲ್‌ ಸೈಕಾಲಾಜಿ ನಿಯತಕಾಲಿಕೆ ವರದಿ ಮಾಡಿದೆ.

ಇನ್ನೂ ಸಮೀಕ್ಷೆಯನ್ನು ಎರಡು ಹಂತಗಳಲ್ಲಿ ನಡೆಸಿದ್ದು, ಒಟ್ಟು ನಾಲ್ಕು ಗುಂಪುಗಳನ್ನು ಸಮೀಕ್ಷೆಗೆ ಒಳಪಡಿಸಲಾಗಿದೆ. ಅದರಲ್ಲಿ ಎರಡು ಗುಂಪುಗಳು ನವವಿವಾಹಿತರಾಗಿದ್ದು, ಇನ್ನುಳಿದ ಎರಡು ಗುಂಪುಗಳಲ್ಲಿ ವಿವಾಹವಾಗಿ 5 ವರ್ಷ ಕಳೆದಿರುವ ದಂಪತಿಗಳಿದ್ದರು ಎಂದು ಸಮೀಕ್ಷೆಯ ವರದಿ ತಿಳಿಸಿದೆ.