ಭಾರತದಲ್ಲಿ ಡ್ರೈವರ್‌ಲೆಸ್‌ ಬೈಕ್‌?!

ನವದೆಹಲಿ: ಟೆಸ್ಲಾ ಸಂಸ್ಥೆ ಡ್ರೈವರ್‌ಲೆಸ್‌ ಕಾರನ್ನು ತಯಾರಿಸಿದೆ.

ಅದೇ ರೀತಿ ಡ್ರೈವರ್‌ಲೆಸ್‌ ಬೈಕಿನ ಬಗ್ಗೆ ನೀವು ಯೋಚಿಸುತ್ತಿದ್ದರೆ, ಉದ್ಯಮಿ ಆನಂದ್‌ ಮಹೀಂದ್ರಾ ಅವರ ಟ್ವಿಟ್ಟರ್‌ ಖಾತೆಯನ್ನೊಮ್ಮೆ ನೋಡಿ ಬನ್ನಿ. ವ್ಯಕ್ತಿಯೊಬ್ಬ ಬೈಕಿನ ಹಿಂದಿನ ಸೀಟಿನಲ್ಲಿ ಒಂದೇ ಕಡೆ ಎರಡೂ ಕಾಲುಗಳನ್ನು ಹಾಕಿ ಕುಳಿತಿದ್ದಾನೆ. ಆ ಬೈಕ್‌ ತನ್ನಿಂತಾನಾಗೇ ಚಲಿಸಿಕೊಂಡು ಹೋಗುತ್ತಿದೆ. ಪಕ್ಕದಲ್ಲಿ ಚಲಿಸುತ್ತಿದ್ದ ಇನ್ನೊಂದು ವಾಹನದಲ್ಲಿದ್ದ ವ್ಯಕ್ತಿಯೊಬ್ಬರು ಈ ದೃಶ್ಯವನ್ನು ವಿಡಿಯೋ ಮಾಡಿದ್ದಾರೆ.

“ಈ ಮ್ಯಾಜಿಕ್‌ ಹೇಗೆ ಸಾಧ್ಯ? ಗಾಡಿಯನ್ನು ಯಾರು ಚಲಿಸುತ್ತಿದ್ದಾರೆ? ದೇವರಾ?’ ಎಂದು ವಿಡಿಯೋ ಮಾಡುವ ವ್ಯಕ್ತಿ ಪ್ರಶ್ನಿಸಿದ್ದಾನೆ. ಅದಕ್ಕೆ ಆ ಡ್ರೈವರ್‌ಲೆಸ್‌ ಬೈಕ್‌ನಲ್ಲಿದ್ದ ವ್ಯಕ್ತಿ, ನಗುತ್ತಾ ಹೌದೆನ್ನುವಂತೆ ಸನ್ನೆ ಮಾಡಿದ್ದಾನೆ. ಈ ವಿಡಿಯೋವನ್ನು ಆನಂದ್‌ ಮಹೀಂದ್ರಾ ಅವರು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದು, ವಿಡಿಯೋ ವೈರಲ್‌ ಆಗಿದೆ.