ಸ್ಮಾರ್ಟ್‌ಫೋನ್‌, ಎಲೆಕ್ಟ್ರಾನಿಕ್ಸ್‌ ವಸ್ತುಗಳಿಗೆ ಭರ್ಜರಿ ಬೇಡಿಕೆ

ಹೊಸದಿಲ್ಲಿ: ಕೊರೊನಾ ಲಾಕ್‌ಡೌನ್‌ ಅನಂತರದಲ್ಲಿ ನಿರೀಕ್ಷೆಗೂ ಮೀರಿ ಮಾರುಕಟ್ಟೆ ಚೇತರಿಸಿಕೊಳ್ಳುತ್ತಿದ್ದು, ಇದಕ್ಕೆ ಸಾಕ್ಷಿ ಎಂಬಂತೆ ದೀಪಾವಳಿ ಸಡಗರದಲ್ಲಿ ಸ್ಮಾರ್ಟ್‌ಫೋನ್‌ ಮತ್ತು ಎಲೆಕ್ಟ್ರಾನಿಕ್‌ ವಸ್ತುಗಳ ಮಾರುಕಟ್ಟೆ ಜಿಗಿತುಕೊಂಡಿದೆ.
ಅದರಲ್ಲೂ ಟಿವಿ, ರೆಫ್ರಿಜರೇಟರ್ಸ್‌ ಮತ್ತು ವಾಷಿಂಗ್‌ ಮೆಷಿನ್ ಗಳ ಮಾರಾಟದಲ್ಲಿ ಶೇ.8ರಿಂದ 10ರಷ್ಟು ಪ್ರಗತಿಯಾಗಿದೆ ಎಂದು ಉದ್ಯಮ ಮೂಲಗಳು ಹೇಳಿವೆ. ವಿಶೇಷವೆಂದರೆ, ಲ್ಯಾಪ್‌ಟಾಪ್‌ ಸೇರಿದಂತೆ ಕೆಲವೊಂದು ಎಲೆಕ್ಟ್ರಾನಿಕ್‌ ವಸ್ತುಗಳಿಗೆ ಬೇಡಿಕೆ ಹೆಚ್ಚಿದ್ದರೂ ಮಾರುಕಟ್ಟೆಗೆ ಸರಿಯಾಗಿ ಪೂರೈಕೆಯಾಗಿಲ್ಲ. ಹೀಗಾಗಿ ಕೆಲವೆಡೆ ಮಾರಾಟ ಕಡಿಮೆಯಾಗಿದೆ ಎಂದು ಹೇಳಲಾಗುತ್ತಿದೆ.

ಗ್ರಾಹಕರ ಸೆಳೆಯುವ ಸಲುವಾಗಿ ಕಂಪೆನಿಗಳು ಉತ್ತಮ ಇಎಂಐ ಸ್ಕೀಮ್‌, ಹಣಕಾಸು ಯೋಜನೆಗಳು, ಕ್ಯಾಶ್‌ಬ್ಯಾಕ್‌ನಂಥ ಆಫ‌ರ್‌ ನೀಡಿದ್ದವು. ಇದರಿಂದಾಗಿ ಗ್ರಾಹಕರ ಖರೀದಿ ವೆಚ್ಚವೂ ಹೆಚ್ಚಾಯಿತು. ಕಳೆದೊಂದು ವಾರದಲ್ಲಿ ಈ ವಸ್ತುಗಳ ಮಾರಾಟದಲ್ಲಿ ಗಣನೀಯ ಪ್ರಗತಿಯಾಗಿದೆ ಎಂದು ಕಂಪೆನಿಗಳು ಹೇಳಿಕೊಂಡಿವೆ.

ಇನ್ನು ಬಟ್ಟೆ ಮತ್ತು ಲೈಫ್ ಸ್ಟೈಲ್‌ಗೆ ಸಂಬಂಧಿಸಿದ ವಸ್ತುಗಳ ಮಾರಾಟವೂ ಜೋರಾಗಿದೆ. ಕಂಪೆನಿಗಳು ಹೇಳುವ ಪ್ರಕಾರ, ಈ ಉದ್ಯಮ ನಿರೀಕ್ಷೆಗೂ ಮೀರಿ ಬೆಳೆದಿದೆ. ಅಂದರೆ, ಕಳೆದ ವರ್ಷಕ್ಕೆ ಹೋಲಿಕೆ ಮಾಡಿದರೆ, ಶೇ.80ರಿಂದ ಶೇ.85ರಷ್ಟು ಹೆಚ್ಚು ಮಾರಾಟವಾಗಿದೆ ಎಂದು ಎಕನಾಮಿಕ್ಸ್‌ ಟೈಮ್ಸ್‌ ಪತ್ರಿಕೆ ವರದಿ ಮಾಡಿದೆ ಎಲೆಕ್ಟ್ರಾನಿಕ್‌ ರಿಟೈಲರ್ಸ್‌ ಪ್ರಕಾರ, ಟಿವಿ, ರೆಫ್ರಿಜರೇಟರ್ಸ್‌, ಅಡುಗೆ ಮನೆ ಸಾಮಗ್ರಿಗಳು, ಲ್ಯಾಪ್‌ಟಾಪ್‌ಗಳಿಗೆ ಹೆಚ್ಚಿನ ಬೇಡಿಕೆ ಇತ್ತು. ಆದರೆ, ಪೂರೈಕೆಯಲ್ಲಿ ಕೊಂಚ ಸಮಸ್ಯೆಯಾಗಿದೆ. ಆದರೂ ಈ ವಲಯದಲ್ಲಿ ಶೇ.15ರಿಂದ 20ರಷ್ಟು ಮಾರಾಟ ಹೆಚ್ಚಾಗಿದೆ ಎಂದಿದ್ದಾರೆ.

ಎಲ್‌ಜಿ ಇಂಡಿಯಾದ ಉಪಾಧ್ಯಕ್ಷ ವಿಜಯ್‌ ಬಾಬು ಹೇಳುವ ಪ್ರಕಾರ, ದೇಶದ ಸಣ್ಣಪುಟ್ಟ ನಗರಗಳಲ್ಲಿ ಎಲೆಕ್ಟ್ರಾನಿಕ್‌ ಮತ್ತು ಸ್ಮಾರ್ಟ್‌ ಫೋನ್ ಗಳಿಗೆ ಹೆಚ್ಚಿನ ಬೇಡಿಕೆ ಬಂದಿದೆ. ಇಲ್ಲಿ ಶೇ.50ರಷ್ಟು ಬೆಳವಣಿಗೆಯಾಗಿದೆ. ಕೆಲವೆಡೆ ನೋ ಸ್ಟಾಕ್‌ ಬೋರ್ಡ್‌ಗಳು ಕಾಣಿಸುತ್ತಿವೆ ಎಂದಿದ್ದಾರೆ.

ಸ್ಮಾರ್ಟ್‌ಫೋನ್‌ಗಳಿಗೆ ಡಿಮ್ಯಾಂಡ್‌
ಈಗ ಆನ್‌ಲೈನ್‌ ಕ್ಲಾಸ್‌ ನಡೆಯುತ್ತಿರುವುದರಿಂದ ಸ್ಮಾರ್ಟ್‌ ಫೋನ್‌ಗಳಿಗೆ ಹೆಚ್ಚು ಬೇಡಿಕೆ ಇದೆ.  ಮೊದಲು ಸ್ಮಾರ್ಟ್‌ ಫೋನ್‌ ಖರೀದಿದಾರರ ವಯಸ್ಸು 18 ವರ್ಷದಿಂದ ಆರಂಭವಾಗುತ್ತಿತ್ತು. ಆದರೆ ಈಗ 10 ವರ್ಷ ಮೇಲ್ಪಟ್ಟ ಮಕ್ಕಳ ಸಲುವಾಗಿ ಖರೀದಿಯಾಗುತ್ತಿದೆ ಸಂಗೀತಾ ಮೊಬೈಲ್ಸ್‌ನ ನಿರ್ದೇಶಕ ಚಂದು ರೆಡ್ಡಿ ಹೇಳಿದ್ದಾರೆ. ಸ್ಮಾರ್ಟ್‌ಫೋನ್‌ ಮಾರುಕಟ್ಟೆಯಲ್ಲಿ ಬಹುತೇಕ ಹೆಚ್ಚಿನ ಕಂಪೆನಿಗಳ ಮೊಬೈಲ್‌ಗಳಿಗೆ ಹೆಚ್ಚಿನ ಬೇಡಿಕೆ ಇದೆ.