ಕಮತಗಿ: ಹುನಗುಂದ ತಾಲೂಕಿನ ಮುಗನೂರ ಗ್ರಾಮದ ಹೊರ ವಲಯದಲ್ಲಿ ನಿರ್ಮಾಣಗೊಂಡಿರುವ ಬಹುಗ್ರಾಮ ಶುದ್ಧ ಕುಡಿಯುವ ನೀರಿನ ಘಟಕವು ಅವ್ಯವಸ್ಥೆಯ ಆಗರವಾಗಿದೆ. ನೀರನ್ನು ಶುದ್ಧೀಕರಿಸುವ ಘಟಕವು ಸಂಪೂರ್ಣ ಪಾಚಿಯಿಂದ ಕೂಡಿದೆ.
ಮುಗನೂರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗ್ರಾಮಗಳಾದ ಬಸವನಾಳ, ಮುಗನೂರ, ಅಂಬ್ಲಿಕೊಪ್ಪ, ಸುರಳಿಕಲ್ಲ, ಕಡಿವಾಲ-ಕಲ್ಲಾಪುರ, ಯರನಾಯಕನಾಳ ಹಾಗೂ ಬಸರಿಕಟ್ಟಿ ಗ್ರಾಮಗಳ ಸಾರ್ವಜನಿಕರಿಗೆ ಶುದ್ಧವಾದ ಕುಡಿಯುವ ನೀರು ಒದಗಿಸಬೇಕು ಎಂದುಸರ್ಕಾರವು ಕಳೆದ ಹಲವು ವರ್ಷಗಳ ಹಿಂದೆ ಮುಗನೂರ ಗ್ರಾಮದ ಹೊರ ವಲಯದ ಶುದ್ಧ ಕುಡಿಯುವ ನೀರನ್ನು ಸಂಗ್ರಹಿಸುವ ಘಟಕ ಆರಂಭಿಸಿದೆ. ಆದರೆ ಅಧಿಕಾರಿಗಳ ಹಾಗೂ ಸಿಬ್ಬಂದಿಗಳ ನಿರ್ಲಕ್ಷ್ಯದಿಂದಾಗಿ ಅಶುದ್ಧ ಕುಡಿಯುವ ನೀರಿನ ಘಟಕವಾಗಿದೆ.
ಆಲಮಟ್ಟಿ ಜಲಾಶಯದಿಂದ ಬಹುಗ್ರಾಮ ಕುಡಿಯವ ನೀರಿನ ಯೋಜನೆಗೆ ನೀರನ್ನು ಪೈಪ್‌ಲೈನ್‌ ಮೂಲಕ ಬಳಸಿಕೊಳ್ಳಲಾಗಿದೆ. ಮುಗನೂರ ಶುದ್ಧ ಕುಡಿಯುವ ನೀರಿನ ಘಟಕದಲ್ಲಿ ನೀರನ್ನು ಶುದ್ಧಿಕರಿಸಿ 8 ಗ್ರಾಮಗಳಿಗೆಕುಡಿಯುವ ನೀರನ್ನು ಪೂರೈಕೆ ಮಾಡಲಾಗುತ್ತಿದೆ.
ಘಟಕದ ಪ್ರದೇಶವು ಸಂಪೂರ್ಣ ಪಾಚಿಯಿಂದ ಕೂಡಿ ಅಶುದ್ಧವಾಗಿದ್ದು, ಕಳೆದ ಹಲವು ತಿಂಗಳಿನಿಂದ ಘಟಕ ಸ್ವತ್ಛಗೊಳಿಸಬೇಕು ಎಂದು ಸ್ಥಳೀಯರು ಸಂಬಂಧಿಸಿದ ಅಧಿಕಾರಿಗಳ ಗಮನಕ್ಕೆ ತಂದರೂ ಇದುವರೆಗೂ ಯಾವುದೇ ಪ್ರಯೋಜನವಾಗಿಲ್ಲ.
ಶುದ್ಧ ಕುಡಿಯುವ ನೀರಿನ ಘಟಕದ ಸುತ್ತಮುತ್ತಲಿನ ಪ್ರದೇಶದಲ್ಲಿರುವ ಕೆಂಪುಮಣ್ಣು ಅಗೆಯುತ್ತಿದ್ದು, ಇದರ ಧೂಳು ಈ ನೀರನ್ನು ಸೇರಿಕೊಳ್ಳುತ್ತಿದೆ. ಇದೇ ಪ್ರದೇಶದಲ್ಲಿ ಮಧ್ಯಸೇವನೆ ಸೇರಿದಂತೆ ಇತರೆ ಚಟುವಟಿಕೆಗಳು ನಿರಂತರವಾಗಿ ನಡೆಯುತ್ತಿದ್ದು, ಸಂಬಂಧಪಟ್ಟ ಅಧಿಕಾರಿಗಳು ಎಚ್ಚೆತ್ತುಕೊಳ್ಳಬೇಕು. ಶೀಘ್ರದಲ್ಲಿಯೇ ಈ ಘಟಕವನ್ನು ಸ್ವತ್ಛಗೊಳಿಸಿ ಸಾರ್ವಜನಿಕರಿಗೆ ಶುದ್ಧವಾದ ನೀರು ಪೂರೈಕೆಮಾಡಬೇಕು ಎಂದು ಗ್ರಾಮದ ಯುವಕರಾದಸಂಗಣ್ಣ ಗಂಜೀಹಾಳ, ಸಂಗಮೇಶ ಹೊರಕೇರಿ, ಮಹಾಂತೇಶ ಕಲಾದಗಿ, ನಜೀರ್‌ ಓಲೇಕಾರ ಆಗ್ರಹಿಸಿದ್ದಾರೆ.
ಸಾರ್ವಜನಿಕರಿಗೆ ಶುದ್ಧವಾದ ನೀರನ್ನುಪೂರೈಕೆ ಮಾಡುವ ಸಂಬಂಧ ಸರ್ಕಾರವು ಬಹುಗ್ರಾಮ ಕುಡಿಯುವ ನೀರು ಪೂರೈಕೆ ಯೋಜನೆಯಡಿ ಗ್ರಾಮದಲ್ಲಿ ಶುದ್ಧ ಕುಡಿಯುವ ನೀರಿನ ಘಟಕವನ್ನು ಆರಂಭಿಸಿದ್ದು, ಅದು ಅವ್ಯವಸ್ಥೆಯ ಆಗರವಾಗಿದೆ. ಸ್ವತ್ಛತೆ ಮಾಡದೇ ಹಾಗೆಯೇ ನೀರನ್ನು ಪೂರೈಕೆ ಮಾಡಲಾಗುತ್ತಿದೆ. ಇದರಿಂದಾಗಿ ಸಾರ್ವಜನಿಕರ ಆರೋಗ್ಯದ ಮೇಲೆ ದುಷ್ಪರಿಣಾಮ ಉಂಟಾಗುತ್ತಿದೆ. ಅಧಿಕಾರಿಗಳು ಎಚ್ಚೆತ್ತುಕೊಂಡು ಸ್ವತ್ಛಗೊಳಿಸಿಸಾರ್ವಜನಿಕರಿಗೆ ಶುದ್ಧ ನೀರು ಪೂರೈಸಬೇಕು. –
ಮಹಾಂತೇಶ ಕಲಾದಗಿಪ್ರಧಾನ ಕಾರ್ಯದರ್ಶಿ, ಕರವೇ ಗ್ರಾಮ ಘಟಕ , ಮುಗನೂರ
-ಪ್ರಕಾಶ ಆರ್‌. ಗುಳೇದಗುಡ್ಡ
