Winter Session: ಸೋಮವಾರ 14.18 ಗಂಟೆ ಕಲಾಪ: ನೂತನ ದಾಖಲೆ

ಬೆಳಗಾವಿ: ಇತಿಹಾಸದಲ್ಲಿ ಇದೇ ಮೊದಲು ಎಂಬಂತೆ ಸೋಮವಾರ ತಡರಾತ್ರಿ 12.58ರ ವರೆಗೆ ವಿಧಾನಸಭೆಯ ಕಲಾಪ ನಡೆದಿದ್ದು, ಒಂದೇ ದಿನ 14.18 ಗಂಟೆಗಳ ಕಾಲ ನಡೆಯುವ ಮೂಲಕ ಹೊಸ ದಾಖಲೆ ನಿರ್ಮಾಣವಾಗಿದೆ.

ಸೋಮವಾರ ಬೆಳಗ್ಗೆ 10.45ರ ಸುಮಾರಿಗೆ ಆರಂಭಗೊಂಡಿದ್ದ ಕಲಾಪವು ಮುಗಿದಾಗ ಮಧ್ಯರಾತ್ರಿ 12.58 ಆಗಿತ್ತು. ರಾತ್ರಿ 12.01 ನಿಮಿಷಕ್ಕೆ ಎದ್ದುನಿಂತ ಕಾಂಗ್ರೆಸ್‌ ಶಾಸಕ ಅಶೋಕ್‌ ಕುಮಾರ್‌ ರೈ, ಸ್ಪೀಕರ್‌ ಯು.ಟಿ. ಖಾದರ್‌ ಅವರಿಗೆ ತುಳು ಭಾಷೆಯಲ್ಲಿ ಶುಭೋದಯ ತಿಳಿಸಿದರಲ್ಲದೆ, ತುಳು ಭಾಷೆಗೆ ಸಂವಿಧಾನದ 8ನೇ ಪರಿಚ್ಛೇದದಡಿ ಅವಕಾಶ ಕಲ್ಪಿಸಬೇಕು ಎನ್ನುವ ಮೂಲಕ ಗಮನ ಸೆಳೆದರು.

ಮಂಗಳವಾರ ಬೆಳಗ್ಗೆ ಕಲಾಪ ಆರಂಭಗೊಂಡಾಗ ಈ ಬಗ್ಗೆ ಸದನಕ್ಕೆ ಪ್ರಕಟಿಸಿದ ಸ್ಪೀಕರ್‌ ಖಾದರ್‌, ತಡರಾತ್ರಿವರೆಗೆ ಯಾರೆಲ್ಲ ಶಾಸಕರು ಸದನದಲ್ಲಿ ಹಾಜರಿದ್ದರು ಎನ್ನುವುದನ್ನೂ ಪ್ರಕಟಿಸಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಬಿಜೆಪಿ ಶಾಸಕರು, ನಿಮಗೇ ಅತ್ಯುತ್ತಮ ಶಾಸಕ ಪ್ರಶಸ್ತಿ ಕೊಡಬೇಕು ಎಂದು ತಮಾಷೆ ಮಾಡಿದ ಪ್ರಸಂಗವೂ ನಡೆಯಿತು.