ಪಾಕ್‌ ಪ್ರವಾಸ: ರಹೀಂ ಹಿಂದೇಟು

ಢಾಕಾ: ಬಾಂಗ್ಲಾದೇಶ ಕ್ರಿಕೆಟ್‌ ತಂಡದ ತಾರಾ ಬ್ಯಾಟ್ಸ್‌ಮನ್‌ ಕಮ್‌ ವಿಕೆಟ್‌ ಕೀಪರ್‌ ಮುಶ್ಫಿಕರ್‌ ರಹೀಂ ಪಾಕಿಸ್ಥಾನಕ್ಕೆ ಸರಣಿಯಾಡಲು ತೆರಳಲು ನಿರಾಕರಿಸಿದ್ದಾರೆ. ಪಾಕಿಸ್ಥಾನ ಕ್ರಿಕೆಟ್‌ ಮಂಡಳಿ ಜತೆ ದ್ವಿಪಕ್ಷೀಯ ಸರಣಿಯ ಪ್ರಸ್ತಾವವನ್ನು ಬಾಂಗ್ಲಾದೇಶ ಕ್ರಿಕೆಟ್‌ ಮಂಡಳಿ ಒಪ್ಪಿಕೊಂಡ ಬೆನ್ನಲ್ಲೇ ರಹೀಂ ಈ ನಿರ್ಧಾರಕ್ಕೆ ಬಂದಿದ್ದಾರೆ.

ಈಗಾಗಲೇ ನಿಷೇಧದಿಂದಾಗಿ ಅಲ್‌ರೌಂಡರ್‌ ಶಕೀಬ್‌ ಅಲ್‌ ಹಸನ್‌ ತಂಡದಿಂದ ಹೊರಗಿದ್ದಾರೆ. ಇದೀಗ ಇನ್ನೋರ್ವ ಅನುಭವಿ ಕ್ರಿಕೆಟಿಗ ಸರಣಿಯಿಂದ ಹೊರಹೋಗುವ ನಿರ್ಧಾರಕ್ಕೆ ಬಂದಿರುವುದು ಬಾಂಗ್ಲಾ ತಂಡಕ್ಕೆ ಆಘಾತವಾಗಿ ಪರಿಣಮಿಸಿದೆ.

ಮುಶ್ಫಿಕರ್‌ ರಹೀಂ ಅವರ ಅಧಿಕೃತ ಪತ್ರಕ್ಕಾಗಿ ಕಾಯುತ್ತಿರುವುದಾಗಿ ಬಾಂಗ್ಲಾ ಕ್ರಿಕೆಟ್‌ ಮಂಡಳಿ ತಿಳಿಸಿದೆ. ಪಾಕ್‌ ಪ್ರವಾಸದ ವೇಳೆ 3 ಟಿ20, 2 ಟೆಸ್ಟ್‌, ಒಂದು ಏಕದಿನ ಪಂದ್ಯವನ್ನಾಡಲಾಗುವುದು.