NEET: ರಾಜ್ಯಪಾಲರ ಒಪ್ಪಿಗೆ ಬೇಕಿಲ್ಲ!

ಚೆನ್ನೈ: ತಮಿಳುನಾಡಿನಲ್ಲಿ ನೀಟ್‌ ಪರೀಕ್ಷೆಯನ್ನು ತೆಗೆದುಹಾಕುವ ರಾಜ್ಯಸರ್ಕಾರದ ಮಸೂದೆ ಆಕ್ಷೇಪಿಸಿ, ಅದಕ್ಕೆ ಅನುಮತಿ ನೀಡುವುದಿಲ್ಲ ಎಂದಿದ್ದ ರಾಜ್ಯಪಾಲ ಆರ್‌.ಎನ್‌. ರವಿ ಅವರಿಗೆ ತ.ನಾಡು ಆರೋಗ್ಯ ಸಚಿವ ಮಾ ಸುಬ್ರಮಣಿಯನ್‌ ತಿರುಗೇಟು ನೀಡಿದ್ದು, ಮಸೂದೆಗೆ ರಾಜ್ಯಪಾಲರ ಅನುಮತಿಯೇ ಬೇಕಿಲ್ಲ ಎಂದಿದ್ದಾರೆ.

ಶನಿವಾರವಷ್ಟೇ ರಾಜ್ಯಪಾಲ ರವಿ ಈ ಹೇಳಿಕೆ ನೀಡಿದ್ದರು. ಈ ಹಿನ್ನೆಲೆಯಲ್ಲಿ ಭಾನುವಾರ ಸಚಿವ ಸುಬ್ರಮಣಿಯನ್‌ ಪ್ರಕ್ರಿಯಿಸಿ, ಈ ಬಾರಿ ಬೇರೆ ಆಯ್ಕೆಯೇ ಇಲ್ಲದೇ, ರಾಜ್ಯಪಾಲರು ಮಸೂದೆಯನ್ನು ರಾಷ್ಟ್ರಪತಿಗಳ ಸಹಿಗೆ ಕಳುಹಿಸಿದ್ದಾರೆ. ಅಲ್ಲಿಗೆ ಅವರ ಕೆಲಸ ಮುಗಿದಿದೆ. ಈ ಮಸೂದೆ ವಿಚಾರವಾಗಿ ಅವರು ಇನ್ನೇನನ್ನೂ ಮಾಡುವಂತಿಲ್ಲ ಹಾಗೂ ಮಸೂದೆಗೆ ಅವರ ಅನುಮತಿಯೂ ಬೇಕಿಲ್ಲ ಎಂದು ಕುಟುಕಿದ್ದಾರೆ.