ನಾಗ ಜುಲೈ 13ರವರೆಗೆ ನ್ಯಾಯಾಂಗ ಬಂಧನಕ್ಕೆ

ಬೆಂಗಳೂರು: ಬ್ಲ್ಯಾಕ್‌ ಅಂಡ್‌ ವೈಟ್‌ ದಂಧೆ ಹಾಗೂ ದರೋಡೆ ಪ್ರಕರಣಗಳಲ್ಲಿ ಆರೋಪಿಗಳಾಗಿರುವ ಮಾಜಿ ಕಾರ್ಪೋರೇಟರ್‌, ರೌಡಿಶೀಟರ್‌, ವಿ. ನಾಗರಾಜು ಸೇರಿದಂತೆ  6 ಮಂದಿ ಆರೋಪಿಗಳನ್ನು ಜುಲೈ 13ರವರೆಗೆ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಮೂವರು ಉದ್ಯಮಿಗಳಿಗೆ ವಂಚಿಸಿದ ಆರೋಪದ ಹಿನ್ನೆಲೆಯಲ್ಲಿ ನಾಗರಾಜು, ಆತನ ಮಕ್ಕಳಾದ  ಗಾಂಧೀ,ಶಾಸ್ತ್ರೀ, ಸಹಚರರಾದ ಜಯ ಕೃಷ್ಣ, ಸರವಣ್‌, ಸೌಂದರ್ಯರಾಜ್‌ರನ್ನು  ಕೆಂಗೇರಿ ಪೊಲೀಸರು ಗುರುವಾರ ಎಸಿಎಂಎಂ ನ್ಯಾಯಾಲಯದ ಮುಂದೆ ಹಾಜರುಪಡಿಸಿದ್ದರು. ಪ್ರಕರಣಗಳಿಗೆ ಸಂಬಂಧಿಸಿದಂತೆ ತನಿಖೆ ಪೂರ್ಣಗೊಂಡಿದೆ ಎಂದು ನ್ಯಾಯಾಲಯಕ್ಕೆ ತಿಳಿಸಿದರು. ಈ ಹಿನ್ನೆಲೆಯಲ್ಲಿ , ನ್ಯಾಯಾಲಯ ಆರು ಮಂದಿ ಆರೋಪಿಗಳಿಗೂ ನ್ಯಾಯಾಂಗ ಬಂಧನ  ವಿಧಿಸಿದೆ.

ಗನ್‌ ಕೊಟ್ಟು ಶೂಟ್‌ ಮಾಡಿಕೊಳ್ಳಲು ಹೇಳಿದರಂತೆ: ಬಂಧನವಾದ ದಿನದಿಂದಲೂ ಪೊಲೀಸರ ವಿರುದ್ಧ ಆರೋಪಗಳನ್ನು ಮಾಡುತ್ತಿದ್ದ  ನಾಗರಾಜು, ಗುರುವಾರವೂ ತನ್ನ  ಹೈಡ್ರಾಮ ಮುಂದುವರಿಸಿದ್ದ.  ಪೊಲೀಸರು  ಸುಖಾಸುಮ್ಮನೆ ದೈಹಿಕ ಹಿಂಸೆ ನೀಡುತ್ತಾರೆ. ನನ್ನ ಎಡಗೈನ  ಮುಂಗೈ ಮುರಿದಿದ್ದಾರೆ.

ಆಸ್ಪತ್ರೆಗೂ ಸೇರಿಸದೇ ಚಿತ್ರಹಿಂಸೆ ನೀಡಿದ್ದಾರೆ. ವಿಷರೂಪದ ಆಹಾರ ನೀಡಿದ್ದಲ್ಲದೇ, ನನ್ನ ಮಗ ಶಾಸ್ತ್ರೀ ಹಾಗೂ ನನಗೆ  ಗನ್‌ ಕೊಟ್ಟು ಪರಸ್ಪರ ಶೂಟ್‌ ಮಾಡಿಕೊಳ್ಳುವಂತೆ ಹೇಳಿ ನಗುತ್ತಿದ್ದರು ಎಂದು ಆರೋಪ ಮಾಡುತ್ತಿದ್ದ. ನ್ಯಾಯಾಲಯ ನಾಗನ ಆರೋಪಗಳನ್ನು ಒಪ್ಪಲಿಲ್ಲ ಎಂದು  ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದರು.