ಮುಧೋಳ: ಸ್ವಂತ ಖರ್ಚಿನಿಂದ ಹೆದ್ದಾರಿ ಗುಂಡಿ ದುರಸ್ತಿ

ಮುಧೋಳ: ರಸ್ತೆ ದುರಸ್ತಿ ಮಾಡುವಂತೆ ತಾಲೂಕು ಆಡಳಿತಕ್ಕೆ ಮನವಿ ಮಾಡಿದರೂ ಸ್ಪಂದಿಸದ ಹಿನ್ನೆಲೆಯಲ್ಲಿ ಕಾಂಗ್ರೆಸ್‌ ಮುಖಂಡ ಸತೀಶ ಬಂಡಿವಡ್ಡರ ಸ್ವಂತ ಖರ್ಚಿನಿಂದ ಹೆದ್ದಾರಿ ಗುಂಡಿಗಳನ್ನು ದುರಸ್ತಿ ಕಾರ್ಯ ಕೈಗೊಂಡಿದ್ದಾರೆ.

ನಗರದ ರಾಜ್ಯ ಹೆದ್ದಾರಿಯಲ್ಲಿ ಅಲ್ಲಲ್ಲಿ ತೆಗ್ಗುಗಳು ಬಿದ್ದಿರುವುದರಿಂದ ವಾಹನ ಚಾಲಕರಿಗೆ ತೊಂದರೆಯಾಗಿತ್ತು. ನಗರಸಭೆ ಹಾಗೂ ಪಿಡಬ್ಲುಡಿ ಇಲಾಖೆಗಳಿಗೆ ಮನವಿ ಮಾಡಿದರೂ ಪ್ರಯೋಜನವಾಗಿರಲಿಲ್ಲ್ಲ. ಇದರಿಂದ ಬೇಸತ್ತು ತಮ್ಮ ಸ್ವಂತ ಖರ್ಚಿನಲ್ಲಿ ಸತೀಶ ಬಂಡಿವಡ್ಡರ ರಸ್ತೆಗಳಲ್ಲಿ ಬಿದ್ದಿರುವ ತೆಗ್ಗುಗಳನ್ನು ಡಾಂಬರೀಕರಣದ ಖಡಿಗಳಿಂದ ಮುಚ್ಚಿದ್ದಾರೆ.

ಪತ್ರಿಕೆಯೊಂದಿಗೆ ಮಾತನಾಡಿದ ಸತೀಶ ಬಂಡಿವಡ್ಡರ, ಅನೇಕ ಬಾರಿ ಈ ರಸ್ತೆಗಳ ಬಗ್ಗೆ ಸಂಬಂಧಿಸಿದ ಇಲಾಖೆಗಳಿಗೆ ನಾನು ಮನವಿ ಮಾಡಿದ್ದೆ. ಆದರೆ ಇದಕ್ಕೆ ಯಾರೂ ಸ್ಪಂದಿಸಲಿಲ್ಲ. ಈಗ ಮಳೆಗಾಲ ಆರಂಭವಾಗಿರುವುದರಿಂದ ಈ ತಗ್ಗುಗಳಿಂದ ವಾಹನ, ಸಾರ್ವಜನಿಕರಿಗೆ ತೊಂದರೆಯಾಗುತ್ತಿರುವುದನ್ನು ಕಂಡು ನಾನೇ ಈ ಕೆಲಸ ಮಾಡುತ್ತಿದ್ದೇನೆ ಎಂದರು. ಇದರಲ್ಲಿ ಯಾವುದೇ ತರಹದ ರಾಜಕೀಯವಿಲ್ಲ. ಇದೊಂದು ಸಾಮಾಜಿಕ ಕಾರ್ಯವೆಂದು ಭಾವಿಸಿದ್ದೇನೆಎಂದರು.

ಪರಸು ಇಟ್ಟಿನ್ನವರ, ಸಂಜು ಡೊಂಬರ, ಶಂಕರ ಹಲಗಲಿ, ನಾಗರಾಜ ಸಂಭಾಜಿ, ರಾಜು ಬೇಪಾರಿ, ಇರ್ಫಾನ ಸುರಪುರ, ದಾದಾ ಜಮಾದಾರ,ಹಜರತಸಾಬ ಸಿದ್ದಕಿ ಉಪಸ್ಥಿತರಿದ್ದರು.