ಕಾಲೇಜು ಗೇಟಲ್ಲಿ ನಮಸ್ತೆ ಘೋಸ್ಟ್‌

ಇವತ್ತು ಸಿನಿಮಾ ಮಾಡೋದು ಸುಲಭ. ಆದರೆ, ಅದನ್ನು ಪ್ರೇಕ್ಷಕರಿಗೆ ತಲುಪಿಸೋದು ಕಷ್ಟದ ಕೆಲಸ. ಅದರಲ್ಲೂ ಈಗ ಓಟಿಟಿ ಅಬ್ಬರದ ನಡುವೆ ಸಿನಿಮಾಕ್ಕೆ ಪ್ರೇಕ್ಷಕರನ್ನು ಕರೆತರಲು ಸಿನಿಮಾ ತಂಡಗಳು ಹೊಸ ಹೊಸ ಪ್ರಮೋಶನ್‌ ದಾರಿಯನ್ನು ಹುಡುಕುತ್ತಿವೆ. ಈಗ ಇಲ್ಲೊಂದು ಹೊಸಬರ ತಂಡ ತಮ್ಮ ಸಿನಿಮಾ ಬಗ್ಗೆ ಪ್ರೇಕ್ಷಕರಿಗೆ ತಿಳಿಸಲು ಸ್ಟೂಡೆಂಟ್ಸ್‌ ಮೊರೆ ಹೋಗಿದೆ.

ಹೌದು, “ನಮಸ್ತೆ ಘೋಸ್ಟ್‌’ ಎಂಬ ಸಿನಿಮಾವೊಂದು ಬಿಡುಗಡೆಯ ಹಂತಕ್ಕೆ ಬಂದಿದೆ. ಸಿನಿಮಾದ ಪ್ರಚಾರದ ಅಂಗವಾಗಿ 6000 ವಿದ್ಯಾರ್ಥಿಗಳಿಗೆ ತಮ್ಮ ಸಿನಿಮಾವನ್ನು ಉಚಿತವಾಗಿ ತೋರಿಸಿದೆ.

ಈಗಾಗಲೇ 30ಕ್ಕೂ ಹೆಚ್ಚು ಕಾಲೇಜುಗಳಿಗೆ ಭೇಟಿ ನೀಡಿದ ತಂಡ ವಿದ್ಯಾರ್ಥಿಗಳಿಗೆ ಸಿನಿಮಾ ತೋರಿಸಿ ಅವರ ಅಭಿಪ್ರಾಯ ಪಡೆಯುತ್ತಿದೆ. ಕಾಲೇಜು ಯುವಕ-ಯುವತಿಯರಿಗೆ ಸಿನಿಮಾ ತೋರಿಸಿದರೆ ಬಾಯಿ ಮಾತಿನ ಪ್ರಚಾರದ ಮೂಲಕ ಸಿನಿಮಾ ಬೇಗನೇ ತಲುಪುತ್ತದೆ ಎಂಬ ಕಾರಣಕ್ಕೆ ಈ ಮಾರ್ಗ ಅನುಸರಿಸಿದೆ ತಂಡ.

ಅಂದಹಾಗೆ, ಭರತ್‌ ನಂದ ಈ ಸಿನಿಮಾದ ನಿರ್ದೇಶಕರು. ಜೊತೆಗೆ ಚಿತ್ರದ ನಾಯಕರಾಗಿಯೂ ನಟಿಸಿದ್ದಾರೆ. ವಿದ್ಯಾ ರಾಜ್‌ ಈ ಸಿನಿಮಾದ ನಾಯಕಿ. ಉಳಿದಂತೆ ಚಿತ್ರದಲ್ಲಿ ಬಲರಾಜುವಾಡಿ, ಶಿವಕುಮಾರ್‌ ಆರಾಧ್ಯ ಸೇರಿದಂತೆ ಅನೇಕರು ನಟಿಸಿದ್ದಾರೆ.

ಇದು ಹಾರರ್‌- ಕಾಮಿಡಿ ಕಥಾಹಂದರವೊಂದಿರುವ ಸಿನಿಮಾವಾಗಿದ್ದು, ಶೀಘ್ರದಲ್ಲೇ ಬಿಡುಗಡೆಯಾಗಲಿದೆ.