ನನ್ನ ತಾಯಿ ಸೋನಿಯಾ ಹೆಚ್ಚು ಭಾರತೀಯಳು : ಬೆನ್ನುತಟ್ಟಿಕೊಂಡ ರಾಗಾ

ಬೆಂಗಳೂರು : ‘ನಾನು ಕಂಡ ಅನೇಕ ಭಾರತೀಯರಲ್ಲಿ ನನ್ನ ತಾಯಿ, ಸೋನಿಯಾ ಗಾಂಧಿ, ಹೆಚ್ಚು ಭಾರತೀಯಳೆಂಬುದನ್ನು ನಾನು ಕಂಡುಕೊಂಡಿದ್ದೇನೆ’ ಎಂದು ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಇಂದಿಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು. 

‘ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಕಾಂಗ್ರೆಸ್‌ ಬಹುಮತದೊಂದಿಗೆ ಗೆಲ್ಲುವುದು ಖಚಿತ; ಆ ಬಗ್ಗೆ ಯಾರಿಗೂ ಸಂಶಯವೇ ಬೇಡ’ ಎಂದ ರಾಹುಲ್‌, ಈ ಚುನಾವಣೆಯು ಎರಡು ವಿಭಿನ್ನ ಸಿದ್ಧಾಂತಗಳ ನಡುವಿನ ಹೋರಾಟವಾಗಿದೆ. ಆರ್‌ಎಸ್‌ಎಸ್‌ ನಮ್ಮ ಸ್ಫೂರ್ತಿಯನ್ನು ಹೊಸಕಿ ಹಾಕಲು ಹವಣಿಸುತ್ತಿದೆ; ಆದರೆ ನಾವು ಅದರ ಬಲಿಪಶುಗಳಾಗೆವು’ ಎಂಬ ಎಚ್ಚರಿಕೆಯನ್ನು ನೀಡಿದರು. 

‘ಕಾಂಗ್ರೆಸ್‌ ಪಕ್ಷ ಬೆಂಗಳೂರನ್ನು ಅಪಾರವಾಗಿ ಬೆಂಬಲಿಸಿದೆ; ಕಾಂಗ್ರೆಸ್‌ ಆಡಳಿತೆಯಲ್ಲಿ ಇಡಿಯ ದೇಶದಲ್ಲೇ ಅತ್ಯಧಿಕ ಉದ್ಯೋಗಾವಕಾಶಗಳನ್ನು ಸೃಷ್ಟಿಸಿರುವ ರಾಜ್ಯವಾಗಿ ಕರ್ನಾಟಕ ನಂಬರ್‌ 1 ಸ್ಥಾನವನ್ನು ಪಡೆದಿದೆ. ಈ ಚುನಾವಣೆಯಲ್ಲಿ ಹೋರಾಟವು ನನ್ನ ಮತ್ತು ಪ್ರಧಾನಿ ನಡುವಿನ ಹೋರಾಟ ಅಲ್ಲ; ಬದಲು ಇದು ಜನರು ತಮ್ಮ ಬೇಕುಬೇಡಗಳನ್ನು ಗೌರವಿಸುವ ಚುನಾವಣೆಯಾಗಿದೆ’ ಎಂದು ರಾಹುಲ್‌ ಹೇಳಿದರು. 

‘ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಎನ್‌ಡಿಎ ಸರಕಾರಕ್ಕೆ ಖಚಿತವಾದ ವಿದೇಶ ನೀತಿ ಎಂಬುದಿಲ್ಲ; ಹಾಗಾಗಿ ರಶ್ಯವು ಪಾಕಿಸ್ಥಾನಕ್ಕೆ ಶಸ್ತ್ರಾಸ್ತ್ರ ಪೂರೈಸುವುದನ್ನು ನಾವು ಕಾಣುತ್ತಿದ್ದೇವೆ; ಮೋದಿ ಅವರು ಕಾರ್ಯಸೂಚಿಯೇ ಇಲ್ಲದೆ ಚೀನಕ್ಕೆ ಹೋಗಿದ್ದಾರೆ. ನಾವು ಹೇಳಿದ್ದೆವು: ಚೀನದೊಂದಿಗೆ ಡೋಕ್ಲಾಂ ಬಗ್ಗೆ ಖಡಕ್‌ ಆಗಿ ಮಾತನಾಡಿ ಎಂದು; ಆದರೆ ಅವರದನ್ನು ಮಾಡಲಿಲ್ಲ. ನಮ್ಮ ದೇಶದ ಮುಂದಿರುವ ಮುಖ್ಯ ಸವಾಲು ಯುವ ಜನರಿಗೆ ಉದ್ಯೋಗಾವಕಾಶ ಕಲ್ಪಿಸುವುದು; ಆದರೆ ಪ್ರಧಾನಿ ಅದನ್ನು ಮಾಡುತ್ತಿಲ್ಲ ಎಂದು ರಾಹುಲ್‌ ಟೀಕಿಸಿದರು.