ಅಹ್ಮದಾಬಾದ್‌ನಲ್ಲಿ ತುರ್ತಾಗಿ ಇಳಿದ ಮುಂಬಯಿ-ದಿಲ್ಲಿ ವಿಮಾನ

ಹೊಸದಿಲ್ಲಿ : ಇಂದು ಸೋಮವಾರ ಮುಂಬಯಿಯಿಂದ ದಿಲ್ಲಿಗೆ ಹೊರಟಿದ್ದ ಜೆಟ್‌ ಏರ್‌ ವೇಸ್‌ ವಿಮಾನವನ್ನು, ಟೇಕಾಫ್ ಆದ ಸ್ವಲ್ಪವೇ ಹೊತ್ತಿನಲ್ಲಿ “ಭದ್ರತಾ ಕಾರಣ’ಗಳಿಗಾಗಿ ಅಹ್ಮದಾಬಾದ್‌ಗೆ ತಿರುಗಿಸಲಾಯಿತು.

ಮುಂಬಯಿಯಿಂದ ಇಂದು ಸೋಮವಾರ ನಸುಕಿನ 2.55ರ ಹೊತ್ತಿಗೆ ಟೇಕಾಫ್ ಆದ ಬಳಿಕ ಮಾರ್ಗ ಬದಲಾಯಿಸಲ್ಪಟ್ಟ ಜೆಟ್‌ ಏಸ್‌ ವೇಸ್‌ ವಿಮಾನ ನಸುಕಿನ 3.45ರ ಹೊತ್ತಿಗೆ ಅಹ್ಮದಾಬಾದ್‌ನಲ್ಲಿ ಇಳಿಯಿತು. 

ವಿಮಾನದಿಂದ ಇಳಿಸಲ್ಪಟ್ಟ ಎಲ್ಲ ಪ್ರಯಾಣಿಕರನ್ನು ಕೂಲಂಕಷ ತಪಾಸಣೆಗೆ ಗುರಿಪಡಿಸಲಾಯಿತು. ಭದ್ರತಾ ಕಾರಣಗಳಿಂದಾಗಿ ವಿಮಾನವನ್ನು ಅಹ್ಮದಾಬಾದ್‌ಗೆ ತಿರುಗಿಸಲಾಯಿತು ಎಂದು ವಿಮಾನದಲ್ಲಿದ್ದ ಪ್ರಯಾಣಿಕರಲ್ಲಿ ಓರ್ವರು ಹೇಳಿದ್ದಾರೆ.

ವಿಮಾನಕ್ಕೆ ಬೆದರಿಕೆ ಇದೆ ಎಂಬ ಕರೆಯನ್ನು ಅನುಸರಿಸಿ ವಿಮಾನವನ್ನು ಅಹ್ಮದಾಬಾದ್‌ಗೆ ತಿರುಗಿಸಿ ಇಳಿಸಲಾಯಿತು ಎಂದು ಭದ್ರತಾ ಸಿಬಂದಿ ತಿಳಿಸಿದ್ದಾರೆ. 

ವಿಮಾನದಲ್ಲಿ ಒಟ್ಟು ಎಷ್ಟು ಪ್ರಯಾಣಿಕರು ಇದ್ದರು ಎಂಬುದು ತತ್‌ಕ್ಷಣಕ್ಕೆ ಗೊತ್ತಾಗಿಲ್ಲ. ಜೆಟ್‌ ಏರ್‌ ವೇಸ್‌ ವಕ್ತಾರನಿಂದ ಕೂಡ ತತ್‌ಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆಗಳು ಬಂದಿಲ್ಲ.