ಮುಳ್ಳಿಕಟ್ಟೆ: ಹಾರ್ಡ್‌ವೇರ್‌ ಅಂಗಡಿಗೆ ಬೆಂಕಿ

ಕುಂದಾಪುರ: ವಿದ್ಯುತ್‌ ಶಾರ್ಟ್‌ ಸರ್ಕ್ಯೂಟ್‌ನಿಂದ ಆಕಸ್ಮಿಕ ಬೆಂಕಿ ಕಾಣಿಸಿಕೊಂಡು, ಹಾರ್ಡ್‌ವೇರ್‌ ಅಂಗಡಿಯೊಂದು ಹೊತ್ತಿ ಉರಿದ ಘಟನೆ ಮುಳ್ಳಿಕಟ್ಟೆ ಪೇಟೆ ಯಲ್ಲಿ ಶನಿವಾರ ಸಂಜೆ 7.45ರ ಸುಮಾರಿಗೆ ಸಂಭವಿಸಿದೆ.

ಮುಳ್ಳಿಕಟ್ಟೆಯ ಹರೀಶ್‌ ಜೋಗಿ ಅವರಿಗೆ ಸೇರಿದ ಬೆನಕ ಹಾರ್ಡ್‌ವೇರ್‌ ಅಂಗಡಿ ಸಂಪೂರ್ಣ ಸುಟ್ಟು ಕರಕಲಾಗಿದೆ.  ಹಾರ್ಡ್‌ವೇರ್‌ ಅಂಗಡಿಯಲ್ಲಿದ್ದ ಬಹುತೇಕ ಎಲ್ಲ ಸ್ವತ್ತುಗಳು ಬೆಂಕಿಗೆ ಅಹುತಿಯಾಗಿದ್ದು, ವಿದ್ಯುತ್‌ ಪರಿಕರಗಳು ಸಹ ಸುಟ್ಟು, ಕರಕಲಾಗಿದ್ದು, ಅಂದಾಜು ಒಂದು ಕೋ. ರೂ.ಗೂ ಮಿಕ್ಕಿ ನಷ್ಟ ಸಂಭವಿಸಿದೆ.

ಹರೀಶ್‌ ಜೋಗಿ ಅವರು ಸಂಜೆ ಅಂಗಡಿ ಬಂದ್‌ ಮಾಡಿ, ಮನೆಗೆ ತೆರಳಿದ್ದು, ಸಂಜೆ 7.45ರ ಸುಮಾರಿಗೆ ವಿದ್ಯುತ್‌ ಶಾರ್ಟ್‌ ಸರ್ಕ್ನೂಟ್‌ ನಿಂದ ಹಾರ್ಡ್‌ವೇರ್‌ ಅಂಗಡಿಯಲ್ಲಿದ್ದ ವಸ್ತುಗಳಿಗೆ ಬೆಂಕಿ ಹತ್ತಿಕೊಂಡು, ಇಡೀ ಅಂಗಡಿಗೆ ವ್ಯಾಪಿಸಿ, ದೊಡ್ಡ ಬೆಂಕಿ ಅವಘಡ ಸಂಭವಿಸಿತು.

ಕುಂದಾಪುರ ಅಗ್ನಿ ಶಾಮಕ ದಳದ ಸಿಬಂದಿ ಸ್ಥಳಕ್ಕೆ ಆಗಮಿಸಿ, ಸ್ಥಳೀಯರ ಸಹಕಾರೊಂದಿಗೆ ಬೆಂಕಿ ನಂದಿಸುವಲ್ಲಿ ಸಹಕರಿಸಿದರು. ಗಂಗೊಳ್ಳಿ ಎಸ್‌ಐ ನಂಜಾ ನಾಯ್ಕ್ ಸಹ ಸ್ಥಳದಲ್ಲಿದ್ದು, ಬೆಂಕಿ ನಂದಿಸುವ ಕಾರ್ಯದಲ್ಲಿ ನೆರವಾದರು.