ಇಲ್ಲಿನ ಅವ್ಯವಸ್ಥೆ ದೇವರಿಗೆ ಪ್ರೀತಿ

ಶಿವಕುಮಾರ ಶಾರದಳ್ಳಿ
ಮುದ್ದೇಬಿಹಾಳ: ಪ್ರಧಾನಿ ನರೇಂದ್ರ ಮೋದಿ, ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಅವರು ಸ್ವತ್ಛತೆಗೆ ಮಹತ್ವ ಕೊಡಲು ದೇಶವ್ಯಾಪಿ ಕರೆ ನೀಡಿ ಸರ್ಕಾರಿ ಆಡಳಿತ ಯಂತ್ರ ಚುರುಕುಗೊಳಿಸಲು ಕ್ರಮ ಕೈಗೊಂಡಿದ್ದಾರೆ. ಆದರೆ ವಿಜಯಪುರ ಜಿಲ್ಲೆ ಮುದ್ದೇಬಿಹಾಳದಲ್ಲಿ ಮಾತ್ರ ಸರ್ಕಾರದ ಸ್ಥಳೀಯ ಸಂಸ್ಥೆಯ ಭಾಗವಾಗಿರುವ ಪುರಸಭೆ ಮಾತ್ರ ಯಾವುದಕ್ಕೂ ತಲೆಕೆಡಿಸಿಕೊಳ್ಳದೆ ದಿವ್ಯ ಮೌನಕ್ಕೆ ಶರಣಾಗಿ ಪಟ್ಟಣದ ಮಹಾಂತೇಶನಗರ ನಿವಾಸಿಗಳು ಬಸವಳಿಯುವಂತೆ ಮಾಡಿ ಸಾರ್ವಜನಿಕರ ಕೆಂಗಣ್ಣಿಗೆ ಗುರಿಯಾಗಿದೆ.

ಮುದ್ದೇಬಿಹಾಳ ಪಟ್ಟಣದ 4ನೇ ವಾರ್ಡ್‌ ಅನ್ನು ಮಹಾಂತೇಶನಗರ ಬಡಾವಣೆ ಎಂದು ಗುರ್ತಿಸಲಾಗಿದೆ. ಈ ಬಡಾವಣೆ ಹೆಚ್ಚು ವಿಸ್ತಾರವಾಗಿದ್ದರೂ ಅಲ್ಲಲ್ಲಿ ಸಾಕಷ್ಟು ಅವ್ಯವಸ್ಥೆ ಮನೆ ಮಾಡಿದೆ. ಎಂಜಿಎಂಕೆ ಶಾಲೆ, ಶಾರದಾ ಶಾಲೆ, ಜವಾಹರ ನೆಹರು ಶಾಲೆ ಮತ್ತು ಬಿಎಸ್‌ಎನ್‌ಎಲ್‌ ಕಚೇರಿ ಮಧ್ಯೆ ಬರುವ ಕಂಚಾಣಿ ಅವರ ಜಮೀನಿನ ಅಕ್ಕಪಕ್ಕದಲ್ಲಿ ವಾಸಿಸುವ ಜನರು ಮಲೀನತೆ ಹೆಚ್ಚಾಗಿ ರೋಗ ರುಜಿನಗಳಿಂದ ಬಳಲುವ ಪರಿಸ್ಥಿತಿ ತಲೆದೋರಿದ್ದು ಅಲ್ಲಿನ ಜನರನ್ನು ಸಾಕಷ್ಟು ಹೈರಾಣುಗೆಡವಿದೆ.

ಕೊಳಚೆ ನೀರು ಸರಾಗವಾಗಿ ಹರಿದು ದೊಡ್ಡ ಚರಂಡಿ ಸೇರಲು ಯಾವುದೇ ವ್ಯವಸ್ಥೆ ಮಾಡದಿರುವುದರಿಂದ ಕೊಳಚೆ ನೀರು, ಮಳೆ ನೀರಿನ ಜೊತೆ ಸೇರಿಕೊಂಡು ಬಡಾವಣೆಯ ಖಾಲಿ ನಿವೇಶನಗಳಲ್ಲಿ ನಿಂತು ಸಣ್ಣ ಹೊಂಡಗಳನ್ನೇ ಸೃಷ್ಟಿ ಮಾಡಿದೆ. ಅದರಲ್ಲಿ ಮಾರಣಾಂತಿಕ ಸೊಳ್ಳೆಗಳು ತತ್ತಿ ಇಟ್ಟು ಸಂತಾನೋತ್ಪತ್ತಿ ನಡೆಸಿ ಅಲ್ಲಿನ ನಿವಾಸಿಗಳಿಗೆ ದಾಳಿ ಮಾಡುತ್ತಿದ್ದು ಜನತೆ ಕಂಗೆಡುವಂತಹ ದುಸ್ಥಿತಿ ನಿರ್ಮಾಣಗೊಂಡಿದೆ.

ಇದೇ ಪ್ರದೇಶದಲ್ಲಿ ಕೆಲ ತಿಂಗಳ ಹಿಂದೆ ಕುಡಿವ ನೀರಿನ ಪೈಪು ಒಡೆದು ನೀರು ಸಾಕಷ್ಟು ಪ್ರಮಾಣದಲ್ಲಿ ಪೋಲಾಗುತ್ತಿತ್ತು. ಇದನ್ನು ದುರಸ್ತಿ ಮಾಡಿ ತಡೆಯುವಂತೆ ಬಡಾವಣೆಯ ಕೆಲ ನಿವಾಸಿಗಳು ಸ್ಥಳೀಯ ಜನಪ್ರತಿನಿಧಿಗಳು, ಶಾಸಕರು, ಪುರಸಭೆ ಅಧಿಕಾರಿಗಳು, ತಹಶೀಲ್ದಾರ್‌ ಮುಂತಾದವರಿಗೆ ಮೌಖೀಕ ಮನವಿ ಮಾಡಿಕೊಂಡು ದುಂಬಾಲು ಬಿದ್ದರೂ ಪರಿಸ್ಥಿತಿಯಲ್ಲಿ ಯಾವುದೇ ಸುಧಾರಣೆ ಕಂಡಿಲ್ಲ. ಇದೇ ಪ್ರದೇಶದ ಕೆಸರುಮಿಶ್ರಿತ ರಸ್ತೆಯಲ್ಲೇ ಏಳುತ್ತ ಬೀಳುತ್ತ ಸಂಚರಿಸುವ ಅನಿವಾರ್ಯತೆ ಬಂದೊದಗಿದೆ.

ಇದೇ ಪ್ರದೇಶದಲ್ಲಿ ಖಾಸಗಿ ವ್ಯಕ್ತಿಯೊಬ್ಬರು ತಮ್ಮ ಮನೆ ಆವರಣದಲ್ಲಿ
ಬೋರ್‌ವೆಲ್‌ನಿಂದ ಬಾಡಿಗೆ ರೂಪದಲ್ಲಿ ನೀರನ್ನು ಮಾರಾಟ ಮಾಡುತ್ತಿದ್ದಾರೆ. ಅಲ್ಲಿ ನೀರು ತುಂಬಿಕೊಳ್ಳಲು ರಸ್ತೆಯ ಮೇಲೆ ನಿಲ್ಲುವ ವಾಹನಗಳಿಂದಲೂ ನೀರು ಚಲ್ಲಿ ರಸ್ತೆ ಕೆಸರುಮಯವಾಗಿ ಸಂಚಾರ ದುಸ್ತರ ಎನ್ನಿಸಿಕೊಂಡಿದೆ. ಒಟ್ಟಾರೆ ಈ ಪ್ರದೇಶದಲ್ಲಿ ಜನವಸತಿ ಸಾಕಷ್ಟು ಕಂಗೆಟ್ಟಿದ್ದು ಯಾವಾಗ ಯಾವ ರೋಗ ಬರುತ್ತದೆ, ಯಾವಾಗ ಯಾರು ಕೆಸರು ತುಂಬಿದ ರಸ್ತೆಯಲ್ಲಿ ಕಾಲುಜಾರಿ ಬಿದ್ದು ಗಾಯಪಡಿಸಿಕೊಳ್ಳುತ್ತಾರೆ ಎನ್ನುವುದು ಗೊತ್ತಾಗದ ಪರಿಸ್ಥಿತಿ ಇಲ್ಲಿದೆ. ಇದೇ ಪ್ರದೇಶದ ಒಳ ರಸ್ತೆ ಮಾರ್ಗವಾಗಿ ಶಾಲೆಗಳಿಗೆ ಹೋಗಿ ಬರುವ ಮಕ್ಕಳ ಪರಿಸ್ಥಿತಿ ತೀರ ಗಂಭೀರವಾಗಿದೆ.

ಇವರು ಶುಭ್ರ ಸಮವಸ್ತ್ರ ಧರಿಸಿ ಈ ರಸ್ತೆಯಲ್ಲಿ ಸಂಚರಿಸಿದರೆ ಪೂರ್ತಿ ಕೊಳೆಯಾಗಿ ನಿತ್ಯವೂ ಬಟ್ಟೆ ಬದಲಾಯಿಸುವ ಅನಿವಾರ್ಯತೆ ಪಾಲಕರಿಗೆ ಬಂದೊದಗಿದೆ. ಇವೆಲ್ಲ ಸಮಸ್ಯೆಗಳ ನಡುವೆ ಕುಡಿವ ನೀರಿನ ಪೈಪ್‌ ಒಡೆದಿದ್ದರೂ ದುರಸ್ತಿ ಮಾಡದ ಕಾರಣ 15 ದಿನಗಳಿಂಡ ಬಡಾವಣೆಯ ಜನತೆಗೆ ಕುಡಿವ ನೀರು ಪೂರೈಕೆಯೂ ಬಂದ್‌ ಆಗಿ ಪರದಾಡುವ ಸ್ಥಿತಿ ಇದೆ. ಅಕ್ಕಪಕ್ಕದ ತೆರೆದ ಬಾವಿ, ಕೈ ಪಂಪು ಇನ್ನಿತರೆ ನೀರಿನ ಮೂಲಗಳಿಗೆ ಜನ ಮೊರೆ ಹೋಗುತ್ತಿರುವುದು ಅಲ್ಲಲ್ಲಿ ಕಂಡು ಬರುತ್ತಿದೆ.

ಈಗಲಾದರೂ ಪುರಸಭೆ ಆಡಳಿತ, ಸ್ಥಳೀಯ ಜನಪ್ರತಿನಿಧಿಗಳು ಎಚ್ಚೆತ್ತುಕೊಂಡು ಸಮಸ್ಯೆಗಳಿಂದ ಕೂಡಿದ ಈ ಪ್ರದೇಶಕ್ಕೆ ಭೇಟಿ ನೀಡಿ ಅಲ್ಲಿ ಮನೆ ಮಾಡಿರುವ ಅವ್ಯವಸ್ಥೆ, ಅನೈರ್ಮಲ್ಯ ಸರಿಪಡಿಸಿ ಜನಜೀವನ ಎಂದಿನಂತೆ ಆರೋಗ್ಯಕರ ಬದುಕು ನಡೆಸಲು ಅವಕಾಶ ಮಾಡಿಕೊಡಬೇಕು. ಇಲ್ಲವಾದಲ್ಲಿ ಬಡಾವಣೆ ನಿವಾಸಿಗಳೆಲ್ಲ ಸೇರಿ ಪುರಸಭೆ ಕಚೇರಿ ಎದುರು ಪ್ರತಿಭಟನೆ ನಡೆಸುವುದು ಅನಿವಾರ್ಯವಾಗುತ್ತದೆ ಎಂದು ಎಚ್ಚರಿಸಿದ್ದಾರೆ.