ಸುಸೂತ್ರವಾಗಿ ನಡೆದ ನೀಟ್‌ ಪರೀಕ್ಷೆ 

ಮಹಾನಗರ: ವೈದ್ಯಕೀಯ ಹಾಗೂ ದಂತ ವೈದ್ಯಕೀಯ ಕೋರ್ಸ್‌ಗಳಿಗೆ ನಡೆಸಲಾಗುವ ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ (ನೀಟ್‌) ರವಿವಾರ ಮಂಗಳೂರು ಸಹಿತ ದೇಶಾದ್ಯಂತ ನಡೆಯಿತು.

ಈ ಬಾರಿ ದಕ್ಷಿಣ ಕನ್ನಡ ಜಿಲ್ಲೆಯ ಒಟ್ಟು 18 ಕೇಂದ್ರಗಳಲ್ಲಿ ನೀಟ್‌ ಪರೀಕ್ಷೆ ನಡೆದಿದ್ದು, ಸುಮಾರು 9 ಸಾವಿರಕ್ಕೂ ಹೆಚ್ಚಿನ ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದರು. ಶಾರದಾ ವಿದ್ಯಾಲಯ, ಸಂತ ಅಲೋಶಿಯಸ್‌ ಕಾಲೇಜು, ಆಗ್ನೇಸ್‌ ಕಾಲೇಜು, ಮಧುಸೂಸದನ್‌ ಕುಶೆ ಕಾಲೇಜು ಸಹಿತ ವಿವಿಧ ಕಾಲೇಜುಗಳಲ್ಲಿ ಪರೀಕ್ಷೆ ಬರೆಯಲು ಬೆಳಗ್ಗಿನಿಂದಲೇ ವಿದ್ಯಾರ್ಥಿಗಳು ಹಾಜರಾಗಿದ್ದರು.

ಕಳೆದ ಬಾರಿಗೆ ಹೋಲಿಸಿದರೆ ಈ ಬಾರಿ ನೀಟ್‌ ಪರೀಕ್ಷೆ ಸುಸೂತ್ರವಾಗಿ ನಡೆಯಲು ಕ್ರಮ ವಹಿಸಲಾಗಿತ್ತು. ಅಭ್ಯರ್ಥಿಗಳಿಗೆ ಪರೀಕ್ಷಾ ಕೇಂದ್ರಕ್ಕೆ ತೆರಳುವ ಮುನ್ನ ಕೆಲ ಸೂಚನೆಗಳನ್ನು ಪಾಲನೆ ಮಾಡಬೇಕಿತ್ತು. ಅದರಲ್ಲೂ, ತೆಳುವಾದ ಅರ್ಧ ತೋಳಿನ ಬಟ್ಟೆ ತೊಟ್ಟಿರಬೇಕು, ದುಪ್ಪಟ್ಟ ನಿಷೇಧಿಸಲಾಗಿತ್ತು. ವ್ಯಾಲೆಟ್‌, ಬೆಲ್ಟ್, ಕೈಗಡಿಯಾರ, ಬ್ರೇಸ್‌ಲೆಟ್‌, ಉಂಗುರ, ಮೂಗುತಿ ಸಹಿತ ಅನೇಕ ವಸ್ತುಗಳಿಗೆ ನಿಷೇಧವಿತ್ತು. ಪರೀಕ್ಷಾ ಕೇಂದ್ರದಲ್ಲಿ ಪುರುಷ ಮತ್ತು ಮಹಿಳಾ ಅಭ್ಯರ್ಥಿಗಳನ್ನು ಪ್ರತ್ಯೇಕವಾಗಿ ತಪಾಸಣೆ ನಡೆಸಲಾಗಿತ್ತು.