ಸೂಪರ್‌ ರೆಹಮಾನ್‌

ಸಂಗೀತ ಮಾಂತ್ರಿಕ ಎ.ಆರ್‌. ರೆಹಮಾನ್‌ ಅವರ ಸಂಗೀತವೆಂದರೆ ಅದು ಶ್ರವಣಗಳಿಗೆ ಮಾತ್ರವಲ್ಲ, ಆತ್ಮಕ್ಕೂ ರಸದೌತಣ. ಕಾಲಿವುಡ್‌, ಬಾಲಿವುಡ್‌ನಿಂದ ಹಾಲಿವುಡ್‌ವರೆಗೂ ನೆಗೆದ ಈ ಗಾರುಡಿಗನ ಸಂಗೀತ ಕೇಳಲು ಜಗತ್ತಿನಾದ್ಯಂತ ಶ್ರೋತೃಗಳು ಕಾತರರಾಗಿರುತ್ತಾರೆ. ಇದೀಗ ಅವರ ಸಂಗೀತಕ್ಕೆ ಕಿವಿಯಾಗುವ ಸರದಿ ಬೆಂಗಳೂರಿಗರದು. ನಗರದಲ್ಲಿ ಅವರ “ಒನ್‌ ಹಾರ್ಟ್‌ ಟೂರ್‌’ ಸಂಗೀತ ಕಛೇರಿ ಏರ್ಪಾಡಾಗಿದೆ. ರೆಹಮಾನರ ಸಂಗೀತ ನಿರ್ದಿಷ್ಟ ಪ್ರದೇಶಕ್ಕೆ ಸೀಮಿತವಾಗದೆ ಹಲವು ದೇಶಗಳ, ಸಂಸ್ಕೃತಿಯ ಸಂಗೀತ ಪ್ರಕಾರ ಮತ್ತು ವಾದ್ಯಗಳನ್ನು ಒಳಗೊಂಡಿರುತ್ತದೆ. ಈ ಕಾರಣಕ್ಕೇ ಅವರ ಕಾನ್ಸರ್ಟ್‌ನಲ್ಲಿ ವರ್ಲ್ಡ್ ಮ್ಯೂಸಿಕ್‌ನ ಪ್ರಭಾವ ಹೆಚ್ಚಿರುತ್ತದೆ. ಇಷ್ಟು ದಿನ ಸಿನಿಮಾಗಳಲ್ಲಿ ರೆಹಮಾನ್‌ ಸಂಗೀತವನ್ನು ಕೇಳಿ ಮೆಚ್ಚಿದವರು ಲೈವ್‌ ಸಂಗೀತಕ್ಕೆ ತಲೆದೂಗಬಹುದು. ಅಂದು ರೆಹಮಾನ್‌ ಜೊತೆ ಹಿನ್ನೆಲೆ ಗಾಯಕರಾದ ಉದಿತ್‌ ನಾರಾಯಣ್‌, ವಿಜಯ್‌ಪ್ರಕಾಶ್‌, ಶ್ವೇತಾ ಮೋಹನ್‌, ನೀತಿ ಮೋಹನ್‌, ಜೋನಿಟಾ ಗಾಂಧಿ ಅವರೂ ಭಾಗವಹಿಸುತ್ತಿದ್ದಾರೆ. ಪ್ರವೇಶ ದರ 1500 ರೂ.ನಿಂದ ಶುರು.

ಎಲ್ಲಿ?: ಓಝೋನ್‌ ಅರ್ಬಾನಾ, ದೇವನಹಳ್ಳಿ
ಯಾವಾಗ?: ಡಿ.22, ಸಂಜೆ 6.30
ಬುಕ್ಕಿಂಗ್‌: goo.gl/7583mm